AKP ភ្នំពេញ ថ្ងៃទី១៤ ខែឧសភា ឆ្នាំ២០២៦--ក្រសួងបរិស្ថាន និង អង្គការអភិរក្សអន្តរជាតិកម្ពុជា (អង្គការ CI)បានរៀបចំសិក្ខាសាលាស្តីពីការពិនិត្យ និងវាយតម្លៃយុទ្ធសាស្ត្ររេដបូកជាតិឆ្នាំ២០១៧-២០២៦ និងការត្រៀមរៀបចំយុទ្ធសាស្ត្ររេដបូកជាតិដំណាក់កាលទី២ នៅក្រសួងបរិស្ថាននាថ្ងៃទី១៣ ខែឧសភា ឆ្នាំ២០២៦នេះ ដើម្បីបង្ហាញ និងពិនិត្យឡើងវិញនូវយុទ្ធសាស្ត្ររេដបូកជាតិឆ្នាំ២០១៧-២០២៦ និងដើម្បីស្វែងរកជម្រើសសមស្របបំផុតសម្រាប់ការធ្វើបច្ចុប្បន្នភាពយុទ្ធសាស្ត្ររេដបូកជាតិដំណាក់កាលទីពីរ។ 

ក្នុងពិធីនេះគេឃើញមានការចូលរួមពីសំណាក់ឯកឧត្តម ជួប ប៉ារីស៍ រដ្ឋលេខាធិការ និងជាជនបង្គោលរេដបូកជាតិតំណាងក្រសួងបរិស្ថាន និងមានការចូលរួមពី តំណាងក្រសួង និងអគ្គនាយកដ្ឋានពាក់ព័ន្ធ និងអង្គការដៃគូ សរុប ១០០នាក់។

ក្រសួងបរិស្ថានបានឱ្យដឹងថា អ្នកចូលរួមបានស្វែងយល់អំពីទិដ្ឋភាពទូទៅនៃគម្រោងរេដបូក យុទ្ធសាស្ត្រឥណទានកាបូន និងលទ្ធផលនៃការអនុវត្តន៍យុទ្ធសាស្ត្ររេដបូកជាតិ។ បន្ថែមពីនេះ អ្នកចូលរួមក៏បានពិភាក្សាអំពីបញ្ហាប្រឈមផ្នែកច្បាប់ បច្ចេកទេស និងស្ថាប័ន ពាក់ព័ន្ធនឹងការអនុវត្ត និងសម្របសម្រួលការងាររេដបូក ព្រមទាំងបានចូលរួមជាមតិយោបល់សម្រាប់ជំហានបន្ទាប់ក្នុងដំណើរការធ្វើបច្ចុប្បន្នភាពយុទ្ធសាស្ត្ររេដបូកជាតិដំណាក់កាលទី២ផង។ 

គួរបញ្ជាក់ផងដែរថា ផែនការយុទ្ធសាស្ត្ររេដបូកជាតិ ២០១៧-២០២៦ បានឈានដល់ឆ្នាំចុងក្រោយនៃការអនុវត្តន៍ហើយ។ ក្រសួងបរិស្ថាន នឹងធ្វើបច្ចុប្បន្នភាពផែនការយុទ្ធសាស្ត្រដំណាក់កាលទី២ ដែលគ្រោងនឹងបញ្ចប់សេចក្តីព្រាងលើកទី១ មុនបំណាច់ឆ្នាំ២០២៦នេះ៕

ដោយ មករា