AKP កំពង់ឆ្នាំង ថ្ងៃទី២៩ ខែឧសភា ឆ្នាំ២០២៦-- លោកជំទាវបណ្ឌិត សឿ សុជាតា អនុរដ្ធលេខាធិការក្រសួងអប់រំយុវជន និងកីឡា បានអញ្ជើញចុះសួរសុខទុក្ខ និង នាំយកអំណោយចែកជូនដល់កុមារដែលមានឪពុកម្ដាយជួបការលំបាក ចាស់ជរាគ្មានទីពឹងនៅសាលាបឋមសិក្សាសុខសែនជ័យ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង កាលពីថ្ងៃទី២៨ ខែឧសភា ឆ្នាំ២០២៦ ដោយមានការអញ្ជើញចូលរួមពីលោកជំទាវប្រតិភូអមដំណើរ លោកស្រី ហេង សុទ្ធាវី អគ្គនាយិកា ក្រុមហ៊ុនទឹកផ្លែឈើយ៉ូស ( Yoe's ) និងលោក លោកស្រី តំណាងមន្ទីរពាក់ព័ន្ធ អាជ្ញាធរមូលដ្ឋាន លោកគ្រូ អ្នកគ្រូ និងសិស្សានុសិស្សផងដែរ ។

ក្នុងឱកាសនោះ លោកជំទាវបណ្ឌិត សឿ សុជាតា បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចកាលសម្តេចតែងតែនឹករលឹកដល់កុមារ និងមានការព្រួយបារម្មណ៍ដល់កុមារតូចៗដែលឪពុកម្ដាយជួបការលំបាក។ កុមារទាំងអស់ត្រូវចេះថែរក្សាសុខភាព និងចេះថែរក្សាអនាម័យក្នុងការរស់នៅ ដូចជា រស់នៅស្អាត ហូបស្អាត ត្រូវចៀសឱ្យឆ្ងាយពីគ្រឿងញៀន និងត្រូវប្រឹងប្រែងខិតខំរៀនសូត្រ។ ចំពោះលោកគ្រូ អ្នកគ្រូវិញ ត្រូវបន្ថែមការយកចិត្តិទុកដាក់ក្នុងការថែទាំ និងធ្វើការអប់រំកុមារដែលបានរស់នៅក្នុងការតស៊ូសិក្សារៀនសូត្រ ឱ្យដូចជាកូនបង្កើតរបស់ខ្លួនផងដែរ។

ទន្ទឹមនឹងនេះលោកជំទាវបណ្ឌិតបានជម្រុញឱ្យអាជ្ញាធរមូលដ្ឋានដាក់ការរៀបចំក្របខ័ណ្ឌច្បាប់ គឺជាជំហានដំបូង ដើម្បីផ្តល់នូវការការពារផ្លូវច្បាប់ដល់កុមារ និងក្មេងជំទង់ ដែលនៅបន្តប្រឈមមុខខ្ពស់នៃការបោះបង់ចោលការសិក្សា ការមានផ្ទៃពោះនៅក្មេងបឋមវ័យ ការរៀបអាពាហ៍ពិពាហ៍របស់កុមារ និងអំពើហឹង្សា។ មូលហេតុមួយ គឺដោយសារតែឥរិយាបថសង្គម ដែលបង្កឲ្យមានអំពើហិង្សាកើតមានឡើង និងដោយសារចំនួនសេវាគាំទ្រសម្រាប់កុមារ និងក្មេងជំទង់ក្នុងវិស័យសំខាន់ៗ ដូចជាអប់រំ ការងារសង្គម សុខភាព និងយុត្តិធម៌ នៅមានកម្រិតនៅឡើយ។ 

នាឱកាសនេះដែរ លោកជំទាវបានបញ្ជាក់ទៀតថា យកចិត្តទុកដាក់និងគិតគូរពីសុខទុក្ខកុមារតូចគ្រប់ទីកន្លែងដើម្បីអោយចៅៗបានសិក្សារៀនសូត្រដូចកុមារដទៃទៀត ចេះស្រឡាញ់គ្នាដូចបងប្អូន ខិតខំថែទាំសុខភាព និងខិតខំរៀនសូត្រព្រោះចៅៗជាទំពាំងស្នងឬស្សី ត្រូវដើរតាមមាគារល្អ ជៀសអោយឆ្ងាយពីគ្រឿងញៀន និង អំពើអប្បាយមុខផ្សេងៗដែមសង្គមស្អប់មខ្ពើម ចៅៗពិតជាក្លាយខ្លួនជាមនុស្សល្អ និងមានប្រយោជន៍សំរាប់អនាគតខ្លួន គ្រួសារ និងសង្គមជាតិ។

ថ្លែងនៅក្នុងឱកាសនេះដែរ លោកជំទាវបណ្ឌិត សឿ សុជាតា និងមន្ត្រីអមឌដំណើរ បានឧបត្ថម្ភនូវភេសជ្ជៈទឹកផ្លែឈើយ៉ូស (Yoe's) ដល់ប្អូនៗកុមារចំនួន២០៧នាក់ និងមានសៀវភៅ ប៊ិចនិងខ្មៅដៃ។ សម្រាប់លោកគ្រូ អ្នកគ្រូដែលមានវត្តមាននៅទីនេះទទួលបាន មី ទឹកសុទ្ធ ភេសជ្ជៈ និងថវិកាមួយចំនួនផងដែរ៕ 

ដោយ បៃ ស៊ីថុន