AKP បន្ទាយមានជ័យ ថ្ងៃទី២០ ខែមរសា ឆ្នាំ២០២៦--ក្នុងស្មារតីសង្គ្រោះបន្ទាន់ និងមិនទុកឱ្យពលរដ្ឋណាម្នាក់រងគ្រោះដោយឯកោ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត បានដឹកនាំក្រុមការងារចុះសួរសុខទុក្ខ និងចែកអំណោយមនុស្សធម៌ជូនដល់ពលរដ្ឋចំនួន១៦៧គ្រួសារ ដែលរងគ្រោះដោយខ្យល់កន្ត្រាក់ ក្នុងឃុំចំនួន៣ នៃស្រុកអូរជ្រៅ កាលពីថ្ងៃទី១៩ ខែមេសា ឆ្នាំ២០២៦។

ក្នុងឱកាសជួបសំណេះសំណាលផ្ទាល់ជាមួយគ្រួសាររងគ្រោះមកពីឃុំអូរបីជាន់ ឃុំកូប និងឃុំសំរោង ឯកឧត្តម អ៊ុំ រាត្រី បានពាំនាំនូវប្រសាសន៍ផ្ដាំផ្ញើសួរសុខទុក្ខប្រកបដោយសេចក្ដីអាណិតអាសូរក្រៃលែងពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។

ឯកឧត្តមបានលើកឡើងថា"សម្តេចកិត្តិព្រឹទ្ធបណ្ឌិត តែងតែគិតគូរជាប់ជានិច្ចនូវសុខទុក្ខ និងជីវភាពរស់នៅរបស់បងប្អូនប្រជាពលរដ្ឋដែលជួបការលំបាក មិនថា ស្ថិតក្នុងកាលៈទេសៈណានោះឡើយ។ គោលការណ៍គ្រឹះរបស់កាកបាទក្រហម គឺនៅក្បែរបងប្អូនគ្រប់ទីកន្លែង និងមិនទុកឱ្យនរណាម្នាក់ស្លាប់ដោយគ្មានអាហារទទួលទាននោះទេ"។

សកម្មភាពនេះ ក៏មានការអញ្ជើញចូលរួមពី លោកជំទាវ នួម សុភ័ណ អនុប្រធានកិត្តិយសសាខាខេត្ត, ឯកឧត្ដម ឃឹម ហ្វីណង់អនុរដ្ឋលេខាធិការក្រសួងកសិកម្មរុក្ខាប្រមាញ់ និងនេសាទ ប្រធានក្រុមការងារចុះមូលដ្ឋានស្រុកអូរជ្រៅ ព្រមទាំងក្រុមការងារអនុសាខាស្រុក និងអាជ្ញាធរពាក់ព័ន្ធយ៉ាងច្រើនកុះករ។

ការផ្តល់ជំនួយសង្គ្រោះ គ្រួសាររងគ្រោះទាំង ១៦៧គ្រួសារ ក្នុងម្នាក់ៗទទួលបានអំណោយរួមមាន៖អង្ករ ២៥ គីឡូក្រាម,មី ២៥ កញ្ចប់, ទឹកស៊ីអ៊ីវ ១ យួរ និងទឹកត្រី ១ យួរ ថវិកាលើកទឹកចិត្តមួយចំនួន។

ទន្ទឹមនឹងការផ្តល់អំណោយ ឯកឧត្តមអភិបាលខេត្ត ក៏បានក្រើនរម្លឹកដល់បងប្អូនប្រជាពលរដ្ឋទាំងអស់ ឱ្យបង្កើនការប្រុងប្រយ័ត្នខ្ពស់ចំពោះស្ថានភាពអាកាសធាតុដែលប្រែប្រួលខ្លាំង។ ឯកឧត្តមបានបញ្ជាក់ថា នៅពេលមានភ្លៀងធ្លាក់លាយឡំដោយខ្យល់កន្ត្រាក់ ផ្គរ រន្ទះ សូមបងប្អូនប្រញាប់រកកន្លែងដែលមានសុវត្ថិភាពជម្រក ដើម្បីជៀសវាងគ្រោះថ្នាក់ដល់ជីវិត និងទ្រព្យសម្បត្តិ។

យោងតាមរបាយការណ៍បឋម ក្នុងសប្តាហ៍ទី៣ នៃខែមេសា ឆ្នាំ២០២៦ នេះ គ្រោះធម្មជាតិខ្យល់កន្ត្រាក់បានបង្កការខូចខាតយ៉ាងធ្ងន់ធ្ងរដល់ផ្ទះសម្បែងរបស់ប្រជាពលរដ្ឋប្រមាណជាង ៦០០ខ្នង គ្របដណ្តប់លើក្រុង-ស្រុកចំនួន ៦ និងឃុំចំនួន ៩ ក្នុងខេត្តបន្ទាយមានជ័យ។បច្ចុប្បន្នអាជ្ញាធរមូលដ្ឋាន និងកងកម្លាំងប្រដាប់អាវុធ ក្រោមការបញ្ជាផ្ទាល់ពីឯកឧត្តម អ៊ុំ រាត្រី កំពុងសម្រុកចុះជួយជួសជុលផ្ទះជូនពលរដ្ឋឡើងវិញ និងបន្តនាំយកស្បៀងអាហារ សម្ភារប្រើប្រាស់ ព្រមទាំងថវិកាទៅចែកជូនដល់គ្រួសារដែលរងគ្រោះដទៃទៀតជាបន្តបន្ទាប់ ដើម្បីធានាបាននូវការរស់នៅសមរម្យឡើងវិញក្នុងពេលឆាប់ៗ៕

ដោយ ឈុន សារ៉ាត