AKP ភ្នំពេញ ថ្ងៃទី២៣ ខែមេសា ឆ្នាំ២០២៦-- ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានមានប្រសាសន៍ក្នុងចំណោមប្រធានមន្ទីរសុខាភិបាលរាជធានីខេត្តថា «សុខភាពរបស់ប្រជាជន អាស្រ័យមួយចំណែកធំលើភាពជាអ្នកដឹកនាំរបស់បងប្អូនប្រធានមន្ទីរសុខាភិបាលរាជធានីខេត្តយើងនេះហើយ»។

ឆ្លៀតឱកាសក្រោយការប្រារព្ធទិវាជាតិប្រយុទ្ធនឹងជំងឺគ្រុនចាញ់កាលពីថ្ងៃទី២២ ខែមេសា ឆ្នាំ២០២៦ ឯកឧត្តមរដ្ឋមន្រ្តីក្រសួងសុខាភិបាល បានជួបសំណេះសំណាលជាមួយថ្នាក់ដឹកនាំសុខាភិបាលរាជធានីខេត្ត ដោយបានលើកឡើងថា ឯកឧត្តម លោកជំទាវ លោក លោកស្រី ប្រធានមន្ទីរសុខាភិបាលរាជធានីខេត្តទាំងអស់ គឺជាថ្នាក់ដឹកនាំជួរមុខនៃប្រព័ន្ធសុខាភិបាលរបស់ប្រទេសជាតិយើង។ ភាពជាអ្នកដឹកនាំ ការប្តេជ្ញាចិត្ត និងការធ្វើការជាក្រុមរបស់លោកអ្នក គឺមានសារៈសំខាន់បំផុត ក្នុងការនាំមកនូវសេវាសុខាភិបាលដែលមានគុណភាព សមធម៌ គួរឱ្យទុកចិត្តបាន ជូនដល់ប្រជាពលរដ្ឋគ្រប់រូបនៅក្នុងខេត្តនីមួយៗរបស់ខ្លួន។

ទន្ទឹមនឹងនេះ ឯកឧត្តមសាស្ត្រាចារ្យរដ្ឋមន្ត្រីបានបន្ថែមទៀតថា “សូមបងប្អូនថ្នាក់ដឹកនាំយើង ធ្វើការដោយសាមគ្គីភាព ការទទួលខុសត្រូវ និងភាពច្នៃប្រឌិត ដើម្បីប្រែក្លាយចក្ខុវិស័យសុខាភិបាលជាតិ ទៅជាលទ្ធផលជាក់ស្តែងសម្រាប់ប្រជាជនក្នុងសហគមន៍។ យើងដើរឆ្ពោះទៅមុខដោយការតាំងចិត្ត និងមោទនភាព៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)