AKP ភ្នំពេញ ថ្ងៃទី២៧ ខែឧសភា ឆ្នាំ២០២៦ ---
ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការលើកទឹកចិត្ត និងជំរុញផលិតកម្មអំបិល បានដឹកនាំកិច្ចប្រជុំអន្តរក្រសួង ដើម្បីពិភាក្សាលើការស្នើគម្រោងបង្កើតរោងចក្រផលិតអំបិល និងការសិក្សាសក្តានុពលវិស័យអំបិលនៅកម្ពុជា របស់ក្រុមហ៊ុន ចេនឡា ហ្វ៊ូដ អិចប្រេស ឯ.ក (CHENLA FOOD EXPRESS CO., LTD.) នាព្រឹកថ្ងៃទី២៧ ខែឧសភា ឆ្នាំ២០២៦ ទីស្តីការក្រសួងសេដ្ឋកិច្ច និងហិរញ្ញវត្ថុ។
កិច្ចប្រជុំនេះមានការចូលរួមពីតំណាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ព្រមទាំងអគ្គនាយកដ្ឋានពាក់ព័ន្ធក្រោមឱវាទក្រសួងសេដ្ឋកិច្ច និងតំណាងវិស័យឯកជន ក្នុងគោលបំណងសិក្សាពីលទ្ធភាពកែច្នៃ និងប្រើប្រាស់អំបិលក្នុងស្រុក ក៏ដូចជាជំរុញការចូលរួមរបស់វិស័យឯកជន ក្នុងការអភិវឌ្ឍវិស័យយុទ្ធសាស្ត្រមួយនេះ។

ក្នុងឱកាសនោះ អង្គប្រជុំបានពិភាក្សាពីបញ្ហាប្រឈមនានាក្នុងវិស័យអំបិល ដែលទាមទារឱ្យមានការធ្វើទំនើបកម្មបច្ចេកទេសផលិត, ការលើកកម្ពស់គុណភាពស្តង់ដារ, ការរៀបចំឃ្លាំងស្តុក, ការគាំទ្រសហគមន៍អំបិល និងការប្រើប្រាស់ដីស្រែអំបិលឱ្យមានប្រសិទ្ធភាព ដើម្បីពង្រឹងសមត្ថភាពប្រកួតប្រជែងលើទីផ្សារ។
ឯកឧត្តមបណ្ឌិតសភាចារ្យ ហ៊ាន សាហ៊ីប បានគូសបញ្ជាក់ថា ក្រសួងតែងតែស្វាគមន៍ចំពោះការចូលរួមរបស់វិស័យឯកជន ប៉ុន្តែគម្រោងវិនិយោគ និងការស្នើសុំលើកទឹកចិត្តណាមួយ ត្រូវតែផ្អែកលើក្របខណ្ឌច្បាប់, មានប្រភពទុន និងបច្ចេកទេសច្បាស់លាស់, មិនប៉ះពាល់ដល់បរិស្ថាន-សង្គម និងត្រូវផ្តល់ផលប្រយោជន៍ដល់ផលិតករក្នុងស្រុក ក៏ដូចជាសាធារណជន។

ជាលទ្ធផល អង្គប្រជុំបានណែនាំឱ្យក្រុមហ៊ុនបន្តសិក្សា និងរៀបចំផែនការវិនិយោគឱ្យបានលម្អិតបន្ថែម រួមមាន គំរូអាជីវកម្ម, បច្ចេកវិទ្យាផលិត, ផែនការសហការជាមួយសហគមន៍អំបិល និងការវាយតម្លៃផលប៉ះពាល់បរិស្ថាន ដើម្បីដាក់ជូនក្រសួង-ស្ថាប័នពាក់ព័ន្ធពិនិត្យបន្ត ស្របតាមអភិក្រម “ជីវភាពនៃប្រព័ន្ធតួអង្គតែមួយ” ក្នុងគោលដៅអភិវឌ្ឍវិស័យអំបិលកម្ពុជាឱ្យមានចីរភាព៕
ដោយ៖ ទូច វលក័្ខណ ,ប្រភព៖ ក្រសួងសេដ្ឋកិច្ច