AKP បន្ទាយមានជ័យថ្ងៃទី ២៧ ខែឧសភាឆ្នាំ២០២៦--ដើម្បីពង្រឹងសុវត្ថិភាព និងបង្កើនទំនុកចិត្តដល់ភ្ញៀវទេសចរជាតិនិងអន្តរជាតិ ដែលមកកម្សាន្តនៅតាមតំបន់ការពារធម្មជាតិ សហគមន៍មូលដ្ឋានចាំបាច់ត្រូវតែមានសមត្ថភាពម្ចាស់ការលើការងារសង្គ្រោះបន្ទាន់។ 

ជាក់ស្តែង កាលពីថ្ងៃអង្គារ ទី២៦ ខែ ឧសភា ឆ្នាំ២០២៦ នេះ ក្រុមអ្នកនាំផ្លូវទេសចរណ៍សហគមន៍ និងសមាជិកសាលារៀនស្រែកសិករ សរុបចំនួន ៣០នាក់ (ស្រី ១២នាក់) នៅក្នុងឃុំប៉ោយចារ ស្រុកភ្នំស្រុកខេត្តបន្ទាយ មានជ័យ បានទទួលការបំប៉នសមត្ថភាពយ៉ាងដិតដល់ស្តីពី «វិជ្ជាសង្គ្រោះបឋម»។

វគ្គបណ្តុះបណ្តាលដ៏មានសារៈសំខាន់នេះ ស្ថិតក្នុងក្របខណ្ឌនៃវគ្គបណ្ដុះប ណ្ដាលស្ដីពី «ការផ្តល់សេវាកម្មទេសចរណ៍ធម្មជាតិលើកទី២ ទៅដល់សហគមន៍តំបន់ការពារធម្មជាតិគោល ដៅគម្រោង ក្នុងភូមិសាស្ត្រខេត្តបន្ទាយ មានជ័យ»។

នៅក្នុងឱកាសនោះ លោកស្រី សុខ លាភា នាយិកាសាខាកាកបាទក្រហមកម្ពុជា ខេត្តបន្ទាយមានជ័យ និងជាគ្រូបង្គោលផ្នែកវិជ្ជាសង្រ្គោះបឋម បានផ្តល់ការធ្វើបទបង្ហាញ និងការអនុវត្តផ្ទាល់លើមេរៀនគន្លឹះៗ ដែលងាយនឹងជួបប្រទះក្នុងសកម្មភាពទេសចរណ៍ធម្មជាតិ រួមមាន៖តួនាទីអ្នក សង្គ្រោះ ការយល់ដឹងពីភារកិច្ច និងការគ្រប់គ្រងស្ថានការណ៍ផ្អើលឆោឡោ។ដំណេកសុវត្ថិភាពរបៀបដាក់ជនរងគ្រោះដេកក្នុងទម្រង់ត្រឹមត្រូវដើម្បីការពារការថប់ដង្ហើម។ការសង្គ្រោះការបាក់ឆ្អឹង និងគ្រោះថ្នាក់ពីសត្វសាហាវ បច្ចេកទេសអបឆ្អឹង និងការសង្គ្រោះបឋមទាន់ពេលវេលានៅពេលត្រូវពស់ចឹក។

ការសង្គ្រោះវិបត្តិដង្ហើមពេលលង់ទឹក ជំនាញដកដង្ហើមជំនួយ និងការជួយសង្គ្រោះជនលង់ទឹកឱ្យរស់រានមានជីវិត។ការបញ្ជូនជនរងគ្រោះ វិធីសាស្ត្រលើកសែង និងដឹកជញ្ជូនជនរងគ្រោះទៅកាន់មន្ទីរពេទ្យប្រកបដោយសុវត្ថិភាពខ្ពស់បំផុត។

លោកស្រី សុខ លាភាបានបញ្ជាក់ថា «វិជ្ជាសង្គ្រោះបឋមនេះ គឺជាជំនួយមួយយ៉ាងប្រសើរដែលបងប្អូនគ្រប់គ្នាត្រូវតែចេះ ដើម្បីយកទៅប្រើប្រាស់ជាប្រ យោជន៍ក្នុងការជួយសង្គ្រោះអាយុជីវិតជនរងគ្រោះ ឱ្យបានចៀសផុតពីការស្លាប់បាត់បង់ជីវិត ឬជាចំណែកមួយជួយសម្រួលដល់ការព្យាបាលរបស់គ្រូពេទ្យនៅពេលគាត់មកដល់»។ 

លោកស្រីនាយិកាសាខា ក៏បានគូស បញ្ជាក់បន្ថែមថា វិជ្ជាសង្គ្រោះបឋមនេះ មិនមែនជាការងារស្ម័គ្រចិត្តធម្មតានោះទេ ប៉ុន្តែជាចំណេះដឹងដែលរាជរដ្ឋាភិ បាលកំពុងជំរុញយ៉ាងសកម្ម ដល់បងប្អូនប្រជាពលរដ្ឋគ្រប់រូបត្រូវមានការយល់ដឹង។ គោលដៅធំគឺធ្វើយ៉ាងណាឱ្យ យ៉ាងហោចណាស់មានសមាជិកម្នាក់ក្នុងមួយគ្រួសារអាចចេះប្រើវិជ្ជានេះបានដើម្បីកាត់បន្ថយអត្រាគ្រោះថ្នាក់ និងផលប៉ះពាល់ធ្ងន់ធ្ងរនៅក្នុងសហគមន៍ទាំងមូល។

វគ្គផ្សព្វផ្សាយនៅឃុំប៉ោយចារនាពេលនេះ មិនត្រឹមតែជួយលើកកម្ពស់សមត្ថភាពបុគ្គលប៉ុណ្ណោះទេ ប៉ុន្តែថែមទាំងជាការចូលរួមចំណែកលើកស្ទួយវិស័យទេសចរណ៍ធម្មជាតិនៅក្នុងខេត្តបន្ទាយមានជ័យ តាមរយៈការបង្កើតបរិស្ថានទេសចរណ៍មួយដែលមាន «សុវត្ថិភាពខ្ពស់ និងទំនុកចិត្តពេញលេញ» សម្រាប់ភ្ញៀវទេសចរគ្រប់រូបដែលមកកម្សាន្តនៅតំបន់ការ ពារធម្មជាតិទាំងនោះ៕

ដោយ ៖ឈុនសារ៉ាត