AKP ព្រះសីហនុ ថ្ងៃទី២០ ខែឧសភា ឆ្នាំ២០២៦-- ឯកឧត្ដម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ជាប្រធានគណៈបញ្ជាការឯកភាពរដ្ឋបាលខេត្តពរះសីហនុបានអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការបង្ក្រាប ការប្រឆាំងបទល្មើសឆបោកតាមប្រព័ន្ធអនឡាញ (Online Scams) ដោយមានការចូលរួមពីលោកអភិបាលរងខេត្ត អភិបាលក្រុង ស្រុក នាយករដ្ឋបាលសាលាខេត្ត កងកម្លាំងប្រដាប់អាវុធ និងមន្ទីរ អង្គភាពពាន់ព័ន្ធ នាព្រឹកថ្ងៃពុធទី២០ ខែឧសភា ឆ្នាំ២០២៦នេះ។

លោក មីន កុម្ភៈ អភិបាលរងខេត្តព្រះសីហនុ បានធ្វើរបាយការ ស្តីពីវឌ្ឍនភាពនៃការងារចុះបង្ក្រាបបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) តាមទីតាំងរស់នៅប្រមូលផ្តុំ (គិតចាប់ពីថ្ងៃទី២១ ខែមករា មកដល់ថ្ងៃទី១៨ ខែឧសភា ឆ្នាំ២០២៦) ៖
១.ខេត្តព្រះសីហនុ កាស៊ីណូទទួលបានអាជ្ញាបណ្ណចំនួន ៩៤ទីតាំង ក្នុងនោះកាស៊ីណូដែលអាជ្ញាបណ្ណមានសុពលភាពចំនួន ៨១ទីតាំង គ្មានសុពលភាព ៤ទីតាំង និងត្រូវបានដកហូតអាជ្ញាបណ្ណ ៩ទីតាំង។លទ្ធផលចុះត្រួតពិនិត្យ និងបង្ក្រាបដោយមានការសម្របសម្រួលនីតិវិធីពីតំណាងអយ្យការអមសាលាដំបូងខេត្តព្រះសីហនុ និងស្ថាប័នពាក់ព័ន្ធ និងការចុះធ្វើរដ្ឋបាលចំហលើទីតាំងកាស៊ីណូ ៩៤ទីតាំង ស្មើ ៣១៨អគារ។ លទ្ធផលទីតាំងចំនួន៣៦ ស្មើ ៩៥អគារ ក្រុមការងារមិនបានឃើញមានតម្រុយនៃបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS)។ ទីតាំងចំនួន៥៨ ស្មើ ២២៣អាគារ ក្រុមការងារបានសម្រេចបិទសៀល និងផ្តាច់ប្រព័ន្ធទឹក ប្រព័ន្ធភ្លើង និងអ៊ុនធើណែត។ ទីតាំងចំនួន១៦ រកឃើញមានពាក់ព័ន្ធការឆបោកតាមប្រព័ន្ធបច្ចេកវិទ្យា (Online Scams) មានមនុស្សសរុប ២ ០៧៤នាក់ ស្រី ២១៧នាក់ ស្មើនឹង ១៩សញ្ជាតិ។ ដកហូតសម្ភារ កុំព្យូទ័រលើតុ ៥ ១៨១គ្រឿង ទូរសព្ទដៃ ៥ ៥៦០គ្រឿង ម៉ូនីទ័រ ២១១គ្រឿង ម៉ាស៊ីនCPU ១១២គ្រឿង កុំព្យូទ័រយួរដៃ ៧គ្រឿង រថយន្ត ១១គ្រឿង និងវត្ថុសង្ស័យជាគ្រឿងញៀន មាន៖ ថ្នាំគ្រាប់ ៧៩គ្រាប់ ម្សៅកញ្ចប់ ៦កញ្ចប់ និង២ដប។

២.យុទ្ធនាការផ្សព្វផ្សាយ(ការអនុវត្តអនុក្រឹត្យ ០៣អនក្រ.បក) ចុះត្រួតពិនិត្យចំនួន ១ ០២៣ទីតាំង ក្នុងនោះរកឃើញទីតាំងមានពាក់ព័ន្ធបទល្មើសចំនួន ៧៨ទីតាំង ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា (Online Scams) ចំនួន ៤៨ទីតាំង និងទីតាំងមានជនបរទេសរស់នៅមិនស្របច្បាប់ចំនួន ៣០ទីតាំង មានមនុស្សសរុបចំនួន ១ ២២៦នាក់ (ស្រី១៦៦នាក់) ស្មើនឹង ២០សញ្ជាតិ។ ដកហូតសម្ភារមាន៖ កុំព្យូទ័រលើតុ ៧ ៤២៨គ្រឿង កុំព្យូទ័រយួរដៃ ១៤២គ្រឿង ទូរសព្ទដៃ ១៩ ៦៣០គ្រឿង ម៉ាស៊ីន CPU ៧២៦គ្រឿង ម៉ូ នីទ័រ ១ ៥៧៨គ្រឿង Tablet ៣០៤គ្រឿង រថយន្ត ៨គ្រឿង ម៉ូតូ ៤គ្រឿង ទូហ្គេមបាញ់ត្រី ២គ្រឿង អាវុធខ្លី ១ដើម និងគ្រឿងញៀន ២កញ្ចប់ ថ្នាំគ្រាប់ WY ១៥គ្រាប់ ម្សៅក្រាមសថ្លា ២កញ្ចប់។

ឯកឧត្ដម ម៉ាង ស៊ីណេត អភិបាលខេត្តព្រះសីហនុបានថ្លែងក្នុងកិច្ចប្រជុំដោយគូសបញ្ជាក់ថា ខេត្តព្រះសីហនុ ត្រូវបានរាជរដ្ឋាភិបាលឱ្យធ្វើជាម្ចាស់ផ្ទះត្រៀមរៀបចំសន្និសិទ្ធសារព័ត៌មានអន្តរជាតិ ស្តីពី (Online Scams) នៅខែ៨ ២០២៦ខាងមុខ ដូច្នេះយើងជាម្ចាស់ផ្ទះត្រូវបន្តស្រាវជ្រាវបង្ក្រាប និងសំអាតផ្ទះរបស់យើង ស្តីពីបទល្មើសឆបាកតាមប្រព័ន្ធបច្ចេកវិទ្យា (Online Scams) ដោយបច្ចុប្បន្នយើងមានក្រុមការងារចំពោះកិច្ចក្នុងការចូលរួមចុះត្រួតពិនិត្យនៅតាមសណ្ឋាគារ ការស៊ីណូក្នុងភូមិសាស្ត្រខេត្តព្រះសីហនុ ។ ដូច្នេះក្រុង ស្រុកទាំ៥ ក្នុងចំណោមក្រុងស្រុកទាំង៦ ត្រូវបន្តយកចិត្តទុកដាក់បន្តស្រាវជ្រាវតាមដានឱ្យបានជាប់ជាប្រចាំនៅតាមមូលដ្ឋានរបស់ខ្លួន ព្រោះយើងនៅមានការងារជាច្រើនផ្សេងទៀតត្រូវតែបន្តធ្វើដូចភ្លៀងរលឹម ជាពិសេសគោលដៅដែលមានការសង្ស័យ ដើម្បីសំអាតផ្ទះរបស់យើងព្រោះក្រុមឆបោកតាមបច្ចេកវិទ្យា បានធ្វើការបំបែកជាក្រុមតូចៗ ។

ឯកឧត្តម អភិបាលខេត្ត ក៏បានធ្វើការណែនាំដល់ក្រុមការងារ បន្តផ្សព្វផ្សាយដល់ម្ចាស់ទីតាំងមានដូចជា សណ្ឋាគារ ផ្ទះសំណាក់ត្រូវចូលរួមសហការជាមួយគណៈបញ្ជាការឯកភាពរដ្ឋបាលខេត្ត និងការចូលរួមអនុវត្តសារាចរលេខ០៣ របស់រាជរដ្ឋាភិបាល ដោយឡែកចំពោះផ្ទះល្វែង និងផ្ទះវិទ្យា បើរកឃើញមានការពាក់ព័ន្ធការឆបោកតាមប្រព័ន្ធបច្ចេកវិទ្យា Online Scams លើកទី១ ធ្វើការអប់រំណែនាំម្ចាស់ទីតាំង លើកទី២ ត្រូវបិទ (Seal) ដោយមិនមានការលើកលែង ៕

ដោយ ងូ សុមុនី