AKP តាកែវ ថ្ងៃទី០៣ ខែមិថុនា ឆ្នាំ២០២៦-- លោក ងួន ឌីណា អភិបាលនៃគណៈអភិបាលស្រុកគិរីវង់ និងជាប្រធានគណៈបញ្ជាការឯកភាពរដ្ឋបាលស្រុកគិរីវង់ បានដឹកនាំក្រុមការងារចម្រុះនៃគណៈបញ្ជាការឯកភាពរដ្ឋបាលស្រុក ដោយមានការចូលរួមសហការពីកងកម្លាំងសមត្ថកិច្ចនៃច្រកទ្វារអន្តរជាតិភ្នំដិន បានចុះត្រួតពិនិត្យអប់រំផ្សព្វផ្សាយ និងអនុវត្តន៍វិធានការរដ្ឋបាលចំហ នៅតាមបណ្តាកាស៊ីណូចំនួន៣ទីតាំង  ដែលកំពុងដំណើរការនៅក្នុងភូមិសាស្ត្រស្រុកគិរីវង់ខេត្តតាកែវ។ ការចុះត្រួតពិនិត្យអប់រំផ្សព្វផ្សាយនេះធ្វើឡើងនៅក្រោនរ៉ូកាស៊ីណូ និងកាស៊ីណូ២ទីតាំងផ្សេងទៀត ស្ថិតនៅក្នុងភូមិសាស្ត្រស្រុកគិរីវង់ ខេត្តតាកែវ នៅជិតព្រំដែនកម្ពុជាវៀតណាម កាលពីថ្ងៃទី០២ ខែមិថុនា ឆ្នាំ២០២៦។

ក្នុងឱកាសនោះ លោក ងួន ឌីណា ក៏បានពាំនាំនូវការណែនាំ និងការយកចិត្តទុកដាក់ខ្ពស់ពីសំណាក់ថ្នាក់ដឹកនាំខេត្ត ដោយបានសង្កត់ធ្ងន់ទៅលើម្ចាស់ទីតាំងកាស៊ីណូទាំងឡាយ ត្រូវតែគោរពនិងអនុវត្តតាមច្បាប់ជាធរមាននៃព្រះរាជាណាចក្រកម្ពុជា ឱ្យបានម៉ឺងម៉ាត់បំផុត។

លោក ងួន ឌីណា បានបញ្ជាក់ថា រដ្ឋបាលស្រុកគិរីវង់ មិនគាំទ្រឬអត់ឱនឱ្យជាដាច់ខាត ចំពោះទីតាំងណាដែលលួចលាក់ ឬផ្តល់ជម្រកដល់ការបង្កើតបទល្មើសបច្ចេកវិទ្យា  ហ្គេមអនឡាញខុសច្បាប់ ឬការជួញដូរមនុស្សឡើយ។ ចំណែកម្ចាស់អាជីវកម្មត្រូវសហការផ្តល់ព័ត៌មាន និងឯកសារនានាជូនសមត្ថកិច្ចជំនាញ នៅពេលមានការតម្រូវ។ដើម្បីរួមគ្នារក្សាស្ថិរភាព សន្តិសុខ និងលើកកម្ពស់មុខមាត់របស់ស្រុក ក៏ដូចជាខេត្តតាកែវទាំងមូលផងដែរ។

លោក ងួន ឌីណា បានមានប្រសាសន៍បន្តថា យុទ្ធនាការចុះត្រួតពិនិត្យដោយផ្ទាល់នាពេលនេះ ធ្វើឡើងក្នុងគោលបំណងធានាឱ្យបាននូវសន្តិសុខ និងសុវត្ថិភាពពេញលេញនៅក្នុងបរិវេណ និងជុំវិញទីតាំងអាជីវកម្ម។ពិនិត្យការស្នាក់នៅនិងការបំពេញការងារ ស្របច្បាប់របស់កម្លាំងពលកម្មបរទេស។បង្ការនិងបង្ក្រាបជាមុននូវរាល់សកម្មភាព ឆបោកតាមប្រព័ន្ធបច្ចេកវិទ្យា(Scam Online) ដែលជាបញ្ហាប្រឈមសកល។ កិច្ចប្រតិបត្តិការរដ្ឋបាលចំហនេះបានបិទបញ្ចប់ទៅដោយរលូន ក្រោមស្មារតីទទួលខុសត្រូវខ្ពស់ និងទទួលបានការសហការយ៉ាងល្អប្រសើរពីភាគីពាក់ព័ន្ធទាំងអស់៕

ដោយ អ៊ុច សៀង