AKP ភ្នំពេញ ថ្ងៃទី២ ខែមិថុនា ឆ្នាំ២០២៦--ថ្មីៗនេះ សាលាបឋមសិក្សាវត្តរាជបូណ៌ ខេត្តសៀមរាប បានរៀបចំ «កម្មវិធីពិព័រ ណ៍បច្ចេកវិទ្យា និងស្ទែម (STEM)» ។

កម្មវិធីពិព័រណ៍នេះក្នុងគោលបំណង៖ ១.បង្ហាញពីការបញ្ចូលបច្ចេកវិទ្យាទៅក្នុងការបង្រៀន និងការសិក្សាក្នុងសតវត្សទី២១ ២.ជំរុញស្ទែម (STEM) ក្នុងការគិតវិភាគ ការច្នៃប្រឌិត និងការបង្កើតអ្វីថ្មីៗរបស់សិស្ស ផ្ដោតលើវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ៣.លើកកម្ពស់ការ ចូលរួមរបស់កុមារីក្នុងវិស័យបច្ចេកវិទ្យា តាមរយៈកម្មវិធីបច្ចេកវិទ្យា និងសហគ្រិនភាព កម្មវិធីអប់រំបង្កើតហ្គេម កម្មវិធីការគិតបែបកុំព្យូទ័រ និងការបង្កើតគំរូស្ទែម និង ៤.ចែករំលែកគម្រោងឌីជីថល និងស្ទែម ដែលជាស្នាដៃរបស់សិស្សានុសិស្សតាមកម្រិតថ្នាក់នីមួយៗ។

នៅក្នុងកម្មវិធីនេះក៏មានការឡើងធ្វើបទបង្ហាញយ៉ាងគួរឱ្យកោតសរសើរពីសំណាក់សិស្សានុសិស្ស ដែលបានបង្ហាញពីគម្រោងបច្ចេកវិទ្យា និងសមិទ្ធផលរបស់ពួកគេជាក់ស្ដែងដូចជា ការបង្ហាញកម្មវិធីទូរសព្ទ (Phone Benefit) បង្កើតឡើងដោយក្រុម Technovation Girls ការបង្ហាញហ្គេមសម្អាតដងស្ទឹងសៀមរាបពីក្រុម GCC ការតាំងបង្ហាញគំនូរជីវចលឌីជីថល (ចលនានៃភពទាំង៨) ពីសិស្សថ្នាក់ទី៥ និង ការបង្ហាញពីកម្មវិធី PLP ដោយសិស្សថ្នាក់ទី២។

ជារួម កម្មវិធីពិព័រណ៍នេះបានបង្ហាញយ៉ាងច្បាស់ពីស្នាដៃ និងគម្រោងបច្ចេកវិទ្យារបស់សិស្ស ដែលចូលរួមចំណែកយ៉ាងសកម្មក្នុងការលើកកម្ពស់ការសិក្សាផ្នែកឌីជីថល ការច្នៃប្រឌិត និងជំនាញ STEM ស្របតាមគោលនយោបាយបដិវត្តកម្មឌីជីថលរបស់រាជរដ្ឋាភិបាល៕

ដោយ៖ ចាន់ សុភឿន ,ប្រភព៖ ក្រសួងអប់រំ