AKP ភ្នំពេញ ថ្ងៃទី0៣ ខែឧសភា ឆ្នាំ២០២៦ --នៅសម័យសង្គ្រាម អ្នកសារព័ត៌មានបានរាយការណ៍អំពីការប្រយុទ្ធ ការរងទុក្ខរបស់ប្រជាជន និងការវិវត្តនៃប្រវត្តិសាស្ត្រ។ នៅសម័យសន្តិភាព អ្នកសារព័ត៌មានបន្តមានតួនាទីក្នុងការផ្តល់ព័ត៌មានត្រឹមត្រូវ បង្កើនការយល់ដឹងសាធារណៈ ជំរុញការទទួលខុសត្រូវ និងចូលរួមគាំទ្រដល់ការអភិវឌ្ឍសង្គម។ នេះគឺជាការលើកឡើងរបស់ឯកឧត្ដម នេត្រ ភក្រ្ដា រដ្ឋមន្រ្ដីក្រសួងព័ត៌មាន ក្នុងឱកាសទិវាសេរីភាពសារព័ត៌មានពិភពលោក ៣ ឧសភា ២០២៦និងការតាំងពិព័រណ៍រូបថត ស្តីពីតួនាទីអ្នកសារព័ត៌មាននៅកម្ពុជា ពីទសវត្សរ៍ឆ្នាំ១៩៧០ ដល់បច្ចុប្បន្ន នាព្រឹកថ្ងៃទី៣ ខែឧសភា ឆ្នាំ២០២៦ នៅទីស្ដីការក្រសួងព័ត៌មាន។

ឯកឧត្ដម នេត្រ ភក្រ្ដា មានប្រសសន៍ថា ក្នុងទិវាសេរីភាពសារព័ត៌មាននេះដែរ យើងក៏បានរៀបចំការតាំងពិព័រណ៍រូបថត ស្តីពីតួនាទី និងសកម្មភាពរបស់អ្នកសារព័ត៌មាននៅកម្ពុជា ពីទសវត្សរ៍ឆ្នាំ១៩៧០ ដល់ពេលបច្ចុប្បន្ន នៅសួនច្បារជ័យមង្គលព័ត៌មាន ដែលស្ថិតនៅក្នុងបរិវេណក្រសួងព័ត៌មាន។ ឯកឧត្ដមបានបញ្ជាក់ថា ការតាំងពិព័រណ៍នេះ គឺជាការឆ្លុះបញ្ចាំងពីជ្រុងមួយនៃដំណើរកម្ពុជា ក្នុងរយៈពេល ៥៦ ឆ្នាំ ដែលអ្នកសារព័ត៌មានបានចូលរួមកត់ត្រា រាយការណ៍ និងនាំយករឿងរ៉ាវរបស់កម្ពុជាទៅកាន់សាធារណជន និងពិភពលោក។ ឯកឧត្ដមរដ្ឋមន្រ្ដីបានបន្ដថា រូបថតនីមួយៗដែលបានដាក់តាំង មិនមែនជារូបភាពធម្មតានោះទេ រូបថតទាំងនេះ គឺជាកំណត់ត្រានៃពេលវេលា ជាសាក្សីនៃប្រវត្តិសាស្ត្រ និងជាភស្តុតាងនៃសេចក្តីក្លាហានរបស់អ្នកសារព័ត៌មាន។ រូបថតទាំងនេះនាំយើងឱ្យឃើញទាំងអតីតកាលដ៏ឈឺចាប់ ការប្រឈមរបស់អ្នកសារព័ត៌មាននៅជួរមុខ និងការបន្តរីកចម្រើននៃវិស័យសារព័ត៌មាននៅកម្ពុជានាពេលបច្ចុប្បន្ន។

ជាមួយគ្នានេះ ឯកឧត្ដមរដ្ឋមន្រ្ដីបានថ្លែងបញ្ជាក់ថា ការតាំងពិព័រណ៍រូបថតនេះ ក៏ជាការរម្លឹកថា សារព័ត៌មានមានតួនាទីដ៏សំខាន់ក្នុងសង្គម។ ឯកឧត្ដមបានសង្កត់ធ្ងន់ថា តាមរយៈការតាំងពិព័រណ៍នេះ យើងចង់ផ្ញើសារមួយយ៉ាងច្បាស់ថា «កម្ពុជាមិនភ្លេចអ្នកដែលបានចូលរួមកត់ត្រាប្រវត្តិសាស្ត្ររបស់ខ្លួនឡើយ។ យើងមិនភ្លេចអ្នកសារព័ត៌មានដែលបានបង្ហាញពិភពលោកឱ្យឃើញពីការឈឺចាប់ ការតស៊ូ និងក្តីសង្ឃឹមរបស់ប្រជាជនកម្ពុជា។ យើងក៏មិនភ្លេចថា សន្តិភាពដែលយើងមានសព្វថ្ងៃ មានតម្លៃខ្ពស់ ហើយត្រូវការការថែរក្សា ការពារ និងលើកតម្កើងជារៀងរាល់ថ្ងៃ»។ ឯកឧត្ដមរដ្ឋមន្រ្ដីបានឱ្យដឹងទៀតថា ដូច្នេះ សួនច្បារជ័យមង្គលព័ត៌មាន មិនត្រឹមតែជាទីតាំងសម្រាប់តាំងរូបថតប៉ុណ្ណោះទេ ប៉ុន្តែជាទីកន្លែងនៃការចងចាំ ការអប់រំ និងការគោរព។ វាជាកន្លែងដែលជំនាន់បច្ចុប្បន្ន និងជំនាន់ក្រោយ អាចរម្លឹកពីតម្លៃនៃសន្តិភាព តម្លៃនៃការពិត និងតម្លៃនៃវិជ្ជាជីវៈសារព័ត៌មាន។ «ការរម្លឹកនេះ មិនមែនគ្រាន់តែជាការមើលត្រឡប់ទៅអតីតកាលប៉ុណ្ណោះទេ។ វាជាការរម្លឹកដល់យើងទាំងអស់គ្នាថា សេរីភាពសារព័ត៌មានត្រូវតែដើរជាមួយទំនួលខុសត្រូវ វិជ្ជាជីវៈ សីលធម៌ និងការគោរពការពិត។ សង្គមមួយដែលមានព័ត៌មានត្រឹមត្រូវ គឺជាសង្គមមួយដែលមានមូលដ្ឋានរឹងមាំសម្រាប់សន្តិភាព ស្ថិរភាព និងការអភិវឌ្ឍប្រកបដោយចីរភាព។» នេះគឺជាការលើកឡើងបន្ថែមរបស់ឯកឧត្ដម នេត្រ ភក្រ្ដា រដ្ឋមន្រ្ដីក្រសួងព័ត៌មាន។
ក្នុងឱកាសនោះ ឯកឧត្ដម នេត្រ ភក្រ្ដា ក៏បានស្នើដល់គ្រប់ផ្នែកទាំងអស់ ត្រូវបន្តថែរក្សាសន្តិភាព ការពារសុវត្ថិភាពអ្នកសារព័ត៌មាន លើកកម្ពស់វិជ្ជាជីវៈសារព័ត៌មាន និងធានាថា អ្នកសារព័ត៌មានអាចបំពេញតួនាទីរបស់ខ្លួនដោយសុវត្ថិភាព ទំនួលខុសត្រូវ និងសេចក្តីថ្លៃថ្នូរ។ ឯកឧត្ដមរដ្ឋមន្រ្ដីអះអាងផងដែរថា៖ «នៅថ្ងៃនេះ យើងទាំងអស់គ្នាសូមឱនកាយវាចាចិត្តគោរពវិញ្ញាណក្ខន្ធអ្នកសារព័ត៌មានជាតិ និងអន្តរជាតិទាំងអស់ ដែលបានបាត់បង់ជីវិតក្នុងបេសកកម្មវិជ្ជាជីវៈរបស់ខ្លួននៅកម្ពុជា។ យើងខ្ញុំក៏សូមគោរពចំពោះអ្នកសារព័ត៌មានដែលបានរងរបួស ទាំងរាងកាយ និងផ្លូវចិត្ត ព្រមទាំងក្រុមគ្រួសាររបស់ពួកគេ ដែលបានទ្រាំទ្រនូវការឈឺចាប់ និងការបាត់បង់មិនអាចបំភ្លេចបាន»។

ឯកឧត្ដម នេត្រ ភក្រ្ដា រដ្ឋមន្រ្ដីក្រសួងព័ត៌មានក៏បានបញ្ជាក់បន្ថែមថា សូមឱ្យការលះបង់របស់អ្នកសារព័ត៌មានជាតិ និងអន្តរជាតិ ក្លាយជាមេរៀនដ៏មានតម្លៃសម្រាប់ជំនាន់បច្ចុប្បន្ន និងជំនាន់ក្រោយ។ សូមឱ្យយើងចងចាំពួកគេ មិនត្រឹមតែជាអ្នកយកព័ត៌មានប៉ុណ្ណោះទេ ប៉ុន្តែជាសាក្សីនៃប្រវត្តិសាស្ត្រ ជាអ្នកការពារការពិត និងជាផ្នែកមួយនៃដំណើរកម្ពុជា ពីអតីតកាល មកកាន់បច្ចុប្បន្ន និងឆ្ពោះទៅអនាគត។ ឯកឧត្ដមរដ្ឋមន្រ្ដីបានបន្ថែមទៀតថា៖ «យើងទាំងអស់គ្នាសូមគោរពវិញ្ញាណក្ខន្ធអ្នកសារព័ត៌មានទាំងអស់ ដែលបានពលីជីវិត សូមគោរពចំពោះអ្នកសារព័ត៌មានដែលបានរងរបួស។ សូមឱ្យការចងចាំរបស់ពួកគេរស់នៅជានិច្ចក្នុងប្រវត្តិសាស្ត្រកម្ពុជានិងបេះដូងរបស់យើងទាំងអស់គ្នា»៕

ដោយ៖ រិទ្ធី រូបថត៖ ខឹម សុវណ្ណារ៉ា