AKP សៀមរាបថ្ងៃទី០៨ ខែឧសភាព ឆ្នាំ ២០២៦– អនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប ដែលដឹកនាំដោយ លោក លី សារី អភិបាលរងខេត្តសៀមរាបនៅព្រឹកថ្ងៃទី៨ ខែឧសភា ឆ្នាំ២០២៦នេះ បានចុះធ្វើការណែនាំ អប់រំផ្សព្វផ្សាយច្បាប់ ស្ដីពីចរាចរណ៍ផ្លូវគោក ចែកជូននូវខិតបណ្ណ សៀវភៅច្បាប់ ស្តីពីចរាចរណ៍ផ្លូវគោក ខិត្តបណ្ណជំនួយស្មារតីក្នុងក្រុងសៀមរាប ព្រមទាំងបានចែកមួកការពារសុវត្ថិភាពដែលជាការឧបត្ថម្ភរបស់ក្រុមហ៊ុន ហ្គែនប៊ឺក(Ganzberg)ចំនួន១០០០មួកជូនដល់បងប្អូនប្រជាពលរដ្ឋនិងអ្នកបើកបរម៉ូតូដែលមិនបានពាក់មួក រួមជាមួយការអប់រំអំពីសុវត្ថិភាព។ 

លោក លី សារី អភិបាលរងខេត្តសៀមរាប បានមានប្រសាសន៍ថា ការចុះអប់រំផ្សព្វផ្សាយនាពេលនេះ គឺដើម្បីពញ្ញាក់ស្មារតីដល់អ្នកប្រើប្រាស់ផ្លូវទាំងឡាយឱ្យយល់ដឹងអំពីផលប៉ះពាល់នៃគ្រោះថ្នាក់ចរាចរណ៍ និងត្រូវយកចិត្តទុកដាក់គោរពច្បាប់ស្តីពីចរាចរណ៍ផ្លូវគោកឱ្យបានខ្ជាប់ខ្ជួនសំដៅ រួមគ្នាកាត់បន្ថយគ្រោះថ្នាក់ចរាចរណ៍ឱ្យមកនៅកម្រិតទាប ដែលនេះគឺជាផ្នែកមួយដ៏សំខាន់ ដើម្បីឈានទៅចូលរួមលុបបំបាត់សកម្មភាពអនាធិបតេយ្យនៃការធ្វើចរាចរណ៍តាមដងផ្លូវសាធារណៈ និងជំរុញការអនុវត្តច្បាប់ឱ្យទទួលបានលទ្ធផលជាវិជ្ជមាន។ 
លោកអភិបាលរងខេត្តបានបន្ថែមថា យុទ្ធនាការចែកមួកសុវត្ថិភាពដល់ប្រជាពលរដ្ឋធ្វើដំណើរតាមដងផ្លូវ គឺជាសកម្មភាពសង្គមដ៏សំខាន់មួយ ដើម្បីកាត់បន្ថយអត្រាគ្រោះថ្នាក់ចរាចរណ៍ និងលើកកម្ពស់ការយល់ដឹងអំពីច្បាប់ចរាចរណ៍នៅកម្ពុជា។ហើយសកម្មភាពទាំងនេះមានគោលដៅសំខាន់ក្នុងការការពារអាយុជីវិត និងកាត់បន្ថយការរងរបួសក្បាលធ្ងន់ធ្ងរនៅពេលមានគ្រោះថ្នាក់ចរាចរណ៍៕

ដោយ៖ ឃុត សៅ