AKP ភ្នំពេញ ថ្ងៃទី០១ ខែមិថុនា ឆ្នាំ២០២៦--ឯកឧត្តម ស្រី សុភ័ក្រ លេខាធិការសាខា និងក្រុមការងារបានអញ្ជើញចុះជួបសំណេះសំណាល សួរសុខទុក្ខ ប្រជាពលរដ្ឋនៅភូមិស្រែអំពៅ ក្នុងឃុំទួលសំបួរ ស្រុកស្ទឹងត្រង់ ដែលរងគ្រោះដោយខ្យល់កន្ត្រាក់ សរុប ២៤ គ្រួសារ នារសៀល ថ្ងៃអាទិត្យ ទី ៣១ ខែឧសភា ឆ្នាំ២០២៦ ។

ហេតុការណ៍នេះ បានកើតឡើង កាលពីម៉ោង ៩ និង៣០នាទីយប់ ថ្ងៃទី២៨ ខែឧសភា ឆ្នាំ២០២៦ ដោយមានភ្លៀង លាយឡំនឹងខ្យល់កន្ត្រាក់បក់គួច ធ្វើឱ្យផ្ទះ ២៤ខ្នង ក្នុងភូមិស្រែអំពៅ ត្រូវ របើកដំបូលក្បឿង និងសង្កសី ជាបន្តបន្ទាប់ រងផលប៉ះពាល់កម្រិតធ្ងន់២ខ្នង មធ្យម ៤ខ្នង និងស្រាល ១៨ខ្នង។

ឯកឧត្តម ស្រី សុភ័ក្រ្ត បានចូលរួមសម្តែងការសោកស្តាយជាមួយគ្រួសាររងគ្រោះ ចំពោះមហន្តរាយធម្មជាតិ ដែលកើតឡើងដោយស្មានមិនដល់នេះ បង្កការរំខានដល់ការរស់នៅផង និង ត្រូវចំណាយពេលវេលា ខាតបង់ទាំងលុយកាក់ ដើម្បីជួសជុល និង ស្ដារឡើងវិញ។ ឯកឧត្តម បាននាំយក នូវប្រសាសន៍ ផ្ដាំផ្ញើសួរសុខទុក្ខដោយក្តីអាណិត អាសូរ ពីសំណាក់ ថ្នាក់ដឹកនាំពិសេសពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចលោកតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋរងគ្រោះ និងងាយរងគ្រោះ ដោយមិនប្រកាន់វណ្ណៈ ជំនឿសាសនា ឬនិន្នាការនយោបាយអ្វីឡើយ ហើយទោះបី សម្តេច មិនបាន អញ្ជើញមកផ្ទាល់ ក៏លោក តែងបានចាត់តំណាង ចុះអន្តរាគមន៍ ផ្តល់ជំនួយសង្រ្គោះ ជួយសម្រាលទុក្ខលំបាក ទាន់ពេលវេលា ។

ឯកឧត្តម បានអំពាវនាវដល់ប្រជាពលរដ្ឋ ទាំងអស់ ឱ្យបង្កើនការប្រុងប្រយ័ត្ន ពេលមានភ្លៀង ផ្គរ រន្ទះ ពិសេស ខ្យល់កន្ត្រាក់ ត្រូវពិនិត្យ រកកន្លែងដែលធានាសុវត្ថិភាព បង្ការការពារខ្លួន និងត្រូវ អនុវត្តវិធានការស្អាត ៣ យ៉ាងគឺផឹកស្អាត ហូបស្អាត និងរស់នៅស្អាត ដោយទម្លាប់រស់នៅ តាមទិសស្លោក "ស្រឡាញ់ខ្លួន ឱ្យស្ងួនចំណី " និង សូម ចូលរួមជាមួយសហគមន៍ ពង្រឹងភាពធន់ទៅនឹងការប្រែប្រួលអាកាសធាតុ ។

សាខា បានផ្ដល់ជូនថវិកា ដើម្បីស្ដារនិងជួសជុលឡើងវិញ តាមកម្រិតខូចខាតជាក់ស្តែងសម្រាប់គ្រួសារនីមួយៗចាប់ ពី ៥០,០០០ រៀល ដល់ ៣០០,០០០រៀល ។

ដោយឡែកស្ត្រីវ័យចំណាស់ វ័យ៦៥ឆ្នាំ ម្នាក់ នៅភូមិភ្នំមន្ទីរ ឃុំព្រែកកក់ ដែលរងគ្រោះដោយខ្យល់កន្ត្រាក់បក់បំប៉ើងដំបូលសង្កសីផ្ទះតៀមផ្ទាល់ដី ទំហំ ៥ម×៧ម អស់ទាំងស្រុ ឯកឧត្តម លេខាធិការសាខា បាន ឧបត្ថម្ភថវិកា សម្រាប់ការជួសជុលឡើងវិញ ចំនួន ៤០០,០០០រៀល ហើយ អនុសាខាស្រុក ក៏បានផ្តល់ជូន អង្ករ ២០គក្រ មី ត្រីខ ទឹកត្រី ទឹកស៊ីអ៊ីវ ១យួរ បន្ថែមទៀត ផងដែរ ៕

ដោយ ពេជ្រ សំអឿន (ប្រភព៖កាកបាទក្រហមកម្ពុជា)