AKP តាកែវ ថ្ងៃទី២៥ ខែឧសភា ឆ្នាំ២០២៦ — រដ្ឋបាលខេត្តតាកែវ សហការជាមួយក្រសួងអប់រំយុវជន និងកីឡា គណៈកម្មាធិការជាតិអូឡាំពិកកម្ពុជា សារមន្ទីរសេដ្ឋកិច្ច និងរូបិយវត្ថុព្រះស្រីឦសានវ្ម័ន (ស.ស.រ) និងគ្រឹះស្ថានមីក្រូហិរញ្ញវត្ថុអម្រិត ដើម្បីបង្កើតព្រឹត្តិការណ៍ដើរ និងរត់កម្សាន្តសប្បុរសធម៌ ក្រោមប្រធានបទ "១ម៉ឺនជំហាន ដើម្បីសិស្ស១ម៉ឺននាក់"។ កម្មវិធីនេះប្រារព្ធឡើងដើម្បីរៃអង្គាសប្រាក់ ជួយសិស្សានុសិស្សខ្វះខាតចំនួន ១ម៉ឺននាក់ ឱ្យទទួលបានការអប់រំកាន់តែប្រសើរឡើង។

កម្មវិធីនេះរៀបចំធ្វើឡើងនៅក្នុងបរិវេណសួនច្បារមាត់បឹងតាកែវ ស្ថិតនៅក្នុងសង្កាត់រកាក្នុងក្រុងដូនកែវ ខេត្តតាកែវ កាលពីព្រឹកថ្ងៃអាទិត្យ ៨កើត ខែជេស្ឋ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី២៤ ខែឧសភា ឆ្នាំ២០២៦។ អញ្ជើញជាអធិបតីក្នុងពិធីនោះដោយលោក ស៊ុត ខុន អភិបាលរងនៃគណៈអភិបាលខេត្តតាកែវ ព្រមទាំងមានការអញ្ជើញចូលរួមពីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ចំណុះរដ្ឋបាលខេត្តតាកែវ និងកីឡាករ កីឡាការិនី ជាមន្ត្រីរាជការ កងកម្លាំងប្រដាប់អាវុធ មន្ត្រីគ្រឹះស្ថានមីក្រូហិរញ្ញវត្ថុ អង្គការសង្គមស៊ីវិល សិស្សានុសិស្ស និងប្រជាពលរដ្ឋនៅក្នុងខេត្តតាកែវសរុបប្រមាណជាង ៨០០នាក់។

មានប្រសាសន៍សំណេះសំណាលក្នុងឱកាសនោះ លោក ស៊ុត ខុន អភិបាលរងនៃគណៈអភិបាលខេត្តតាកែវ បានពាំនាំនូវការសាកសួរសុខទុក្ខ និងការកោតសរសើរពីសំណាក់ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ ជូនចំពោះគណៈកម្មការរៀបចំ ក៏ដូចជាអ្នកចូលរួមទាំងអស់ ចំពោះការរៀបចំបង្កើតឱ្យមានកម្មវិធីឡើងនៅថ្ងៃនេះ។ថវិកាដែលបានមកពីការចូលរួមក្នុងថ្ងៃនេះ វាជាការរួមចំណែកដ៏ខ្ពង់ខ្ពស់ក្នុងការជួយសម្រាលការលំបាក និងផ្តល់ឱកាសឱ្យកុមារ ក៏ដូចជាសិស្សានុសិស្សខ្វះខាតចំនួន ១ម៉ឺននាក់ឱ្យទទួលបានការអប់រំកាន់តែប្រសើរឡើង។ លោក ស៊ុត ខុន បានថ្លែងអំណរគុណយ៉ាងជ្រាលជ្រៅចំពោះគ្រប់ស្ថាប័នពាក់ព័ន្ធ និងសប្បុរសជនទាំងអស់ ដែលបានរួមដៃគ្នាបង្កើតព្រឹត្តិការណ៍នេះឡើង។

លោក ស៊ុត ខុន បានមានប្រសាសន៍បន្តថា ការហាត់ប្រាណ និងលេងកីឡា គឺជាឱសថដ៏ស័ក្តិសិទ្ធិសម្រាប់សុខភាពរាងកាយ និងស្មារតី។ ការដើរ ឬរត់ ១ម៉ឺនជំហាននៅថ្ងៃនេះ ក្រៅពីបានសុខភាពល្អ វាក៏ជាការបង្កើតនូវទម្លាប់រស់នៅស្អាត រស់នៅមានសុខភាពល្អ និងបង្កើននូវសាមគ្គីភាពមិត្តភាពយ៉ាងជិតស្និទ្ធរវាងគ្នាមនិងគ្នាផងដែរ។ ហើយព្រឹត្តិការណ៍នេះក៏ជាចំណែកមួយយ៉ាងសំខាន់ ឭក្នុងការដាស់តឿន និងបំផុសចលនាប្រជាពលរដ្ឋយុវជននៅក្នុងខេត្តតាកែវ ឱ្យងាកមកស្រឡាញ់ និងលេងកីឡាកាន់តែច្រើនឡើង ដើម្បីជៀសឱ្យឆ្ងាយពីអំពើអបាយមុខផ្សេងៗ ជាពិសេសបញ្ហាគ្រឿងញៀន។

លោក ស៊ុត ខុន អភិបាលរងខេត្តតាកែវ ក៏បានដាស់តឿនដល់កីឡាករនិងកីឡាការិនីទាំងអស់ ឱ្យរក្សានូវសណ្តាប់ធ្នាប់ យោគយល់គ្នា និងប្រកាន់ខ្ជាប់នូវស្មារតីកីឡា រត់ដោយក្តីសប្បាយរីករាយ និងសុវត្ថិភាពព្រមទាំងបានប្រកាសបើកកម្មវិធីរត់ "១ម៉ឺនជំហាន ដើម្បីសិស្ស១ម៉ឺននាក់" ជាផ្លូវការ៕

ដោយ៖ អ៊ុច សៀង