AKPភ្នំពេញ ថ្ងៃទី០២ ខែមិថុនា ឆ្នាំ២០២៦​ -- សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី នៃព្រះរាជាណាចក្រកម្ពុជាបានគូសបញ្ជាក់ថា ប្រសិនបើកម្ពុជាមិនធ្វើការកែទម្រង់លើវិស័យហិរញ្ញវត្ថុសាធារណៈទេ ប្រហែលជាការប្រមូលពន្ធរបស់យើងគឺនៅដដែល ហើយក៏នឹងមិនកើនឡើងរហូតដល់២៤០លានដុល្លារក្នុងមួយខែៗនោះទេ។ ការគូសបញ្ជាក់របស់សម្ដេចតេជោប្រមុខរដ្ឋស្ដីទីបែបនេះ ក្នុងឱកាសអញ្ជើញធ្វើទស្សនកិច្ច ពិនិត្យមើលអគារថ្មីនៃអគ្គនាយកដ្ឋានពន្ធដារ ដែលស្ថិតនៅខណ្ឌជ្រោយចង្វារ រាជធានីភ្នំពេញ នាព្រឹកថ្ងៃទី២ ខែមិថុនា ឆ្នាំ២០២៦។

សម្ដេចតេជោ ហ៊ុន សែន បានមានប្រសាសន៍ថា បើកម្ពុជាមិនធ្វើកំណែទម្រង់លើហិរញ្ញវត្ថុសាធារណៈទេ ការប្រមូលពន្ធទាំងពន្ធដារ និងពន្ធគយ ពិតជានឹងមិនមានកំណើនដូចសព្វថ្ងៃនេះទេ ។

សម្តេចតេជោសង្កត់ធ្ងន់ថា៖ «ប្រសិនបើយើងមិនធ្វើកំណែទម្រង់ទេ ប្រហែលជាប្រាក់ពន្ធរបស់យើងគឺនៅដដែល ។ ពេលមុនបើគ្រាន់តែនិយាយពីផ្នែកគយមួយ គ្រាន់តែឃើញក្នុងមួយខែបានត្រឹមតែ២០លាន ឬ៣០លានគឺអរចង់ហោះ។ ប៉ុន្តែឥឡូវនេះ ត្រឹមតែ២៤០លានដុល្លារ ឬ២៣០លានដុល្លារ គឺវាតិច វាទាបទាល់តែ២៥០លានដុល្លារ ឡើងលើ អាហ្នឹងបានខ្ពស់»។

សម្តេចតេជោលើកឡើងថា ក្នុងរយៈពេល៥ខែ ឆ្នាំ២០២៦នេះ ចំណូលពន្ធដារប្រមូលបានក្នុងរង្វង់ប្រមាណជាង៥៣% បើគិតជាទឹកប្រាក់ប្រមាណជា២០០០ពាន់លានដុល្លារ ដោយបូកជាមួយពន្ធគយទៀតបានកើនឡើងដល់ជាង៣ ៥០០ លានដុល្លារ ដែលនេះគឺគិតតែចំណូលសារពើពន្ធ ហើយនៅមិនទាន់គិតពីចំណូលមិនមែនសារពើពន្ធទៀត។

ពាក់ព័ន្ធទៅនឹងវិស័យហិរញ្ញវត្ថុរបស់កម្ពុជានេះដែរ សម្តេចតេជោថ្លែងទៅក្រុមប្រឆាំងដែលចាំតែដេករិះគន់លើការដឹកនាំរបស់កម្ពុជាថា គ្រាន់តែកម្ពុជាសម្រេចបោះពុម្ពប្រកាសប្រាក់ថ្មីបន្ថែមទៀតសុទ្ធតែថា កម្ពុជាពុំមានថវិកាគ្រប់គ្រាន់សម្រាប់បំពេញតម្រូវការ ។ ចំណុចនេះ សម្តេចតេជោមានប្រសាសន៍បញ្ជាក់ទៅកាន់ក្រុមឧទ្ទាមក្រៅច្បាប់ថា កម្ពុជាមានថវិកាគ្រប់គ្រាន់សម្រាប់បំពេញតម្រូវការដោយមិនខ្វះនោះទេ ៕

ដោយ៖ ប៊ុនរិទ្ធ