AKP ភ្នំពេញ ថ្ងៃទី០៥ ខែមិថុនា ឆ្នាំ២០២៦—ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប និងលោក លឹម សុខតូ អភិបាលរងខេត្តពោធិ៍សាត់ កាលពីថ្ងៃទី៤ ខែមិថុនា ឆ្នាំ២០២៦ បានដឹកនាំ អង្គភាពជំនាញពាក់ព័ន្ធ តំណាងរដ្ឋបាលស្រុក ភូមិបាលស្រុក អាជ្ញាធរភូមិឃុំ នៃស្រុកកណ្តៀង ខេត្តពោធិ៍សាត់ ដើម្បីចុះពិនិត្យការកំណត់ និងការផ្ទៀង​ផ្ទាត់​និយាមកាសម្រាប់បោះបង្គោលព្រំតំបន់កាត់ឆ្វៀល តំបន់១ តំបន់២ និងតំបន់៣ ក្នុងភូមិសាស្ត្រខេត្តពោធិ៍សាត់ ។

ឯកឧត្តម អគ្គលេខាធិការអាជ្ញាធរទន្លេសាប បានបញ្ជាក់ថា​ ការងារបោះបង្គោលជំហាន១ បង្គោលព្រំតំបន់៣ ក្នុងឆ្នាំ២០២៤ នៅខេត្តទាំង៦ ជុំវិញបឹងទន្លេសាប បានបញ្ចប់ចំនួន: ១ ២២៤​ ​បង្គោល​ និងការងារបោះបង្គោលជំហាន២ បង្គោលព្រំតំបន់កាត់ឆ្វៀល ក្នុងឆ្នាំ២០២៥ ស្ថិតនៅខេត្តកំពង់ឆ្នាំង និងផ្នែកខ្លះនៃខេត្តកំពង់ធំ​ ចំនួន:​ ៩១៦ បង្គោល​  ហេីយក្នុងឆ្នាំ២០២៦ នេះ រាជរដ្ឋាភិបាលបានអនុញ្ញាតឱ្យអាជ្ញាធរទន្លេសាប ធ្វើការបោះបង្គោលជំហាន២ បន្ត បង្គោលព្រំតំបន់កាត់ឆ្វៀល តំបន់១ និងតំបន់២ ស្ថិតក្នុងតំបន់៣ ក្នុងភូមិសាស្រ្តខេត្តពោធិ៍សាត់​ ចំនួន:​ ១ ៣០០​ បង្គោល។ ក្រោមការយកចិត្តទុកដាក់ខ្ពស់ក្នុងការការពារថែរក្សាធនធានធម្មជាតិ ជាពិសេសព្រៃលិចទឹកនៅក្នុង តំបន់៣ ដែលជាព្រៃសម្រាប់ទ្រទ្រង់ជីវិតបឹងទន្លេសាប ឯកឧត្តមរដ្ឋមន្រ្តី ថោ ជេដ្ឋា​ ប្រធានអាជ្ញាធរទន្លេសាប​ តែងតែណែនាំជាប្រចាំ​ ឱ្យចាត់ក្រុមការងារចុះពិនិត្យតាមដាននៅខេត្តជុំវិញបឹងទន្លេសាប ដើម្បីចូលរួមសហការជាមួយអាជ្ញាធរដែនដី សមត្ថកិច្ចពាក់ព័ន្ធក្នុងការទប់ស្កាត់បទល្មើសផ្សេងៗ ដែលតែងកើតមាននៅតំបន់ជុំវិញបឹងទន្លេសាប ។

សូមបញ្ជាក់ថា នេះជាការអនុវត្តតាមបទបញ្ជារបស់រាជរដ្ឋាភិបាលតាមរយៈលិខិតលេខ​ ១៨៨ សជណ.ដប ចុះថ្ងៃទី៩ ខែកុម្ភៈ ឆ្នាំ២០២៤ របស់ទីស្តីការគណៈរដ្ឋមន្រ្តី និងតាមការណែនាំដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប ៕

ដោយ៖ ណយ នឿន (ប្រភព៖អាជ្ញាធរទន្លេសាប)