AKP កែប ថ្ងៃទី០១ ខែឧសភា ឆ្នាំ២០២៦--ឯកឧត្តម សោម កុសល អនុរដ្ឋលេខាធិការក្រសួងព័ត៌មាន ទទួលបន្ទុកមន្ទីរព័ត៌មានខេត្តកែប - កំពត បានអញ្ជើញជាអធិបតីភាព ក្នុងកិច្ចប្រជុំបូកសរុបលទ្ធផលការងារប្រចាំត្រីមាសទី១ និងលើកទិសដៅអនុវត្តការងារបន្ត របស់មន្ទីរព័ត៌មានខេត្តកែប កាលពីរសៀលថ្ងៃទី៣០ ខែមេសា ឆ្នាំ២០២៦ នៅសាលប្រជុំមន្ទីរព័ត៌មានខេត្តកែប ដោយមានការចូលរួមពីថ្នាក់ដឹកនាំ និងមន្រ្តីពាក់ព័ន្ធជាច្រើនរូប។ 

ក្នុងឱកាសនោះ ឯកឧត្តម សោម កុសល ក៏បានកោតសរសើរដល់មន្ទីរព័ត៌មានខេត្តកែប ដែលបានខិតខំបំពេញតួនាទីភារកិច្ចយ៉ាងសកម្ម និងសម្រេចបានលទ្ធផលល្អ ក្នុងរយៈពេល៣ខែកន្លងមកនេះ ពិសេសក្នុងការផលិត និងផ្សព្វផ្សាយព័ត៌មានពាក់ព័ន្ធនឹងសកម្មភាព និងសមិទ្ធផលនានារបស់រដ្ឋបាលខេត្ត។ 

ជាមួយគ្នានោះ ឯកឧត្តមបានមានប្រសាសន៍ណែនាំ និងជំរុញឱ្យមន្ទីរព័ត៌មានខេត្ត បន្តខិតខំបន្ថែមទៀត ក្នុងការបង្កើនការផលិត និងផ្សព្វផ្សាយព័ត៌មាន ពាក់ព័ន្ធនឹងសមិទ្ធផលនានា ដែលរដ្ឋបាលខេត្តសម្រេចបានឱ្យបានទូលំទូលាយដល់មហាជន ពិសេសតាមបណ្តាញឌីជីថល និងបណ្តាញសង្គម ដើម្បីធានាថាព័ត៌មានផ្លូវការ មានភាពឆាប់រហ័ស ត្រឹមត្រូវ និងទាន់ពេលវេលា។ 

ឯកឧត្តមបានបញ្ជាក់ថា មន្ទីរព័ត៌មានត្រូវបន្តពង្រឹងតួនាទីជាសេនាធិការសំខាន់របស់រដ្ឋបាលខេត្ត ក្នុងការសម្របសម្រួល និងផ្សព្វផ្សាយគោលនយោបាយ សកម្មភាព និងសមិទ្ធផលនានាក្នុងខេត្ត ដល់ប្រជាពលរដ្ឋ ដោយអនុវត្តការងារជាសកម្ម បុរេសកម្ម មានប្រសិទ្ធភាព និងប្រសិទ្ធផល ស្របតាមទិសស្លោករបស់ក្រសួងព័ត៌មាន។ 

ទន្ទឹមនឹងនោះ ឯកឧត្តមក៏បានលើកឡើងពីសារៈសំខាន់នៃការគ្រប់គ្រងព័ត៌មាន និងសាធារណមតិ ដោយជំរុញឱ្យក្រុមការងារពាក់ព័ន្ធ តាមដាន វិភាគ និងឆ្លើយតបនឹងមតិសាធារណៈឱ្យបានទាន់ពេលវេលា ព្រមទាំងពង្រឹងការផ្សព្វផ្សាយព័ត៌មានពិត ដើម្បីបង្ការ និងបន្សាបព័ត៌មានក្លែងក្លាយ ដែលអាចប៉ះពាល់ដល់សង្គម។ 

បន្ថែមពីនេះ ឯកឧត្តមបានណែនាំឱ្យមន្រ្តីបន្តពង្រឹងសមត្ថភាពវិជ្ជាជីវៈ សារព័ត៌មាន និងបច្ចេកទេស ដោយផ្តោតលើការសរសេរព័ត៌មានឱ្យមានគុណភាព ការថតរូប និងវីដេអូឱ្យមានស្តង់ដារ ព្រមទាំងការប្រើប្រាស់បច្ចេកវិទ្យាថ្មីៗ ដើម្បីផ្សព្វផ្សាយឱ្យកាន់តែមានប្រសិទ្ធភាព។ 

ជាចុងក្រោយ ឯកឧត្តមបានលើកទឹកចិត្តឱ្យមានការចែករំលែកបទពិសោធន៍ និងចំណេះដឹងរវាងមន្រ្តីគ្នាទៅវិញទៅមក ដោយអនុវត្តតាមទ្រឹស្តី «អ្នកចេះច្រើនបង្រៀនអ្នកចេះតិច» ដើម្បីធ្វើឱ្យសមត្ថភាពការងាររួមរបស់អង្គភាព កាន់តែរឹងមាំ និងល្អប្រសើរ ក្នុងនោះផងដែរ ឯកឧត្តម ក៍បានផ្តល់អាវយឺតមួយចំនួនជួនដល់មន្ត្រីរាជការនៃមន្ទីរព័ត៌មាន សម្រាប់ចុះបំពេញការខាងក្រៅផងដែរ៕

ដោយ សេស សង់