AKP បន្ទាយមានជ័យ ថ្ងៃទី០៤ ខែឧសភា ឆ្នាំ២០២៦-- ក្នុងស្មារតីយកចិត្តទុកដាក់ខ្ពស់លើសុខទុក្ខ និងការរស់នៅរបស់ប្រជាពលរដ្ឋ នៅព្រឹកថ្ងៃទី០៤ ខែឧសភា ឆ្នាំ២០២៦នេះ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ និងជាប្រធានក្រុមការងារចុះមូលដ្ឋានក្រុងសិរីសោភ័ណ បានដឹកនាំក្រុមការងារ និងអាជ្ញាធរពាក់ព័ន្ធ ចុះសួរសុខទុក្ខ និងនាំយកអំណោយសង្គ្រោះបន្ទាន់ជូនដល់គ្រួសាររងគ្រោះដោយខ្យល់កន្ត្រាក់ជាង ៥០ខ្នងផ្ទះ ស្ថិតក្នុងសង្កាត់ម្កាក់ ក្រុងសិរីសោភ័ណ។

បន្ទាប់ពីមានគ្រោះធម្មជាតិខ្យល់កន្ត្រាក់បោកបក់យ៉ាងខ្លាំងកាលពីល្ងាចថ្ងៃទី០៣ ខែឧសភា ដែលបណ្តាលឱ្យផ្ទះសម្បែងប្រជាពលរដ្ឋរងការខូចខាតយ៉ាងដំណំ ឯកឧត្តមអភិបាលខេត្តបានបង្ហាញវត្តមានភ្លាមៗដើម្បីជាបង្អែកផ្លូវចិត្តដល់ជនរងគ្រោះ។ ក្នុងឱកាសនោះ ឯកឧត្តម និងលោកជំទាវ បានឧបត្ថម្ភស័ង្កសីជាង៧០០សន្លឹក ដើម្បីជួយជួសជុលដំបូលផ្ទះដែលរងការខូចខាតឡើងវិញឱ្យបានឆាប់រហ័ស។

ថ្លែងទៅកាន់បងប្អូនប្រជាពលរដ្ឋទាំងក្តីរំជួលចិត្ត ឯកឧត្តម អ៊ុ រាត្រី បានសម្តែងនូវការសោកស្តាយយ៉ាងជ្រាលជ្រៅចំពោះការបាត់បង់ទ្រព្យសម្បត្តិ និងជម្រកស្នាក់នៅ។ ឯកឧត្តមបានបញ្ជាក់ថា "ទោះបីគ្រោះធម្មជាតិមិនអាចទាយទុកជាមុនបាន ប៉ុន្តែការជួយសង្គ្រោះបងប្អូនគឺជាភារកិច្ចចម្បងបំផុតរបស់យើង។ អាជ្ញាធរនឹងនៅក្បែរបងប្អូនជានិច្ច មិនទុកឱ្យបងប្អូនណាម្នាក់រងគ្រោះដោយគ្មានជម្រក ឬខ្វះស្បៀងអាហារឡើយ។"

ទន្ទឹមនឹងនេះ ឯកឧត្តមក៏បានអំពាវនាវឱ្យពលរដ្ឋបង្កើនការប្រុងប្រយ័ត្នខ្ពស់ចំពោះបាតុភូតធម្មជាតិដែលកំពុងប្រែប្រួលខ្លាំង ត្រូវស្វែងរកជម្រកដែលមានសុវត្ថិភាពភ្លាមៗ ពេលមានភ្លៀងខ្យល់ខ្លាំង។ បិទឧបករណ៍អគ្គិសនី និងប្រុងប្រយ័ត្នចំពោះផ្គរ រន្ទះ ដើម្បីការពារអាយុជីវិត។

មិនត្រឹមតែនាំយកសម្ភារប៉ុណ្ណោះទេ បច្ចុប្បន្នកម្លាំងចម្រុះ រួមមានអាជ្ញាធរមូលដ្ឋាន និងកងកម្លាំងប្រដាប់អាវុធ ក្រោមការបញ្ជាផ្ទាល់ពីឯកឧត្តមអភិបាលខេត្ត កំពុងសម្រុកចុះជួយរុះរើ និងប្រក់ដំបូលផ្ទះជូនពលរដ្ឋឡើងវិញយ៉ាងសស្រាក់សស្រាំ។ ក្រៅពីស័ង្កសី ក្រុមការងារក៏បានបន្តនាំយកស្បៀងអាហារ គ្រឿងឧបភោគបរិភោគ និងថវិកាមួយចំនួន ចែកជូនដល់គ្រួសាររងគ្រោះដទៃទៀតជាបន្តបន្ទាប់ ដើម្បីសម្រាលទុក្ខលំបាក និងធានាឱ្យពួកគាត់អាចត្រឡប់មកមករស់នៅជាប្រក្រតីឡើងវិញក្នុងពេលដ៏ខ្លីខាងមុខនេះ៕

ដោយ ឈុន សារ៉ាត