AKP តាកែវថ្ងៃទី០២ ខែមិថុនាឆ្នាំ២០២៦--សាខាកាកបាទក្រហមកម្ពុជាខេត្តតាកែវ បាននាំយកអំណោយមនុស្សធម៌ ចែកជូនប្រជាពលរដ្ឋរងគ្រោះដោយសារខ្យល់កន្ត្រាក់ ចំនួន៣៩គ្រួសារនៅស្រុកគិរីវង់ខេត្តតាកែវ។

អញ្ជើញជាអធិបតីក្នុងពិធីនោះដោយ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ ព្រមទាំងមានការអញ្ជើញចូលរួមពីអនុប្រធាន សមាជិក សមាជិកាសាខាកាកបាទក្រហមកម្ពុជាខេត្តតាកែវ ប្រធាន អនុប្រធាន សមាជិក សមាជិកាអនុសាខាកាកបាទក្រហមកម្ពុជាស្រុកគិរីវង់ និងបងប្អូនប្រជាព លរដ្ឋរងគ្រោះទាំង៣៩គ្រួសារចូលរួមផងដែរ។ពិធីនេះរៀបចំឡើងនៅឃុំអង្គប្រសាទស្រុកគិរីវង់ខេត្តតាកែវ ថ្ងៃទី១ខែមិថុនាឆ្នាំ២០២៦។

មានប្រសាសន៍សំណេះសំណាលក្នុងឱកាសនោះ ឯកឧត្តម វ៉ី សំណាង អភិ បាលនៃគណៈអភិបាលខេត្តតាកែវ បានពាំនាំនូវការផ្ដាំផ្ញើរសួរសុខទុក្ខ ពីសំ ណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្ដេចតែងតែយកចិត្តទុកដាក់គិតគូរខ្ពស់ជានិច្ច អំពីសុខទុក្ខដល់បងប្អូនប្រជាពលរដ្ឋដែលរងគ្រោះ និងងាយរងគ្រោះគ្រប់ប្រភេទ នៅគ្រប់ទីកន្លែងដោយមិនប្រកាន់និន្នាការ ពូជសាសន៍ សាសនា អ្វីឡើយ ដូចពាក្យស្លោក ទីណាមានការលំបាកទីនោះមានកាកបាទក្រហមកម្ពុជា។

ឯកឧត្តម វ៉ី សំណាង បានមានប្រសា សន៍បន្តថា គ្រោះធម្មជាតិនេះវាអាចកើតឡើងគ្រប់ពេលវេលាទាំងអស់ ដែលទាមទារឱ្យអាជ្ញាធរស្រុក-ឃុំ-ភូមិ ត្រូវត្រៀមកម្លាំងប្រជាការពាររួមនឹងកម្លាំងសមត្ថកិច្ច ជួយសង្គ្រោះប្រជាពលរដ្ឋឱ្យបានទាន់ពេលវេលា។

ជាពិសេសប្រសិនបើពួកគាត់ជួបគ្រោះថ្នា ក់ខ្យល់កន្ត្រាក់រលំផ្ទះ ត្រូវតែសហការគ្នាក្នុងការជួយជួសជុលផ្ទះជូនពួកគាត់ភ្លាម កុំទុកឱ្យពួកគាត់រស់នៅក្នុងសភាព គ្មានជំរកស្នាក់អាស្រ័យឱ្យសោះ។ប្រជាពលរដ្ឋមានទុក្ខលំបាកក្នុងជីវភាព ឬជួបគ្រោះធម្មជាតិ ក្នុងនាមយើងជាមន្ត្រីដែលជាអ្នកបម្រើប្រជា ពលរដ្ឋ ពិសេសមន្ត្រីកាកបាទ ក្រហម ត្រូវតែចុះជួយប្រជាពលរដ្ឋភ្លាមៗ កុំទុកឱ្យពួកគាត់មានជីវភាពខ្វះខាត កាន់តែធ្ងន់ធ្ងរជាងនេះ។ពោលគឺត្រូវជួយដោះស្រាយទុក្ខលំបាករបស់ពួកគាត់ឱ្យបាន ដោយធ្វើយ៉ាងណាឱ្យប្រជាពលរដ្ឋរងគ្រោះ និងងាយរងគ្រោះ រស់នៅមានជីវភាពសមរម្យគ្រប់គ្រាន់។     

ឯកឧត្តម វ៉ី សំណាង ក៏បានថ្លែងប្រាប់បងប្អូនប្រជាពលរដ្ឋថា ប្រទេសជាតិយើងបច្ចុប្បន្ននេះ ក្រោមការដឹកនាំប្រកបដោយភាពស្វាហាប់ និងវៃឆ្លាតរបស់សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ធ្វើឱ្យប្រទេសមាន ការអភិវឌ្ឍរីកចម្រើនលើគ្រប់វិស័យ និងបានទាក់ទាញបណ្ដាអ្នកវិនិយោគក្រុមហ៊ុនធំៗ ឱ្យមករកស៊ីបណ្ដាក់ទុកនៅកម្ពុជាកាន់តែច្រើន ដែលបានបង្កើតឱកាសការងារជូនប្រជាពលរដ្ឋក្នុងមូលដ្ឋាន ឱ្យមានការងារធ្វើ ដើម្បីបង្កើនសេដ្ឋកិច្ចក្នុងគ្រួសារ។ពិសេសចូលរួមកាត់បន្ថយភាពក្រីក្រ និងចំណាកស្រុករបស់ពលរដ្ឋផងដែរ។

តាមរបាយការណ៍របស់រដ្ឋបាលស្រុកគិរីវង់បានឱ្យដឹងថា កាលពីពេលកន្លង ទៅមានខ្យល់កន្ត្រាក់ បក់បោកចំលំនៅដ្ឋានរបស់បងប្អូនប្រជាពលរដ្ឋចំនួន ៣៩គ្រួសារ បណ្ដាលឱ្យផ្ទះខ្លះបាក់រលំទាំងស្រុង ផ្ទះខ្លះរបើកដំបូល និងផ្ទះខ្លះទៀតបាក់សសរ ជាដើម។គ្រួសារប្រជាពលរដ្ឋរងគ្រោះទាំងនោះ នៅក្នុងឃុំអង្គប្រសាទចំនួន24គ្រួសារ(មានមួយគ្រួសាររលំទាំងស្រុង) និងឃុំរៀមអណ្ដើកចំនួន15គ្រួសារ។    

អំណោយដែលបានចែកជូនបងប្អូនប្រជាពលរដ្ឋ ទាំង៣៩គ្រួសារក្នុងពេលនោះ ដោយមួយគ្រួសារៗទទួលបាន អង្ករ25គីឡូក្រាម ត្រីខកំប៉ុង1យួរ មី1កេស  ប្រេងឆា១លីត្រ នំ១ប្រអប់ ទឹកត្រី៣ដប ទឹកស៊ីអ៊ីវ3ដប កន្ទេល1 មុង1 ភួយ1 សារុង1 ក្រម៉ា1 និងថវិកាចំនួន2ម៉ឺនរៀល។ដោយឡែកគ្រួសាររងគ្រោះដោយរលំផ្ទះទាំងស្រុងមួយគ្រួសារ បន្ថែមតង់1និងថវិកាចំនួន20ម៉ឺនរៀល៕

ដោយ៖ អ៊ុច សៀង