AKP សៀមរាប ថ្ងៃទី២០ ខែមេសា ឆ្នាំ២០២៦--ព្រះសង្ឃ អាចារ្យ គណៈកម្មការ វត្តប្រាសាទចន្ទរង្សី(ហៅវត្តគោកចាន់) ដែលស្ថិតនៅក្នុងភូមិគោកចាន់ ឃុំអំពិល ស្រុកប្រាសាទបាគង ខេត្តសៀមរាប រួមជាមួយអាជ្ញាធរមូលដ្ឋាន កាលពីរសៀលថ្ងៃទី១៩ ខែមេសា ឆ្នាំ២០២៦ បានប្រារព្ធធ្វើបុណ្យផ្កាប្រាក់សាមគ្គី និងពិធីស្រង់ព្រះដើម្បីប្រមូលបច្ច័យយកមកកសាងខ្លោងទ្វារវត្ត។

ព្រះធម្មាធម្មានុរ័ក្ខញាណ ស៊ុម ពិសិទ្ធិ ព្រះសមុហ៍គណខេត្ត និងជាព្រះចៅអធិការវត្តគោកចាន់បានមានថេរដីកាថា បុណ្យផ្កាប្រាក់សាមគ្គី គឺជាបុណ្យប្រពៃណីព្រះពុទ្ធសាសនាដ៏មានសារៈសំខាន់ ដែលប្រជាពលរដ្ឋខ្មែរតែងតែប្រារព្ធធ្វើឡើងដើម្បីបង្ហាញពីការសាមគ្គីភាពប្រមូលថវិកា (ផ្កាប្រាក់) ពីពុទ្ធបរិស័ទជិតឆ្ងាយ ដើម្បីកសាងសមិទ្ធផលនានា ក្នុងវត្តអារាម ព្រមទាំងជួយទ្រទ្រង់កិច្ចការសង្គមផ្សេងៗ ដោយបុណ្យនេះបង្ហាញពីសាមគ្គីភាពរវាងព្រះសង្ឃ អាជ្ញាធរមូលដ្ឋាន និងពុទ្ធបរិស័ទ ចំណុះជើងវត្ត ដែលរួមគ្នាបរិច្ចាគថវិកា តាមសទ្ធាជ្រះថ្លា និងកសាងបុណ្យកុសលរួមគ្នាផងដែរ។

ព្រះធម្មាធម្មានុរ័ក្ខញាណ ស៊ុម ពិសិទ្ធិ បានមានថេរដីកាបន្តថា តាមជំនឿព្រះពុទ្ធសាសនា ខ្មែរយើងជឿថា ការបរិច្ចាគទ្រព្យធនដើម្បីប្រយោជន៍រួម និងប្រយោជន៍សាសនា គឺជាការសន្សំកុសលផលបុណ្យសម្រាប់ជាតិមុខ និងដើម្បីសេចក្តីសុខក្នុងជាតិនេះ។

ជាមួយនេះដែរ វត្តគោកចាន់ ក៏ធ្វើពិធីស្រង់ព្រះ ដែលជាការឆ្លងឆ្នាំចាស់ចូលឆ្នាំថ្មី ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដើម្បីសុំខមាទោសចំពោះកំហុសឆ្គង និងទទួលពរជ័យសិរីសួស្តីពីព្រះសង្ឃ។ ហើយការស្រង់ព្រះ គឺការលាងសម្អាតកាយ វាចា ចិត្ត ឱ្យស្អាតបរិសុទ្ធ តាមរយៈការស្រោចទឹក ឬទឹកអប់ផ្កាភ្ញីទៅលើព្រះពុទ្ធរូប និងព្រះសង្ឃ។ ហើយការស្រង់ព្រះពុទ្ធរូប គឺដើម្បីសម្តែងនូវការគោរពដ៏ខ្ពង់ខ្ពស់ចំពោះព្រះពុទ្ធសាសនា ដែលជាបង្គោលស្មារតីរបស់ខ្មែរ។ដោយជឿថា ការស្រោចស្រពទឹកអប់ផ្កាឈូកលើព្រះពុទ្ធរូប នឹងជួយឱ្យត្រជាក់ត្រជុំ មានសេចក្តីសុខ និងចម្រើនរុងរឿង៕

ដោយ ឃុត សៅ