AKP ភ្នំពេញ ថ្ងៃទី០៥ ខែមិថុនា ឆ្នាំ២០២៦--ក្រុមបុរស និងក្រុមនារីកីឡាបាល់បោះអង្គុយជនពិការកម្ពុជាសម្រេចសមិទ្ធផលថ្មីជូនជូនជាតិ តាមរយៈការឈ្នះមេដាយមាសទាំងវិញ្ញាសាបុរស និងវិញ្ញាសានារី ដែលជាការការពារម្ចាស់តំណែងជើងឯក នៅក្នុងការប្រកួតកីឡាបាល់បោះអង្គុយជនពិការ ជើងឯកអាស៊ី លើកទី២ នៅប្រទេសម៉ាឡេស៊ី ដែលបានបញ្ចប់ដោយជោគជ័យ កាលពីល្ងាចថ្ងៃទី០៤ ខែមិថុនា ឆ្នាំ២០២៦។

មានប្រសាសន៍ប្រាប់ទីភ្នាក់ងារសារព័ត៌មានកម្ពុជា AKP ពីប្រទេសម៉ាឡេស៊ី នៅព្រឹកថ្ងៃទី០៥ ខែមិថុនា ឆ្នាំ២០២៦ ឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិកកម្ពុជា និងជាប្រធានគណៈកម្មាធិការបាល់បោះអង្គុយជនពិការពិភពលោក (Chairman Committee of The World Para Throwball) បានគូសបញ្ជាក់ថា នេះជាសមិទ្ធផលថ្មីនៃការឈ្នះមេដាយមាសជាលើកទី២ ក្នុងការប្រកួតជើងឯកអាស៊ី នៅប្រទេសម៉ាឡេស៊ី ឆ្នាំ២០២៦ ក្រោយឈ្នះមេដាយមាសដូចគ្នា ទាំងបុរស និងនារី កាលជើងឯកអាស៊ី លើកទី១ ក្នុងខែមីនា ឆ្នាំ២០២៥ ដែលកម្ពុជាធ្វើម្ចាស់ផ្ទះ។ ក្នុងនាមប្រតិភូដឹកនាំ ឯកឧត្តម យី វាសនា អគ្គលេខាធិការ អគ្គលេខាធិការ គណៈកម្មាធិការជាតិប៉ារ៉ាឡាំពិកកម្ពុជា អគ្គលេខាធិការរង និងកីឡាករ កីឡាការិនីកម្ពុជា សរុប ៣២នាក់បានបង្ហាញក្តីរីករាយ មោទនភាពជាតិ ដែលបានឈ្នះមេដាយមាសទាំងពីរវិញ្ញាសាជូនជាតិ។

ជាមួយគ្នានេះ ឯកឧត្តម យី វាសនា ក៏បានថ្លែងអំណរគុណយ៉ាងជ្រាលជ្រៅចំពោះសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងជាប្រធានគណៈកម្មាធិការជាតិប៉ារ៉ាឡាំពិកកម្ពុជា ទីស្តីការគណៈរដ្ឋមន្ត្រី ក្រសួងអប់រំ យុវជន និងកីឡា និងថ្នាក់ដឹកនាំស្ថាប័នពាក់ព័ន្ធទាំងអស់ ដែលអនុញ្ញាត និងផ្តល់ការគាំទ្រដល់ប្រតិភូកីឡាប៉ារ៉ាឡាំពិកកម្ពុជាបានចូលរួមប្រកួតក្នុងខ្នាតអាស៊ី នៅប្រទេសម៉ាឡេស៊ី ឆ្នាំ២០២៦។

គួរបញ្ជាក់ថា ចំពោះលទ្ធផលបច្ចេកទេស ក្នុងការប្រកួតផ្តាច់ព្រ័ត្រដណ្តើមមេដាយមាស ផ្នែកបុរស ក្រុមកម្ពុជាបានយកឈ្នះក្រុមស្រីលង្កា ដោយលទ្ធផល ៣-០ ក្នុងពិន្ទុ ២១-១១, ២១-១៤ និង ២១-០៥ ខណៈផ្នែកនារី ក្រុមកម្ពុជាបានយកឈ្នះក្រុមម្ចាស់ផ្ទះ ម៉ាឡេស៊ី ដោយលទ្ធផល ៣-០ ក្នុងពិន្ទុ ២១-១០, ២១-១៧ និង ២១-១៣៕

ដោយ ហេង ណាលីន (រូបភាព៖ ប្រតិភូកីឡាជនពិការកម្ពុជា)