AKP ភ្នំពេញ ថ្ងៃទី០៣ ខែមិថុនា ឆ្នាំ២០២៦-- មូលនិធិសហប្រជាជាតិសម្រាប់ប្រជាជន UNFPA និងគណៈកម្មាធិការជាតិគ្រប់គ្រងគ្រោះមហន្តរាយកម្ពុជា (NCDM) បានចុះហត្ថលេខាលើអនុស្សរណៈនៃការយោគយល់គ្នា ដើម្បីពង្រឹងការធ្វើសមាហរណកម្មអំពើហិង្សាទាក់ទងនឹងយេនឌ័រក្នុងគ្រាអាសន្នទៅក្នុងការកាត់បន្ថយ ការត្រៀមខ្លួន ការឆ្លើយតបទៅនឹងវិបត្តិនិងហានិភ័យគ្រោះមហន្តរាយ និងការស្តារឡើងវិញ។

ប្រភពពីមូលនិធិសហប្រជាជាតិសម្រាប់ប្រជាជន UNFPA បានឱ្យដឹងនៅថ្ងៃទី០២ ខែមិថុនា ឆ្នាំ២០២៦ថា តាមរយៈភាពជាដៃគូនេះ មូលនិធិ UNFPA និង NCDM នឹងធ្វើការរួមគ្នាដើម្បីគាំទ្រអ្នកផ្តល់សេវានៅថ្នាក់ជាតិ ខេត្ត និងថ្នាក់ក្រោមជាតិជាមួយនឹងចំណេះដឹង ឧបករណ៍ និងការសម្របសម្រួលដែលត្រូវការ ដើម្បីធានាសុវត្ថិភាព របស់ស្ត្រី និងក្មេងស្រីក្នុងពេលមានអាសន្ន។

មូលនិធិ UNFPA នៅតែប្តេជ្ញាធ្វើការជាមួយដៃគូជាតិ ដើម្បីធានាបាននូវការការពារ ការថែទាំ និងសេវាកម្ម សំខាន់ៗនៅបន្តមានទាំងនៅពេលមុន អំឡុងពេល និងក្រោយពេលមានអាសន្ន៕

ដោយ ណយ នឿន (ប្រភព៖ UNFPA)