AKP បន្ទាយមានជ័យ ថ្ងៃទី១១ ខែឧសភា ឆ្នាំ២០២៦--ក្នុងបរិយាកាសដ៏មហានក្ខត្តឫក្ស និងពោរពេញដោយក្តីសោមនស្សរីករាយនៃព្រះរាជពិធីបុណ្យចម្រើនព្រះជន្ម ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា រដ្ឋបាលខេត្តបន្ទាយមានជ័យ បានសម្តែងនូវភក្តីភាពយ៉ាងជ្រាលជ្រៅបំផុត តាមរយៈសារលិខិតថ្វាយព្រះពរជ័យ និងសេចក្តីដឹងគុណចំពោះអង្គព្រះមហាក្សត្រ ដែលជាម្លប់ដ៏ត្រជាក់ត្រជុំនៃប្រជានុរាស្ត្រខ្មែរ។
តាងនាមឱ្យមន្ត្រីរាជការ កងកម្លាំងប្រដាប់អាវុធ ព្រះសង្ឃ និងប្រជាពលរដ្ឋទូទាំងខេត្តបន្ទាយមានជ័យ ថ្នាក់ដឹកនាំខេត្តបានលំឱនកាយវាចាចិត្ត ក្រាបបង្គំទូលថ្វាយនូវសព្ទសាធុការពរជ័យ បវរសួស្តី ក្នុងឱកាសដែលព្រះអង្គទ្រង់គម្រប់ព្រះជន្មាយុ ៧៣ យាងចូល ៧៤ ព្រះវស្សា នាថ្ងៃទី១៤ ខែឧសភា ឆ្នាំ២០២៦ ខាងមុខនេះ។

ក្នុងសារលិខិតនោះ បានរំលេចនូវក្តីប្រាថ្នាចង់ឃើញព្រះអង្គទ្រង់មានព្រះកាយពលមាំមួន និងព្រះបញ្ញាញាណភ្លឺថ្លា ដើម្បីបន្តគង់ប្រថាប់ជាស្មារតីឯកភាពជាតិ និងជាម្លប់ការពារបូរណភាពទឹកដី ដើរតាមព្រះរាជលំអានដ៏ឧត្តុង្គឧត្តមនៃ «ព្រះបរមរតនកោដ្ឋ»។
លើសពីការថ្វាយព្រះពរ រដ្ឋបាលខេត្តក៏បានសម្តែងនូវកតញ្ញូកតវេទិតាធម៌យ៉ាងជ្រាលជ្រៅចំពោះ «ស្នាព្រះហស្ថដ៏វិសេសវិសាល» របស់ព្រះអង្គ ដែលតែងតែយកព្រះទ័យទុកដាក់ ក្នុងការជួយដោះស្រាយទុក្ខលំបាក និងកាត់បន្ថយភាពក្រីក្ររបស់ប្រជារាស្ត្រ។ ព្រះរាជទានព្រះរាជទ្រព្យ ដើម្បីរួមចំណែកកសាងសមិទ្ធផលសង្គម និងការអភិវឌ្ឍជាតិលើគ្រប់វិស័យ។ ភាពជាគំរូក្នុងនាមជាមហាក្សត្រដែលនៅកៀកកិតជាមួយរាស្ត្រគ្រប់កាលៈទេសៈ។
ជាទីបញ្ចប់នៃសារលិខិត ថ្នាក់ដឹកនាំ និងប្រជាពលរដ្ឋខេត្តបន្ទាយមានជ័យ បានលើកហត្ថប្រណម្យបួងសួងដល់បារមីព្រះរតនត្រ័យ ទេវតាថែរក្សាព្រះមហស្វេតច្ឆត្រ ដួងព្រះវិញ្ញាណក្ខន្ធអតីតព្រះមហាក្សត្រគ្រប់ព្រះអង្គ ជាពិសេសទេវតាឆ្នាំថ្មី ព្រះនាម រាក្យសាទេវី សូមព្រះអង្គតាមជួយបីបាច់ថែរក្សាអភិបាលប្រោះព្រំពរជ័យថ្វាយព្រះករុណាជាអម្ចាស់ជីវិតលើត្បូង សូមទ្រង់ប្រកបដោយព្រះពុទ្ធពរបួនប្រការគឺអាយុ វណ្ណៈ សុខៈ និងពលៈ ជានិច្ចនិរន្តរ៍តរៀងទៅ។ ទូលព្រះបង្គំជាខ្ញុំទាំងអស់គ្នា សូមព្រះមេត្តាទទួលនូវភក្តីភាពដ៏ស្មោះស្ម័គ្របំផុត ពីទឹកដីខេត្តបន្ទាយមានជ័យ៕

ដោយឈុនសារ៉ាត