AKP បន្ទាយមានជ័យ ថ្ងៃទី២៣ ខែមេសា ឆ្នាំ២០២៦--ដើម្បីលើកកម្ពស់កម្រិតជីវភាព និងពង្រឹងសេដ្ឋកិច្ចគ្រួសារជូនដល់បងប្អូនប្រជាពលរដ្ឋភៀសសឹកដែលកំពុងស្នាក់នៅបណ្ដោះអាសន្ន រដ្ឋបាលខេត្តបន្ទាយមានជ័យ បានចាប់ដៃគូជាមួយអង្គការសាម៉ារីតាន់ភឺស (Samaritan’s Purse) ចុះសិក្សា និងសម្ភាសន៍ផ្ទាល់ជាមួយគ្រួសារគោលដៅ ដើម្បីរៀបចំគម្រោងគាំទ្រផ្នែកកសិកម្ម និងការចិញ្ចឹមសត្វ។

កិច្ចពិភាក្សាការងារនេះបានធ្វើឡើងកាលពីរសៀលថ្ងៃទី២២ ខែមេសា ឆ្នាំ២០២៦ ក្រោមអធិបតីភាព លោក ឃ្លោក នួយ អភិបាលរងខេត្តបន្ទាយមានជ័យ តំណាងឯកឧត្តម អ៊ុំ រាត្រី អភិបាលនៃគណៈអភិបាលខេត្ត រួមជាមួយក្រុមការងារបច្ចេកទេសរបស់អង្គការសាម៉ារីតាន់ភឺសផងដែរ។

ក្នុងជំនួបនេះ លោក ឃ្លោក នួយ បានបញ្ជាក់ថា គោលដៅចម្បងនៃកិច្ចសហការនេះ គឺការចុះសម្ភាសន៍ និងវាយតម្លៃស្ថានភាពជាក់ស្តែងរបស់ប្រជាពលរដ្ឋចំនួន ៥៣២គ្រួសារ ដែលកំពុងស្នាក់នៅបណ្ដោះអាសន្ន (ក្នុងផ្ទះអតីតយុទ្ធជន) ស្ថិតក្នុងភូមិស្លក្រាម ឃុំស្លក្រាម ស្រុកស្វាយចេក។ ការចុះប្រមូលទិន្នន័យនេះ ធ្វើឡើងក្នុងគោលបំណងស្វែងយល់ពីលទ្ធភាព និងចំណង់ចំណូលចិត្តរបស់ពួកគាត់ ក្នុងវិស័យកសិកម្មខ្នាតតូច រួមមាន ការចិញ្ចឹមសត្វ មាន់ និងពពែ។ការចិញ្ចឹមសត្វល្អិត ចង្រិត និងការដាំដុះការបណ្ដុះផ្សិត។

លោកអភិបាលរងខេត្តបានសង្កត់ធ្ងន់ថា ការផ្តល់ជំនួយត្រឹមស្បៀងអាហារមិនមែនជាដំណោះស្រាយយូរអង្វែងឡើយ អ្វីដែលសំខាន់គឺការផ្តល់ "បច្ចេកទេស និងមុខរបរ" ដើម្បីឱ្យពួកគាត់អាចបង្កើតចំណូលដោយខ្លួនឯងបាន។ លោកបានបន្តថា ការជ្រើសរើសយកមុខរបរចិញ្ចឹមមាន់ ពពែ ចង្រិត និងបណ្ដុះផ្សិត គឺជាជម្រើសដ៏ឆ្លាតវៃ ព្រោះវាប្រើប្រាស់ដើមទុនតិច ផ្ទៃដីតូច និងមានទីផ្សារក្នុងស្រុកខ្ពស់ ដែលស័ក្តិសមបំផុតសម្រាប់បងប្អូនដែលកំពុងស្នាក់នៅបណ្ដោះអាសន្ន។

តាមរយៈគម្រោងនេះ រដ្ឋបាលខេត្តសង្ឃឹមយ៉ាងមុតមាំថា ប្រជាពលរដ្ឋដែលរងគ្រោះដោយសារការភៀសសឹក ពីការឈ្លានពានពីសំណាក់ភាគីថៃមកលើដែនអធិបតេយ្យកម្ពុជាដែលពួកគាត់មិនទាន់បានត្រឡប់ទៅភូមិឋានវិញនឹងមានឱកាសកែប្រែជីវភាពតាមរយៈការចេះជំនាញច្បាស់លាស់។ បន្ទាប់ពីការសម្ភាសន៍ចប់សព្វគ្រប់ ក្រុមការងារនឹងកំណត់យកគ្រួសារដែលមានសក្តានុពល ដើម្បីផ្តល់វគ្គបណ្តុះបណ្តាលបច្ចេកទេស និងសម្ភារៈឧបត្ថម្ភសម្រាប់ចាប់ផ្តើមមុខរបរ។

គួរបញ្ជាក់ផងដែរថា សកម្មភាពនេះបានឆ្លុះបញ្ចាំងពីការយកចិត្តទុកដាក់ខ្ពស់របស់រដ្ឋបាលខេត្តបន្ទាយមានជ័យ ក្នុងការមិនបោះបង់ពលរដ្ឋណាម្នាក់ចោលឡើយ ជាពិសេសការខិតខំស្វែងរកដៃគូអភិវឌ្ឍន៍នានា ដើម្បីនាំយកមកនូវអត្ថប្រយោជន៍ផ្ទាល់ជូនដល់សហគមន៍ដែលកំពុងជួបការលំបាកឱ្យមានស្ថិរភាពសេដ្ឋកិច្ចឡើងវិញ៕

ដោយ ឈុន សារ៉ាត