AKP ព្រះវិហារ ថ្ងៃទី២៥ ខែឧសភា ឆ្នាំ២០២៦--បើទោះបីជាស្ថិតក្នុងតំបន់ភូមិសាស្ត្រដាច់ស្រយាល និងមានការលំបាកយ៉ាងណាក៏ដោយ ក៏សុខទុក្ខរបស់បងប្អូនកងទ័ពជួរមុខ នៅតែជាអាទិភាពចម្បងដែលថ្នាក់ដឹកនាំជួរក្រោយតែងតែគិតគូរជានិច្ច ហើយសម្រាប់សមរភូមិក្រោយមិនបំភ្លេចសមរភូមិមុខ។ ជាក់ស្ដែង នៅព្រឹកថ្ងៃទី២៤ ខែឧសភា ឆ្នាំ២០២៦ លោកស្រី ហែម សុគុណពិសី ប្រធានមន្ទីរព័ត៌មានខេត្តព្រះវិហារ បានដឹកនាំក្រុមការងារនាំយកអំណោយរបស់លោកជំទាវ សន ម៉ារ៉ាដា រដ្ឋលេខាធិការក្រសួងព័ត៌មាន ចុះសួរសុខទុក្ខ និងចែកជូនដល់វីរកងទ័ពសមរភូមិមុខ ដែលកំពុងឈរជើងបំពេញភារកិច្ចការពារអធិបតេយ្យ បូរណភាពទឹកដី នៅតាមខ្សែបន្ទាត់ព្រំដែនកម្ពុជា-ថៃ បុស្សស្បូវ ជាំតែ ស្ថិតក្នុងភូមិសាស្ត្រស្រុកជាំក្សាន្ត ខេត្តព្រះវិហារ។

ក្នុងឱកាសនោះ លោកស្រី ហែម សុគុណពិសី បានពាំនាំនូវការសាកសួរសុខទុក្ខ និងការកោតសរសើរពីសំណាក់លោកជំទាវរដ្ឋលេខាធិការ ចំពោះវីរភាពអង់អាចក្លាហាន និងការលះបង់គ្រប់បែបយ៉ាងរបស់បងប្អូនកងទ័ពក្នុងការការពារជាតិមាតុភូមិ។ លោកស្រីបានមានប្រសាសន៍ផ្ដាំផ្ញើដល់បងប្អូនវីរកងទ័ពទាំងអស់ សូមបង្កើនការប្រុងប្រយ័ត្ន និងយកចិត្តទុកដាក់ថែរក្សាសុខភាពឱ្យបានល្អប្រសើរ ពិសេសនៅក្នុងរដូវវស្សាដែលសម្បូរទៅដោយជំងឺដង្កាត់ផ្សេងៗ ដើម្បីធានាបាននូវកម្លាំងមាំមួនក្នុងការបន្តបេសកកម្មការពារអធិបតេយ្យ បូរណភាពទឹកដីនៃកម្ពុជាឱ្យបានរឹងមាំ។ 

ជាមួយគ្នានេះដែរ លោកស្រីប្រធានមន្ទីរក៏បានបញ្ជាក់យ៉ាងច្បាស់ថា ទោះបីស្ថិតក្នុងស្ថានភាពបែបណាក៏ដោយ ក៏សមរភូមិក្រោយមិនដែលបំភ្លេចសមរភូមិមុខឡើយ ពោលគឺថ្នាក់ដឹកនាំ និងប្រជាពលរដ្ឋជួរក្រោយជានិច្ចកាលតែងតែនៅក្បែរ និងគាំទ្រដល់ការលះបង់គ្រប់បែបយ៉ាងរបស់បងប្អូនកងទ័ពជានិច្ច។

សូមជម្រាបជូនថា អំណោយរបស់លោកជំទាវ សន ម៉ារ៉ាដា រដ្ឋលេខាធិការក្រសួងព័ត៌មាន ដែលបាននាំយកទៅផ្ដល់ជូននេះ រួមមាន៖ ទឹកបរិសុទ្ធចំនួន ៥០កេស និង២០០យួរ, សាច់ជ្រូក ៤០គីឡូក្រាម, សាច់ទា ១៥គីឡូក្រាម និងបន្លែស្រស់ ៥មុខ ទម្ងន់ ៥០គីឡូក្រាម។ បន្ថែមពីលើនេះ លោកស្រី ហែម សុគុណពិសី ប្រធានមន្ទីរព័ត៌មានខេត្តព្រះវិហារ ក៏បានចូលរួមនូវថវិកាផ្ទាល់ខ្លួនមួយចំនួន ក្នុងរៀបចំអាហារសាមគ្គី ដើម្បីអង្គុយទទួលទានរួមគ្នាជាមួយវីរកងទ័ពក្នុងបរិយាកាសស្និទ្ធស្នាល និងរីករាយ ៕

ដោយ៖ រិទ្ធី, ប្រភព៖ មន្ទីរព័ត៌មានខេត្ដព្រះវិហារ