AKP ភ្នំពេញ ថ្ងៃទី២៩ ខែឧសភា ឆ្នាំ២០២៦--អង្គការ WWF និងមន្ទីរទេសចរណ៍ខេត្តក្រចេះ បានរៀបចំដំណើរទស្សនកិច្ចផ្លាស់ប្តូរបទពិសោធន៍ របស់សហគមន៍ទេសចរណ៍ធម្មជាតិនៅខេត្តក្រចេះដើម្បី ពង្រឹងសមត្ថភាពទេសចរណ៍ប្រកបដោយចីរភាព តាមរយៈដំណើរទស្សនកិច្ចសិក្សាផ្លាស់ប្តូរបទពិសោធន៍នៅខេត្តសៀមរាប។ ដំណើរទស្សនកិច្ចផ្លាស់ប្តូរបទពិសោធន៍រយៈពេល ៣ថ្ងៃ ទៅកាន់ខេត្តសៀមរាបនាពេលនេះ មានការគាំទ្រពីម្ចាស់ជំនួយ OIF។ នេះបើតាមការឱ្យដឹងពី អង្គការ WWF នៅថ្ងៃទី២៨ ខែឧសភា ឆ្នាំ២០២៦ ។

ដំណើរទស្សនកិច្ចនេះ ត្រូវបានរៀបចំឡើងសម្រាប់សហគមន៍អេកូទេសចរណ៍ធម្មជាតិ កោះព្រហ្មចារីជ្រោយបន្ទាយ និងកោះផ្ដៅ រួមជាមួយនឹងអង្គការ CRDT ដែលមកពីខេត្តក្រចេះ ក្នុងគោលបំណងពង្រឹងសមត្ថភាពលើការអភិវឌ្ឍន៍វិស័យទេសចរណ៍ប្រកបដោយចីរភាព។ ក្នុងឱកាសនោះ អ្នកចូលរួមបានស្វែងយល់យ៉ាងស៊ីជម្រៅពីការអនុវត្តន៍ជាក់ស្តែងរបស់សហគមន៍អេកូទេសចរណ៍គំរូ ការសិក្សាទៅលើការបណ្តុះបណ្តាលផ្នែកបដិសណ្ឋារកិច្ច និងយន្តការគ្រប់គ្រងកិច្ចសហការនៅតាមតំបន់គោលដៅ។ លើសពីនេះ ក្រុមការងារក៏បានជួបពិភាក្សាជាមួយសម្ព័ន្ធទេសចរណ៍ចីរភាព (STA) និងតំណាងផ្នែកឯកជនផ្នែកទេសរណ៍ផងដែរ ដែលប្រព្រឹត្តនៅ Artisans Angkor (DET)។ 

តំណាងអ្នកចូលរួមម្នាក់បានចែករំលែកចំណាប់អារម្មណ៍ថា «សហគមន៍យើងទទួលបានឱកាសដ៏មានសារៈសំខាន់ក្នុងការសិក្សា និងពិភាក្សាអំពីយុទ្ធសាស្ត្រទំនាក់ទំនងរវាងសហគមន៍ និងទីភ្នាក់ងារទេសចរណ៍នានា ដើម្បីជំរុញការផ្សព្វផ្សាយតំបន់របស់យើងឱ្យក្លាយជាគោលដៅទេសចរណ៍ដ៏ទាក់ទាញ»។

ដំណើរផ្លាស់ប្តូរបទពិសោធន៍នេះបានផ្តល់នូវចំណេះដឹង ទស្សនទាន និងមេរៀនស្តីពីអភិបាលកិច្ចដឹកនាំយ៉ាងសំខាន់ដល់សហគមន៍ ក្នុងការលើកកម្ពស់គុណភាពសេវាកម្ម ទេសចរណ៍ កិច្ចសហការរវាងភាគីពាក់ព័ន្ធ និងការអនុវត្តន៍ការងារទេសចរណ៍បែបបៃតង ដែលជាទុនដ៏មានតម្លៃក្នុងការជំរុញការអភិវឌ្ឍន៍វិស័យទេសចរណ៍នៅខេត្តក្រចេះឱ្យកាន់តែរីកចម្រើនប្រកបដោយចីរភាព និងរឹងមាំនាពេលអនាគត ៕ 

ដោយ ណយ នឿន (ប្រភព៖WWF)