AKPបន្ទាយមានជ័ថ្ងៃទី៣០  ខែមេសាឆ្នាំ២០២៦ -- ក្តីសង្ឃឹម និងស្នាមញញឹមបានលេច ឡើងជាថ្មីលើទឹកមុខរបស់បងប្អូនប្រជាពលរដ្ឋភៀសសឹកប្រមាណ ៣,០០០គ្រួសារ ដែលកំពុងស្នាក់នៅបណ្តោះអាសន្ន (ផ្ទះអតីតយុទ្ធជន) ក្នុងភូមិស្លក្រាមឃុំស្លក្រាមស្រុកស្វាយចេកខេត្តបន្ទាយមានជ័យ បន្ទាប់ពីទទួលបានអំណោយជាប្រព័ន្ធចម្រោះទឹកស្អាត និងសម្ភារៈស្តុកទឹកសម្រាប់ប្រើប្រាស់ប្រចាំថ្ងៃ។

កាលពីរសៀលថ្ងៃទី២៩ ខែមេសា ឆ្នាំ២០២៦ លោក ឃ្លោក នួយ អភិបាល រងខេត្តបន្ទាយមានជ័យ តំណាងឱ្យ ឯកឧត្តម អ៊ុ រាត្រី អភិបាល ខេត្ត បានអញ្ជើញជាអធិបតីក្នុងពិធីទទួលស្ថានីយចម្រោះទឹកស្អាតចំនួន ២កន្លែង និងធុងទឹកចំណុះ ៥,០០០លីត្រ ចំនួន ២០ធុង ដែលជាអំណោយពីក្រុមហ៊ុន BOOSTRONG។

     
កន្លងមក រដ្ឋបាលខេត្តក៏ធ្លាប់បានទទួលប្រព័ន្ធចម្រោះទឹកស្អាតដែលជាបច្ចេក វិទ្យាខ្ពស់ពីក្រុមហ៊ុន ប្រេងកូឡា និងប្រេងខ្យល់ ២៤ កក្កដា ដែលមានសមត្ថភាពផលិតទឹកស្អាតបានរហូតដល់ ៧០០ លីត្រក្នុងមួយម៉ោង។ ការបន្ថែមស្ថានីយថ្មីពីក្រុមហ៊ុន BOOSTRONG នៅពេលនេះ គឺជាការពង្រឹងសមត្ថភាពផ្គត់ផ្គង់ឱ្យកាន់តែឆ្លើយតបទៅនឹងតម្រូវការជាក់ស្តែងរបស់ពលរដ្ឋក្នុងតំបន់។

      
លោក ឃ្លោក នួយ បានគូសបញ្ជាក់ពីសារៈសំខាន់នៃសមិទ្ធផលនេះថាការផ្ដល់ជូនប្រព័ន្ធចម្រោះទឹកស្អាតនាពេលនេះ មិនត្រឹមតែជួយឱ្យបងប្អូនភៀសសឹក និងសិស្សានុសិស្សមានទឹកស្អាតបរិភោគប៉ុណ្ណោះទេ ប៉ុន្តែគឺជាយុទ្ធសាស្ត្របង្ការជំងឺតម្កាត់ និងជួយកាត់បន្ថយចំណាយប្រចាំថ្ងៃលើការទិញទឹក ដែលជាបន្ទុកសេដ្ឋកិច្ចគ្រួសារយ៉ាងសំខាន់។

    
ក្រៅពីការដោះស្រាយបញ្ហាទឹកស្អាតចំពោះមុខ លោកអភិបាលរងខេត្តបានបង្ហើបពីផែនការមេរបស់រាជរដ្ឋាភិបាល និងរដ្ឋបាលខេត្ត ក្នុងការប្រែក្លាយតំបន់ស្នាក់នៅបណ្ដោះអាសន្ននេះ ឱ្យទៅជាសហគមន៍ដែលមានស្ថិរភាពតាមរយៈ ការពង្រីកបណ្ដាញផ្លូវ ទឹកស្អាត អគ្គិសនី និងសាលារៀនឱ្យកាន់តែកៀកពលរដ្ឋ។
សន្តិសុខស្បៀង រៀបចំដីកសិកម្មសម្រា ប់គ្រួសារនីមួយៗ ដើម្បីជំរុញការដាំដុះ និងចិញ្ចឹមសត្វ។ឯករាជ្យភាពផ្នែកសេដ្ឋកិច្ច បង្កើតឱកាសការងារ និងប្រាក់ចំណូលក្នុងសហគមន៍ ដើម្បីឱ្យបងប្អូនអាចរស់នៅដោយពឹងផ្អែកលើសមត្ថភាពខ្លួនឯង។

   
ក្នុងឱកាសនោះ លោកអភិបាលរងបានថ្លែងអំណរគុណយ៉ាងជ្រាលជ្រៅដល់ លោក សុខ គឹមនិតតា ប្រធានក្រុមហ៊ុនប្រេងកូឡា និងប្រេងខ្យល់ ២៤ កក្កដា និងក្រុមហ៊ុន BOOSTRONG ដែលបានបរិច្ចាគធនធានផ្ទាល់ខ្លួនជួយសង្គម។ ជាមួយគ្នានេះ លោកបានដាស់តឿនពលរដ្ឋឱ្យរួមគ្នាថែរក្សាសមិទ្ធផលទាំងនេះ និងត្រូវអនុវត្តវិធានការអនាម័យ «រស់នៅស្អាត ហូបស្អាត ផឹកស្អាត» ជាប្រចាំ។

     
ជាកិច្ចឆ្លើយតប បងប្អូនប្រជាពលរដ្ឋភៀសសឹកបានសម្តែងនូវក្តីរំភើបរីករាយជាខ្លាំង ដោយពួកគាត់បានបញ្ជាក់ថា អំណោយទាំងនេះគឺជាដង្ហើមដ៏សំខាន់សម្រាប់ជីវភាពប្រចាំថ្ងៃ និងបង្ហាញថាថ្នាក់ដឹកនាំមិនដែលបោះបង់ពួកគាត់ចោលក្នុងគ្រាលំបាកឡើយ៕

ដោយ ៖ឈុនសារ៉ាត