AKP ភ្នំពេញ ថ្ងៃទី០៣ ខែមិថុនា ឆ្នាំ២០២៦–សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នាព្រឹកថ្ងៃទី០៣ ខែមិថុនា ឆ្នាំ២០២៦នេះ នឹងផ្តល់កិត្តិយសដ៏ខ្ពង់ខ្ពស់អញ្ជើញធ្វើជាអធិបតីក្នុងពិធី “សម្ពោធអគារកម្ពស់បីជាន់ សមិទ្ធផលនានា និងពិធីប្រគល់សញ្ញាបត្រគ្រូបង្រៀនកម្រិតមូលដ្ឋាន និងសញ្ញាបត្របរិញ្ញាបត្រអប់រំ ឯកទេសអប់រំកាយ ជូនដល់គរុសិស្ស គរុនិស្សិត នៅវិទ្យាស្ថានជាតិអប់រំកាយ និងកីឡា” ស្ថិតនៅផ្លូវ ៥៩៨ ភូមិលូ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។

វិទ្យាស្ថានជាតិអប់រំកាយ និងកីឡា ដើមឡើយមានឈ្មោះថា “សាលាមធ្យមសិក្សា​អប់រំកាយ និងកីឡា” ត្រូវបានបង្កើតឡើងនៅឆ្នាំ១៩៨៨ ចំណុះក្រសួងឃោសនាការ និងវប្បធម៌   និងមានទីតាំងនៅអាងហែលទឹកនៃពហុកីឡដ្ឋានជាតិ។

​​នៅឆ្នាំ១៩៩២ សាលាមធ្យមសិក្សា​អប់រំកាយ និងកីឡា បានប្តូរទីតាំងមកនៅសាលានយោបាយវប្បធម៌និងមុខជំនាញ (អតីតសាលាបឋមសិក្សាតេជោដំឌិន)។ ការផ្លាស់ប្តូរទីតាំងនៅពេលនោះគឺ​ប្តូរតែកន្លែងធ្វើការងាររដ្ឋបាល និងថ្នាក់រៀនតែប៉ុណ្ណោះ ដោយរក្សាទីលាន     ហ្វឹកហាត់នៅពហុកីឡដ្ឋានជាតិ។

​​នៅឆ្នាំ១៩៩៣ សាលាមធ្យមសិក្សា​អប់រំកាយ និងកីឡា ត្រូវបានប្តូរមកស្ថិតក្រោមក្រសួងកិច្ចការនារី យុវជន និងកីឡា  និងបន្ទាប់មកបានប្តូរមកស្ថិតក្រោមការគ្រប់គ្រងរបស់ក្រសួងអប់រំ យុវជន និងកីឡា រហូតដល់បច្ចុប្បន្ន។

​ ​វិទ្យាស្ថានជាតិអប់រំកាយ និងកីឡា បង្កើតឡើងនៅឆ្នាំ១៩៩៨ ចំណុះឱ្យអគ្គនាយកដ្ឋានយុវជន និងកីឡា នៃក្រសួងអប់រំ យុជន និងកីឡា និងមានទីតាំងនៅក្នុងពហុកីឡដ្ឋានជាតិ។និងនៅឆ្នាំ២០០៣ បានផ្លាស់ប្តូរមកភូមិលូ សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ ដែលជាទីតាំងនាពេលបច្ចុប្បន្ននេះ។

ចាប់តាំងពីឆ្នាំ ២០០៦ មកទល់បច្ចុប្បន្ន ក្រសួងអប់រំ យុវជន និងកីឡាបានធ្វើកិច្ច       សហប្រតិបត្តិការជាមួយ "អង្គការមិនមែនរដ្ឋាភិបាលបរទេសបេះដូងមាស" ដែលជាអង្គការរបស់ប្រទេសជប៉ុន ដោយផ្តោតលើការរៀបចំសៀវភៅសិក្សាគោលសម្រាប់បម្រើឱ្យការរៀន និងបង្រៀនមុខវិជ្ជាអប់រំកាយ និងកីឡា រួមមាន៖ សៀវភៅកម្មវិធីសិក្សាលម្អិតពីបឋមសិក្សាដល់មធ្យមសិក្សាទុតិយភូមិ, សៀវភៅសិក្សាគោលសម្រាប់គ្រូបង្រៀនពីកម្រិតបឋមសិក្សាដល់    មធ្យមសិក្សាទុតិយភូមិ, និងឧបករណ៍វាយតម្លៃថ្នាក់អប់រំកាយពីកម្រិតបឋមសិក្សាដល់មធ្យមសិក្សាទុតិយភូមិ។ នៅឆ្នាំ ២០១៥ ក្រសួងបានដាក់ឱ្យអនុវត្តជាផ្លូវការនូវកម្មវិធីអប់រំកាយ  ក្នុងម៉ោងសិក្សានៅតាមគ្រឹះស្ថានសិក្សាសាធារណៈ។

នៅឆ្នាំ ២០១៩ ស្ថិតក្រោមគម្រោងជំនួយឥតសំណងរបស់រាជរដ្ឋាភិបាលជប៉ុន ក្រសួងបានបន្តអភិវឌ្ឍវិទ្យាស្ថានជាតិអប់រំកាយ និងកីឡា សម្រាប់ការបណ្តុះបណ្តាលកម្រិតបរិញ្ញាបត្រ (១២+៤​)​ ដោយផ្តោតលើការអភិវឌ្ឍកម្មវិធីសិក្សា, កម្មវិធីសិក្សាលម្អិត, សៀវភៅសិក្សាគោល, ការរៀបចំប្រព័ន្ធក្រេឌីត, ការអភិវឌ្ឍគុណវុឌ្ឍិគ្រូ, ការរៀបចំប្រព័ន្ធព័ត៌មានវិទ្យាសម្រាប់គ្រប់គ្រងការសិក្សារបស់គរុសិស្ស‑គរុនិស្សិត ការបង្រៀន ប្រព័ន្ធគ្រប់គ្រងបណ្ណាល័យ ប្រព័ន្ធធ្វើតេស្តកាយសម្បទាសិស្ស និងការអភិវឌ្ឍហេដ្ឋារចនាសម្ព័ន្ធ ជាពិសេសការសាងសង់អគារសិក្សាកម្ពស់ ៣ជាន់ និងសមិទ្ធផលនានា ដែលនឹងត្រូវសម្ពោធជាផ្លូវការនាថ្ងៃនេះ ក្នុងគោលបំណងប្រែក្លាយវិទ្យាស្ថានជាតិអប់រំកាយ និងកីឡា ឱ្យមានលទ្ធភាពគ្រប់គ្រាន់សម្រាប់ការ      បណ្តុះបណ្តាលកម្រិតឧត្តមសិក្សា និងលើកកម្ពស់កា​រ​​បណ្តុះបណ្តាលគ្រូអប់រំកាយ និងកីឡាឱ្យកាន់តែល្អប្រសើរ ប្រកបដោយសមត្ថភាពទាំងបំ​​​ណិ​នសម្បទា វិជ្ជាសម្បទា និងចរិយាសម្បទា។

​ចាប់តាំងពីឆ្នាំ ២០០៥ ដល់ឆ្នាំ ២០២៥ ការអភិវឌ្ឍហេដ្ឋារចនាសម្ព័ន្ធនៅក្នុងវិទ្យាស្ថានជាតិអប់រំកាយនិងកីឡា រួមមាន៖ ​

​​១.ថវិការដ្ឋ មានដូចជា៖ អគាររដ្ឋបាល អគារសិក្សា អគារអន្តេវាសិកដ្ឋាន (៣៧បន្ទប់) សាលដំបូលទូក ទីលានបាល់បោះ ទីលានបាល់ទាត់ ទីលានបាល់ទះ របងខាងជើង ផ្លូវលោតចម្ងាយ ផ្លូវបេតុង របងថ្មីខាងជើងនិងខាងលិច អាហារដ្ឋាន ឃ្លាំងដាក់សម្ភារៈ បន្ទប់អគ្គិសនី និងការដំឡើងត្រង់ស្វូ ប្រព័ន្ធបង្ហូរទឹក ការចាក់ដីបំពេញនីវ៉ូជាប់របងខាងត្បូងនិងខាងកើតនិងជុំវិញទីលានបាល់ទាត់ និងការរៀបចំសួនច្បារ ដាំស្មៅ ការតបណ្តាញអគ្គិសនីពីបន្ទប់អគ្គិសនីនៅតាមអគារទាំងប្រាំពីរ (A,B,C,D,E,F និងG) និងការសាងសង់ទីលានបាល់បោះ បាល់ទះ។

​​២. ថវិកាសប្បុរជន (ជាអំណោយរបស់ ឯកឧត្តមអភិសន្តិបណ្ឌិត ស សុខា និង លោកជំទាវ កែ សួនសុភី) មានដូចជា៖ ការកសាង​ទីលានបាល់ទាត់ស្មៅសិប្បនិម្មិត និងការជួសជុលកែលម្អទីលានស្មៅធម្មជាតិ ។

​​៣. ថវិកាដៃគូពីប្រទេសជប៉ុន តាមរយៈអង្គការមិនមែនរដ្ឋាភិបាលបរទេសបេះដូងមាស មានដូចជា៖ ការសាងសង់​ផ្លូវរត់អត្តពលកម្មប្រវែង១០០ម៉ែត្រ (មាន៨ខ្សែបន្ទាត់) ការសាងសង់អាងហែលទឹកស្តង់ដា (ខ្នាត ២៥ម x​ ១៥ម)​ និងអគារធ្វើលំហាត់ប្រា​ណដោយមានបំពាក់សម្ភារបរិក្ខារ ការជួសជុលអគារអន្តេវាសិកដ្ឋាន និងការសាងសង់អគារថ្មីមួយ (ទំហំ ៤៩ម x ១៧ម កម្ពស់បីជាន់)៕

ដោយ៖ គង់ សិរីរ័ត្ន