AKP ភ្នំពេញ ថ្ងៃ២៥ ខែឧសភា ឆ្នាំ២០២៦ -- ដោយផ្អែកលើទស្សនៈទាននៃ «ឧទ្យានឆ្លាតវៃ» (Smart Park) នៅពេលអនាគត ដោយក្រសួងប្រៃសណីយ៍ និងទូរគមនាគមន៍ និងក្រសួងទេសចរណ៍ កំពុងដំណើរការតម្លើងអង់តែនបំពាក់ប្រព័ន្ធទូរសព្ទ នៅឧទ្យានតេជោសែន ឫស្សីត្រឹប។ នេះបើយោងតាមការឱ្យដឹងពីមន្រ្តីឧទ្យានតេជោសែន ឫស្សីត្រឹប នៅថ្ងៃទី២៥ ខែឧសភា ឆ្នាំ២០២៦ នេះ។

ប្រភពដដែលបានបន្តថា ក្នុងបរិបទនៃការវិវត្តបច្ចេកវិទ្យាឌីជីថល និងបញ្ហាប្រឈមផ្នែកបរិស្ថាននាពេលបច្ចុប្បន្ន ការគ្រប់គ្រងឧទ្យានសម័យថ្មី មិនអាចពឹងផ្អែកតែទៅលើវិធីសាស្ត្របែបប្រពៃណីប៉ុណ្ណោះបានទៀតទេ។ ដូច្នេះ គំនិត «ឧទ្យាឆ្លាតវៃ»  កំពុងក្លាយជាទិសដៅថ្មីសម្រាប់ការអភិរក្ស និងអភិវឌ្ឍធនធានធម្មជាតិប្រកបដោយចីរភាព។ ឧទ្យានឆ្លាតវៃ គឺជាការប្រើប្រាស់បច្ចេកវិទ្យា Internet of Things (IoT) ប្រព័ន្ធទិន្នន័យ (Data System) បញ្ញាសិប្បនិម្មិត (AI) និងប្រព័ន្ធភូមិសាស្ត្រឌីជីថល (GIS) ដើម្បីតាមដាន វិភាគ និងគ្រប់គ្រងធនធានធម្មជាតិ សត្វព្រៃ កសិកម្ម ទេសចរណ៍ និងសកម្មភាពផ្សេងៗក្នុងឧទ្យានឱ្យមានប្រសិទ្ធភាព និងភាពឆ្លាតវៃកាន់តែខ្ពស់។

សម្រាប់ឧទ្យានតេជោសែន ឫស្សីត្រឹប (TSRTP) ការអភិវឌ្ឍឱ្យក្លាយទៅជាឧទ្យានឆ្លាតវៃ អាចក្លាយជាគំរូមួយនៃការបញ្ចូលគ្នារវាង «ការស្រាវជ្រាវ ការអភិរក្ស និងការអភិវឌ្ឍ»។ ឧទាហរណ៍ បច្ចេកវិទ្យា IoT អាចជួយតាមដានសត្វព្រៃ ត្រួតពិនិត្យអាកាសធាតុ ព្រមានអំពីហានិភ័យភ្លើងឆេះព្រៃ គ្រប់គ្រងកសិដ្ឋានគោទឹកដោះឆ្លាតវៃ និងវាស់ចំនួនភ្ញៀវទេសចរតាមប្រព័ន្ធឌីជីថល។ ទិន្នន័យទាំងនេះនឹងក្លាយជាមូលដ្ឋានសំខាន់សម្រាប់ការសម្រេចចិត្ត ការធ្វើផែនការ និងការសិក្សាស្រាវជ្រាវបែបវិទ្យាសាស្ត្រ។

លើសពីនេះ ឧទ្យានឆ្លាតវៃក៏អាចជួយលើកកម្ពស់អេកូទេសចរណ៍ ការអប់រំបរិស្ថាន និងសេដ្ឋកិច្ចសហគមន៍ តាមរយៈការបង្កើតប្រព័ន្ធព័ត៌មានទេសចរណ៍ឆ្លាតវៃ ការផ្សព្វផ្សាយឌីជីថល និងការគ្រប់គ្រងធនធានប្រកបដោយតម្លាភាពផងដែរ។ ផ្ទុយទៅវិញ ប្រសិនបើខ្វះប្រព័ន្ធទិន្នន័យ និង IoT ការគ្រប់គ្រងឧទ្យានអាចប្រឈមនឹងបញ្ហាជាច្រើន ដូចជាពិបាកតាមដានធនធានធម្មជាតិ កង្វះទិន្នន័យសម្រាប់ការធ្វើសេចក្តីសម្រេចចិត្ត ការបាត់បង់ប្រសិទ្ធភាពការងារ និងការលំបាកក្នុងការធ្វើសហប្រតិបត្តិការជាមួយដៃគូស្រាវជ្រាវអន្តរជាតិ។

ដូច្នេះ ការរៀបចំប្រព័ន្ធហេដ្ឋារចនាសម្ព័ន្ធឌីជីថល បច្ចេកវិទ្យា IoT និងការគ្រប់គ្រងទិន្នន័យ គឺជាជំហានសំខាន់មួយសម្រាប់ TSRTP ក្នុងការឈានទៅក្លាយជា ការស្រាវជ្រាវឆ្លាវៃ -ការអភិរក្សឆ្លាតវៃ - អេកូទេសចរណ៍ឆ្លាតវៃ - ឧទ្យានកសិកម្មឆ្លាតវៃនាពេលអនាគត៕

ដោយ៖ ណយ នឿន