AKP កំពង់ឆ្នាំង ថ្ងៃទី២៩ ខែមេសា ឆ្នាំ២០២៦-- ឯកឧត្តម ស៊ុន សុវណ្ណារិទ្ធ អភិបាលខេត្តកំពង់ឆ្នាំង បានដាក់ចេញនូវទិសដៅសំខាន់ៗ នៅក្នុងកិច្ចប្រជុំគណៈបញ្ជាការឯកភាពរបស់រដ្ឋបាលខេត្ត កាលពីថ្ងៃទី២៨ ខែមេសា ឆ្នាំ២៩២៦ នៅសាលប្រជុំសាលាខេត្តកំពង់ឆ្នាំង។ កិច្ចប្រជុំនេះមានការអញ្ជើញចូលរួមពីឯកឧត្ដម ស៊ីវ រុន ប្រធានក្រុមប្រឹក្សាខេត្ត នាយករដ្ឋបាល ស្នងការ ស្នងការរង មេបញ្ជាការ មេបញ្ជាការរងកងកម្លាំង អភិបាលក្រុង ស្រុក ប្រធានមន្ទីរ អង្គភាព នាយកទីចាត់ការ និងអង្គភាពពាក់ព័ន្ធជាច្រើននាក់ផងដែរ។

ថ្លែងក្នុងឱកាសនោះ ឯកឧត្តម ស៊ុន សុវណ្ណារិទ្ធិ បានមានប្រសាសន៍ថា ដើម្បីឆ្លុះបញ្ចាំងអំពីសកម្មភាពការងារ ពិសេសការងារសន្តិសុខសណ្ដាប់ធ្នាប់សង្គម ដោយបានលើកយកកំណត់ហេតុច្បាស់លាស់ឱ្យដឹងថា ខែមុនមានបញ្ហាអ្វីខ្លះដែលមិនទាន់បានដោះស្រាយជូនប្រជាពលរដ្ឋ និងការងារបន្ទាប់ គឺមានសារៈសំខាន់ដែលយើងទាំងអស់គ្នាត្រូវចូលរួមដោះស្រាយបន្ទាន់ ដែលក្នុងនោះគឺបញ្ហាគ្រឿងញៀន ក្មេងទំនើង គ្រោះថ្នាក់ចរាចរណ៍ ការផ្ដល់សេវាសាធារណៈជូនប្រជាពលរដ្ឋ និងការជំរុញផ្ដល់បណ្ណកម្មសិទ្ធិបង្កាន់ដៃផ្សេងៗជូនប្រជាពលរដ្ឋ ឱ្យមានតម្លាភាព និងប្រសិទ្ធភាព។

ទន្ទឹមនឹងនេះឯកឧត្តមបានបន្តថា គ្រប់សាលារៀនក្នុងខេត្តទាំងអស់ ផ្ដល់ការអប់រំណែនាំបន្ថែមអំពីបញ្ហាគ្រោះថ្នាក់ចរាចរណ៍ឱ្យបានច្រើនជាមួយកម្មពិធីសិក្សាតាមសាលារៀនថ្នាក់ខេត្តរហូតដល់ថ្នាក់ស្រុក។ បង្ក្រាបល្បែងស៊ីសងដែលច្បាប់ហាមឃាត់ មេប៉ុស្តិ៍ មេឃុំត្រូវទទួលខុសត្រូវជាមួយស្រុក-ក្រុង។ ហើយក្រុង-ស្រុកត្រូវទទួលខុសត្រូវជាមួយខេត្ត និងស្នងការខេត្ត។ ចំណែកខេត្តត្រូវទទួលខុសត្រូវចំពោះមុខរាជរដ្ឋាភិបាល។ ការបង្ក្រាបបទល្មើសនេសាទខុសច្បាប់ត្រូវតែដឹកនាំបង្ក្រាបឱ្យអស់។ ត្រូវយកចិត្តទុកដាក់បន្តអនុវត្តគោលនយោបាយភូមិឃុំមានសុវត្ថិភាព អភិបាលក្រុងស្រុកត្រូវពង្រឹងប៉ុស្តិ៍រដ្ឋបាល មេឃុំ ចៅសង្កាត់ ប្រជាការពារ និងមេភូមិត្រូវមានប៉ុស្តិ៍ប្រចាំការ២៤ម៉ោងនៅតាមគោលដៅ ដោយរៀបចំទំនាក់ទំនងគ្នាតាមវិទ្យុទាក់ទងគ្រប់មូលដ្ឋាន ដើម្បីក្តាប់សភាពការណ៍ និងសហការគ្នាបង្ក្រាបបទល្មើសឱ្យបានទាន់ពេលវេលា។ 

ក្នុងបរិបទនេះដែរ ឯកឧត្តមអភិបាលខេត្ត បានគូសបញ្ជាក់ទៀតថា ត្រូវបន្ដការថែរក្សាបរិស្ថាន និងសម្បត្តិធម្មជាតិឱ្យបានល្អ ដែលជាសក្ដានុពលទេសចរណ៍ នៅក្នុងខេត្តរបស់យើង និងរៀបចំរមណីយដ្ឋានធម្មជាតិ មានបរិស្ថានស្អាតជានិច្ច និងសូមកុំឱ្យមានការកាប់បំផ្លាញព្រៃឈើ សម្បត្តិធម្មជាតិ ការឆក់ត្រី នេសាទខុសច្បាប់ បរបាញ់សត្វព្រៃខុសច្បាប់ ត្រូវរៀបចំផែនការត្រៀមដោះស្រាយគ្រោះមហន្តរាយដោយកំណត់ឱ្យថ្នាក់ឃុំ-សង្កាត់ ជាពិសេសគណៈបញ្ជាការក្រុងស្រុក ទទួលនិងផ្ដល់ព័ត៌មានឱ្យបានឆាប់ និងសង្គ្រោះបន្ទាន់នូវករណីចាំបាច់។ ទប់ស្កាត់រាល់ករណីពាក់ព័ន្ធនឹងសកម្មភាពខុសច្បាប់ រួមទាំងការបោកប្រាស់តាមបច្ចេកវិទ្យា វាជាផ្នែកសំខាន់នៃយុទ្ធសាស្ត្ររបស់រាជរដ្ឋាភិបាលក្នុងការពង្រឹងសន្តិសុខសាធារណៈ និងទប់ស្កាត់បណ្តាញឧក្រិដ្ឋកម្ម គឺជាផ្នែកមួយនៃសកម្មភាពអនុវត្តច្បាប់យ៉ាងទូលំទូលាយ ដើម្បីបង្ក្រាបក្រុមឆបោកតាមប្រព័ន្ធបច្ចេកវិទ្យា(Online Scams)ឱ្យមានប្រសិទ្ធិភាព៕

ដោយ បៃ ស៊ីថុន