AKP កំពង់ធំ ថ្ងៃទី០៥ ខែមិថុនា ឆ្នាំ២០២៦--លោកសាយ គឹមឡមអភិបាលស្រុកស្ទោងបានអំពាវនាវដល់ពលរដ្ឋក្នុងមូលដ្ឋានឱ្យមានការប្រុងប្រយ័ត្នខ្ពស់ចំពោះបាតុភូតភ្លៀង ផ្គរ រន្ទះ ខ្យល់កន្ត្រាក់ នារដូវវស្សានេះក្នុងឱកាសអញ្ជើញជួបសំណេះសំណាលសួរសុខទុក្ខ និងចែកអំណោយជូនគ្រួសាររងគ្រោះដោយបាតុភូតខ្យល់កន្ត្រាក់នៅក្នុងឃុំព្រះដំរី ស្រុកស្ទោងខេត្តកំពង់ធំ កាលពីរសៀលថ្ងៃទី០៤ ខែមិថុនា ឆ្នាំ២០២៦។

លោកអភិបាលស្រុកបានសម្ដែងសមានចិត្តចូលរួមសោកស្ដាយក្រៃលែងជាមួយម្ចាស់ផ្ទះគ្រប់គ្នាដែលបាន រងផលប៉ះពាល់ ដល់ផ្ទះសម្បែងជាទីជម្រកដ៏កក់ក្តៅ និងស្រឡាញ់ស្មើជីវិតក្នុងឧប្បទ្ទវហេតុគ្រោះធម្មជាតិ ដែលមិនអាចគ្រប់គ្រងបានមួយនេះ។ 

នៅក្នុងឱកាសនោះលោកសាយ គឹមឡមអភិបាលស្រុកស្ទោងបានពាំនាំការផ្តាំផ្ញើសាកសួរសុខទុក្ខពីសំណាក់ឯកឧត្តម នួន ផារ័ត្ន អភិបាលខេត្តកំពង់ធំដែលឯកឧត្តមតែងតែគិតគូរយកចិត្តទុកដាក់ខ្ពស់ដល់សុខទុក្ខ ជីវភាព និងការប្រកបអាជីវកម្មរស់នៅរបស់ពុកម៉ែបងប្អូនប្រជាពលរដ្ឋក្នុងមូលដ្ឋានក៏ដូចជានៅក្នុងស្រុកស្ទោងទាំងមូល។

ទន្ទឹមនឹងនេះលោកអភិបាលស្រុកបានជំរុញដល់លោកមេភូមិ អនុភូមិជំនួយ ការភូមិ រដ្ឋបាលឃុំត្រូវតាមដានយកចិត្តទុកដាក់ខ្ពស់ពីបញ្ហាអាកាសធាតុ និងបញ្ហាគ្រោះធម្មជាតិដែលបានកើតឡើងនៅក្នុងមូលដ្ឋានរបស់ខ្លួន ហើយធ្វើរបាយការណ៍និងរាយការណ៍ឱ្យបានជាប់ជាប្រចាំព្រមទាំងស្នើសុំនូវស្បៀងសម្រាប់សង្គ្រោះបឋមដល់រដ្ឋបាលស្រុកស្ទោង និងក្រុមការងារចុះមូលដ្ឋានឃុំ ដើម្បីបានជួយឧបត្ថម្ភគាំទ្រសង្គ្រោះទាន់ពេលវេលា។

សូមបញ្ជាក់ថាប្រជាពលរដ្ឋរងគ្រោះដោយខ្យល់កន្ត្រាក់កាលពីថ្ងៃទី៣០ខែឧសភាឆ្នាំ២០២៦កន្លងទៅនេះចំនួន ១៦គ្រួសារក្នុង១គ្រួសារៗទទួលបានអំណោយសង្គ្រោះនៅពេលនេះរួមមាន÷អង្ករចំនួម១បេ មី១កេសទឹកស៊ីអ៊ីវ១យួរនិងត្រីខរ១យួរ៕

ដោយ៖ ស៊ុម វណ្ណា