AKP ភ្នំពេញ ថ្ងៃទី២៨ ខែឧសភា ឆ្នាំ២០២៦ --

 នាសាលាហ្វឹកហ្វឺនកងកម្លាំងរក្សាសន្តិភាពពហុសាសន៍ ស្ថិតក្នុងស្រុកភ្នំស្រួច ខេត្តកំពង់ស្ពឺ ថ្ងៃទី២៨ ខែឧសភា ឆ្នាំ២០២៦ ឯកឧត្តម ឧត្តមសេនីយ៍ទោ សែម រតនា អនុប្រធានទី១ គណ:កម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព និងឯកឧត្តម Olivier Richard ឯកអគ្គរដ្ឋទូតនៃសាធារណរដ្ឋបារាំង ប្រចាំនៅព្រះរាជាណាចក្រកម្ពុជា បានអញ្ជើញចុះពិនិត្យការហ្វឹកហ្វឺនជំនាញបោសសម្អាតមីននៅនឹងទីលានដោយផ្ទាល់។

នាឱកាសនោះ គណៈប្រតិភូបានអញ្ជើញទស្សនាវគ្គសិក្សាជំនាញកម្ទេចគ្រឿងផ្ទុះកម្រិត២ និងការប្រើឧបករណ៍គ្រឿងផ្ទុះកែច្នៃ ដែលកំពុងប្រព្រឹត្តទៅនៅសាលាហ្វឹកហ្វឺនកងកម្លាំងរក្សាសន្តិភាពពហុសាសន៍ ដោយវគ្គសិក្សានេះមានរយៈពេល ៥សប្ដាហ៍ ចាប់ផ្តើមពីថ្ងៃទី៥ ខែឧសភា ដល់ថ្ងៃទី០៥ ខែមិថុនា ឆ្នាំ២០២៦ បង្រៀនដោយយោធាចារ្យបារាំងចំនួន ២រូបមកពីកងទ័ពបារាំង ព្រមទាំងបានទស្សនាការកម្ទេចគ្រាប់ជាក់ស្តែងផងដែរ។

ក្នុងឱកាសនោះ ឯកឧត្តម ឧត្តមសេនីយ៍ទោ សែម រតនា បានថ្លែងអំណរគុណយ៉ាងជ្រាលេជ្រៅបំផុតជូនចំពោះរដ្ឋាភិបាលបារាំង ដែលតែងមានកិច្ចសហប្រតិបត្តិការល្អជាមួយមជ្ឈមណ្ឌលជាតិរក្សាសន្តិភាព តាមរយៈការផ្តល់នូវវគ្គហ្វឹកហ្វឺនដល់កងកម្លាំងរក្សាសន្តិភាពរបស់កម្ពុជាឱ្យមានជាទុនចំណេះដឹង និងជំនាញចាំបាច់នានា ដើម្បីយកទៅបម្រើក្នុងបេសកកម្មចូលរួមរក្សាសន្តិភាពក្រោមឆត្រអង្គការសហប្រជាតិនៅតាមបណ្តាប្រទេសមួយចំនួន ដែលកំពុងហែកហួរដោយសារសង្គ្រាម មានដូចជា នៅទ្វីបអាហ្វ្រិក និងនៅមជ្ឈិមបូព៌ាជាដើម។ ឯកឧត្តមបានចាត់ទុកកិច្ចសហការ និងការផ្តល់ជំនួយ រួមទាំងការបញ្ជូនយោធាចារ្យបារាំងឱ្យមកហ្វឹកហ្វឺន និងបណ្តុះបណ្តាលដោយផ្ទាល់ចំពោះកងកម្លាំងកម្ពុជាថាមានសារៈសំខាន់ខ្លាំងណាស់ ព្រមទាំងបានសំណូមពរដល់ភាគីបារាំងសូមបន្តជួយដល់ការងារហ្វឹកហ្វឺននេះជាបន្តទៀត ដើម្បីបានជាការកសាងសមត្ថភាពរបស់កងកម្លាំងកម្ពុជាឱ្យកាន់តែល្អប្រសើរបន្ថែមទៀត។

ជាការឆ្លើយតប ឯកឧត្តមឯកអគ្គរដ្ឋទូតបារាំងប្រចាំកម្ពុជាបានគូសបញ្ជាក់ថា អាស្រ័យដោយទំនាក់ទំនង និងកិច្ចសហប្រតិបត្តិការដ៏ល្អរវាងបារាំង និងកម្ពុជាមានតាំងពីយូរយាណាស់មកហើយនោះ បារាំងតែងតែជួយដល់កម្ពុជាតាមដែលអ្វីដែលអាចជួយបាន ហើយថាចំពោះការផ្តល់ជំនួយសម្រាប់វគ្គហ្វឹកហ្វឺនចំពោះកងកម្លាំងកម្ពុជានេះ ពិតណាស់ ភាគីបារាំងនឹងនៅតែបន្តជួយតទៅមុខទៀត។ ជាមួយគ្នានេះ ឯកឧត្តមឯកអគ្គរដ្ឋទូតក៏បានសម្ដែងការកោតសរសើរចំពោះប្រទេសកម្ពុជា ដែលបានក្លាយជាប្រទេសបញ្ជូនកងកម្លាំងមួកខៀវចូលរួមក្នុងបេសកកម្មរក្សាសន្តិភាពរបស់អង្គការសហប្រជាជាតិយ៉ាងសកម្មបំផុតមួយ ហើយថា ប្រទេសបារាំងនឹងបន្តគាំទ្រដល់ការបណ្តុះបណ្តាលកងកម្លាំងមួកខៀវកម្ពុជា ក្នុងបុព្វហេតុរក្សាសន្តិភាពរបស់អង្គការសហប្រជាជាតិជាបន្តទៅទៀតដោយឥតរួញរា៕

ដោយ៖ ចាន់ សុភឿន