AKP ភ្នំពេញ ថ្ងៃទី១៦ ខែឧសភា ឆ្នាំ២០២៦--

វិទ្យាស្ថានគរុកោសល្យរាជធានីភ្នំពេញបានចុះពិនិត្យតាមដាន និងគាំទ្របច្ចេកទេសដល់កម្មវិធីបណ្ដុះបណ្ដាលគ្រូបង្រៀនផ្អែកលើកិច្ចព្រមព្រៀងតាមប្រព័ន្ធបរិញ្ញាបត្រ+១ នៅសាលាគរុកោសល្យ និងវិក្រឹតការខេត្តតាកែវ និងនៅមជ្ឈមណ្ឌលគរុកោសល្យភូមិភាគខេត្ត។

ក្នុងឱកាសនៃការចុះពិនិត្យតាមដាន នាថ្ងៃទី១៥ ខែឧសភា ឆ្នាំ២០២៦ ដោយមានការអញ្ជើញចូលរួមពីគណៈគ្រប់គ្រង និងគ្រូឧទ្ទេសនៃវិទ្យាស្ថានគរុកោសល្យរាជធានីភ្នំពេញ ព្រមទាំងគណៈគ្រប់គ្រង និងគ្រូឧទ្ទេសនៃសាលាគរុកោសល្យ និងវិក្រឹតការ និងមជ្ឈមណ្ឌលគរុកោសល្យភូមិភាគខេត្តតាកែវ ឯកឧត្ដមបណ្ឌិត សិត សេង នាយកវិទ្យាស្ថានគរុកោសល្យរាជធានីភ្នំពេញបានគូសបញ្ជាក់ថា កម្មវិធីនេះមានគោលបំណងពិនិត្យលើគុណភាពនៃដំណើរការអនុវត្តកម្មវិធីសិក្សា ដើម្បីពង្រឹងគុណភាព និងប្រសិទ្ធភាពនៃការបណ្ដុះបណ្ដាលគ្រូបង្រៀនឱ្យកាន់តែមានប្រសិទ្ធភាពខ្ពស់ ធានាថាគរុនិស្សិតដែលជាគ្រូបង្រៀនផ្អែកលើកិច្ចព្រមព្រៀងការងារក្នុងប្រព័ន្ធបរិញ្ញាបត្រ+១ ទទួលបានគុណសម្បទាពេញលេញ ឆ្លើយតបស្តង់ដាកម្មវិធី និងស្តង់ដាវិជ្ជាជីវៈគ្រូបង្រៀន និងធានាបាននូវការបង្រៀនសិស្សានុសិស្សនៅកម្រិតបឋមសិក្សាឱ្យទទួលបានលទ្ធផលសិក្សាខ្ពស់៕

ដោយ៖ ចាន់ សុភឿន (ប្រភព៖ ក្រសួងអប់រំ)