AKP ភ្នំពេញ ថ្ងៃទី0៨ ខែឧសភា ឆ្នាំ២០២៦--នាមជ្ឈមណ្ឌលជាតិរក្សាសន្តិភាព នាព្រឹកថ្ងៃទី៨ ខែឧសភា ឆ្នាំ២០២៦នេះ លោកជំទាវ កុសល ម៉ាលីនដា អគ្គនាយករងមជ្ឈមណ្ឌលជាតិរក្សាសន្តិភាព តំណាង ឯកឧត្តម ឧត្តមសេនីយ៍ទោ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាពបានជួបពិភាក្សាការងារជាមួយលោកស្រី Eunice Mwaniki មន្ត្រីសម្របសម្រួលអង្គការសហប្រជាជាតិ សម្រាប់សម្របសម្រួលការដឹកជញ្ជូនសម្ភារៈ និងកងកម្លាំងកម្ពុជាទៅកាន់តំបន់បេសកកម្ម UNIFIL អំឡុងពេលប្តូរវេន។

ក្នុងជំនួបនោះ លោកជំទាវ កុសល ម៉ាលីនដា ក្នុងនាម ឯកឧត្តម ឧត្តមសេនីយ៍ទោ សែម រតនា បានថ្លែងអំណរគុណចំពោះមន្ត្រីសម្របសម្រួលអង្គការសហប្រជាជាតិ សម្រាប់សម្របសម្រួលការដឹកជញ្ជូន
សម្ភារៈ និងកងកម្លាំងកម្ពុជាទៅកាន់តំបន់បេសកកម្ម UNIFIL អំឡុងពេលប្តូរវេនទៅកាន់ប្រទេសលីបង់ ទាំងការចល័តទៅ និងចល័តមក ក្នុងនោះលោកស្រី Eunice Mwaniki ក្នុងនាមជាមន្ត្រីសម្របសម្រួល សម្រាប់សម្របសម្រួលការដឹកជញ្ជូន បានជួយធ្វើឱ្យការដឹកជញ្ជូនប្រព្រឹត្តទៅដោយរលូនទៅតាមផែនការកំណត់។

ជាការឆ្លើយតប លោកស្រី Eunice Mwaniki បានគូសបញ្ជាក់ថា ក្នុងនាមជាអ្នកសម្របសម្រួលអង្គការសហប្រជាជាតិ សម្រាប់សម្របសម្រួលការដឹកជញ្ជូនសម្ភារៈ និងកងកម្លាំងកម្ពុជាទៅកាន់តំបន់បេស កកម្ម UNIFIL អំឡុងពេលប្តូរវេន លោកស្រីពិតជាបានយកចិត្តទុកដាក់ក្នុងការធ្វើឱ្យកិច្ចការមួយនេះអាចដំណើរការទៅបានដោយរលូន ដើម្បីជាការលើកទឹកចិត្តដល់កងកម្លាំងបំពេញបេសកកម្មក្រោមឆ័ត្រអង្គការសហប្រជាជាតិ។ ជាមួយគ្នានេះ លោកស្រីក៏បានសម្តែងនូវការកោតសរសើរចំពោះកងកម្លាំងរក្សាសន្តិភាពដែលទៅពីប្រទេសកម្ពុជាថា ពិតជាមានស្នាដៃការងារល្អប្រសើរ និងទទួលបានទំនុកចិត្តខ្ពស់ពីអង្គការសហប្រជាជាតិ។

សូមជម្រាបផងដែរថា ចាប់ពីឆ្នាំ២០០៦មក កម្ពុជាបានបញ្ជូនកងកម្លាំងចូលរួមបេសកកម្មរក្សាសន្តិភាពនៅតាមបណ្តាប្រទេសដែលហែកហួរដោយសារសង្គ្រាម ដោយផ្តើមចេញពីបេសកកម្ម UNMIS, United Nations Mission in Sudan ដោយកងអនុសេនាធំបោសសម្អាតមីនលេខ១៣៥ មានចំនួន ១៣៥នាក់ ហើយរហូតមកដល់បច្ចុប្បន្ននេះ កម្ពុជាបានបញ្ជូនកងកម្លាំងរក្សាសន្តិភាពនៃកងយោធពលខេមរភូមិន្ទចំនួន ១០,៤៤០នាក់ (នារី ៩៨៨នាក់)នៅប្រទេសចំនួន១០ លើជំនាញបោសសម្អាតមីន រាជអាវុធហត្ថ មន្ទីរពេទ្យកម្រិត២ កម្ទេចគ្រាប់មិនទាន់ផ្ទុះ វិស្វកម្មព្រលានយន្តហោះ វិស្វកម្មសំណង់ផ្ដេក-បញ្ឈរ នាយទាហានសេនាធិការ និងសង្កេតការណ៍យោធាក្នុងបុព្វហេតុរក្សាសន្តិភាពនៅក្នុងសកលលោក៕

ដោយ ចាន់ សុភឿន