AKP ភ្នំពេញ ថ្ងៃទី២២ ខែមេសា ឆ្នាំ២០២៦--ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណយ៉ាងជ្រាលជ្រៅចំពោះការខិតខំប្រឹងប្រែងរបស់នាយិកានៃទីភ្នាក់ងារសហប្រតិបត្តិការអន្តរជាតិកូរ៉េ (KOICA) ក្នុងការគាំទ្រដល់ការអភិវឌ្ឍវិស័យអប់រំនៅកម្ពុជា ដោយបានចូលរួមចំណែកយ៉ាងសំខាន់ក្នុងការលើកកម្ពស់គុណភាពអប់រំ ការបណ្តុះបណ្តាលជំនាញបច្ចេកទេសវិជ្ជាជីវៈ និងការកែលម្អហេដ្ឋារចនាសម្ព័ន្ធអប់រំជាដើម។

ក្នុងជំនួបសម្តែងការគួរសម និងជម្រាបលារបស់លោកស្រី Moon Jung Choi នាយិកាប្រចាំប្រទេសកម្ពុជា នៃទីភ្នាក់ងារសហប្រតិបត្តិការអន្តរជាតិកូរ៉េ (KOICA) បន្ទាប់ពីការបញ្ចប់អាណត្តិបេសកកម្មការងាររបស់លោកស្រីនៅកម្ពុជា កាលពីរសៀលថ្ងៃទី២១ ខែមេសា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានកត់សម្គាល់ពីសារៈសំខាន់នៃបេសកកម្មរបស់លោកស្រី Moon Jung Choi ក្នុងការគាំទ្រដល់ការអភិវឌ្ឍវិស័យអប់រំ យុវជន និងកីឡានៅកម្ពុជា ដោយយកឱកាសនេះផងដែរ ក្រសួងអប់រំ យុវជន និងកីឡា បានបំពាក់គ្រឿងឥស្សរិយយសមុនីសារាភ័ណ្ឌ ថ្នាក់មហាសេរីវឌ្ឍន៍ជូនលោកស្រី ដើម្បីថ្លែងអំណរគុណ និងកោតសរសើរចំពោះការចូលរួមដ៏មានតម្លៃរបស់លោកស្រីក្នុងការគាំទ្រប្រទេសកម្ពុជា។

ជាមួយគ្នានេះ ឯកឧត្តមបណ្ឌិតសភាចារ្យ ឧបនាយករដ្ឋមន្រ្ដី ក៏បានជូនពរលោកស្រីទទួលបានជោគជ័យក្នុងភារកិច្ចថ្មី និងសម្រេចបានសមិទ្ធផលបន្ថែមទៀតនាពេលអនាគត ជាពិសេសក្នុងវិស័យអប់រំ ដែលជាមូលដ្ឋានសំខាន់សម្រាប់អភិវឌ្ឍធនធានមនុស្ស។

ជាការឆ្លើយតបលោកស្រី Moon Jung Choi បានសម្តែងក្តីសង្ឃឹមយ៉ាងមុតមាំថា KOICA និងក្រសួងអប់រំ យុវជន និងកីឡា នឹងបន្ដកិច្ចសហប្រតិបត្តិជាមួយគ្នាឱ្យកាន់តែរីកចម្រើន និងរឹងមាំបន្ថែមទៀតនាពេលអនាគត៕

ដោយ៖ ចាន់ សុភឿន (ប្រភព៖ ក្រសួងអប់រំ)