AKP ភ្នំពេញ ថ្ងៃទី ២៣ ខែមេសា ឆ្នាំ២០២៦-- ថ្លែងបើកកិច្ចប្រជុំស្តីពីការរៀបចំសេចក្តីព្រាងគោលការណ៍ណែនាំស្តីពីការរាយការណ៍ព័ត៌មានសំដៅធានាលើកកម្ពស់សិទ្ធិស្ត្រី កុមារ និងក្រុមជនងាយរងគ្រោះ នៅព្រះរាជាណាចក្រកម្ពុជា ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានមានប្រសាសន៍ថា ក្រសួងព័ត៌មាន និងស្ថាប័នពាក់ព័ន្ធ បាននិងកំពុងបន្តរៀបចំលិខិតបទដ្ឋាន វិធាន គោលការណ៍ណែនាំ និងឯកសារគតិយុត្តតាមជំហានជាបន្តបន្ទាប់លើការបន្តលើកកម្ពស់សិទ្ធិ និងសេរីភាពខាងសារព័ត៌មាន តាមរយៈយន្តការជាក់លាក់នានា ពិសេសការពង្រឹងសមត្ថភាព និងប្រសិទ្ធភាពសារព័ត៌មាន ដើម្បីគាំទ្រការអនុវត្តន៍ការងាររបស់អ្នកសារព័ត៌មាននៅទូទាំងប្រទេសឱ្យមានសណ្តាប់ធ្នាប់ និងវិជ្ជាជីវៈ លើកកម្ពស់សិទ្ធិកុមារ ស្ត្រី ជនងាយរងគ្រោះ និងការអភិវឌ្ឍន៍សង្គម សេដ្ឋកិច្ចកម្ពុជា។ 

ឯកឧត្តមបានបន្តថា ផ្អែកតាមរបាយការណ៍វឌ្ឍនភាពការងារ ចាប់តាំងពីដើមឆ្នាំ២០២៦មក ក្រុមការងារបានទទួលនូវគោលការណ៍ណែនាំដ៏ខ្ពង់ខ្ពស់ពី ឯកឧត្តម នេត្រ ភក្រ្តា រដ្ឋមន្ត្រីក្រសួងព័ត៌មាន ក្នុងការរៀបចំឱ្យមានក្របខណ្ឌកិច្ចសហប្រតិបត្តិការជាផ្លូវការជាមួយបណ្ដាក្រសួង-ស្ថាប័នរដ្ឋ និងដៃគូអភិវឌ្ឍន៍អន្តរជាតិចំនួន ៥។ កិច្ចខិតខំប្រឹងប្រែងនេះ ធ្វើឡើងក្នុងគោលបំណងកសាងនូវយន្តការរួមមួយ ដែលមានសុគតភាពរវាងស្ថាប័នរដ្ឋ និងអង្គការអន្តរជាតិ ក្នុងការគ្រប់គ្រង និងតម្រង់ទិសការផ្សព្វផ្សាយព័ត៌មាន។

ជាមួយគ្នានេះដែរ ឯកឧត្តមបានវាយតម្លៃខ្ពស់ចំពោះកិច្ចសហការបានយ៉ាងល្អក្នុងក្របខណ្ឌបច្ចេកទេសអន្តរស្ថាប័ន និងអង្គការអន្តរជាតិដៃគូរួមមាន អង្គការ Plan International Cambodia, Save the Children Cambodia, World Vision International, UNICEF Cambodia និង អង្គការ Care  ក្នុងការផ្លាស់ប្តូរធាតុចូលរវាងអ្នកជំនាញនៃក្រសួងព័ត៌មាន និងតំណាងមកពីស្ថាប័នដៃគូ ដើម្បីធានាបាននូវតម្លាភាព និងប្រសិទ្ធភាពការងារ។

សូមបញ្ជាក់ផងដែរថា ការរៀបចំគោលការណ៍ណែនាំស្តីពីការរាយការណ៍ព័ត៌មាននេះ ជាការបន្តកិច្ចខិតខំប្រឹងប្រែងក្នុងក្របខណ្ឌនៃបេសកកម្មក្នុងអាណត្តិទី៧របស់ក្រសួងព័ត៌មាន ដែលដឹកនាំដោយ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងនោះរាប់បញ្ចូលទាំងការបន្តលើកកម្ពស់ភាពជាដៃគូជាមួយគ្រប់តួអង្គទាំងអស់នៅក្នុងវិស័យព័ត៌មាន និងសោតទស្សន៍ សំដៅអភិវឌ្ឍ ដើម្បីពង្រឹងគុណភាព ប្រសិទ្ធភាពប្រព័ន្ធផ្សព្វផ្សាយនៅកម្ពុជាឱ្យកាន់តែល្អប្រសើរ។ តាមរយៈកិច្ចសហប្រតិបត្តិការដ៏រឹងមាំរវាងក្រសួងព័ត៌មាន និងដៃគូពាក់ព័ន្ធទាំងអស់នេះនឹងនាំមកនូវរបត់ថ្មីមួយក្នុងវិស័យសារព័ត៌មាននៅកម្ពុជា ដែលមិនត្រឹមតែផ្ដោតលើការផ្តល់ព័ត៌មានលឿនរហ័សប៉ុណ្ណោះទេ ប៉ុន្តែថែមទាំងជាការផ្សព្វផ្សាយប្រកបដោយវិជ្ជាជីវៈ និងការទទួលខុសត្រូវខ្ពស់ចំពោះមុខច្បាប់ និងសង្គមជាតិទាំងមូលផងដែរ៕ 

ដោយ ទូច វលក័្ខណ(រូបថត៖ឡុង ដេវិត)