AKP បន្ទាយមានជ័យ ថ្ងៃទី២០ ខែមេសា ឆ្នាំ២០២៦--ក្នុងស្មារតីបុរេសកម្ម និងយកចិត្តទុកដាក់ខ្ពស់លើសុខទុក្ខរបស់ប្រជាពលរដ្ឋ ឯកឧត្តម ទេសរដ្ឋមន្ត្រី គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយបានអញ្ជើញចុះជួបសំណេះសំណាល និងពិនិត្យស្ថានភាពផ្ទះសម្បែងរបស់បងប្អូនភៀសសឹកក្នុងស្រុកស្វាយចេកដែលរងផលប៉ះពាល់ដោយសារគ្រោះធម្មជាតិ ក្នុងភូមិសាស្ត្រខេត្តបន្ទាយមានជ័យ កាលពីរសៀលថ្ងៃទី១៩ ខែមេសា ឆ្នាំ២០២៦នេះ។

យោងតាមរបាយការណ៍បឋម គ្រោះធម្មជាតិភ្លៀងលាយឡំនឹងខ្យល់កន្ត្រាក់ក្នុងសប្តាហ៍ទី៣ នៃខែមេសានេះ បានបង្កការខូចខាតយ៉ាងធ្ងន់ធ្ងរដល់ផ្ទះសម្បែងរបស់ប្រជាពលរដ្ឋប្រមាណជាង ៦០០ខ្នងគ្របដណ្តប់លើក្រុង-ស្រុកចំនួន ៦ និងឃុំចំនួន៩របស់ខេត្តបន្ទាយមានជ័យ។ ក្នុងនោះ ផ្ទះបណ្តោះអាសន្នរបស់បងប្អូនភៀសសឹកនៃសមាគមអតីតយុទ្ធជន និងនិវត្តជនកម្ពុជា ក៏បានរងការខូចខាតផ្នែកដំបូល និងជញ្ជាំងផងដែរ។

ក្នុងឱកាសចុះពិនិត្យដោយផ្ទាល់ ឯកឧត្តមទេសរដ្ឋមន្ត្រី បានដាក់ចេញនូវវិធានការសំខាន់ៗដោយណែនាំឱ្យអាជ្ញាធរខេត្ត និងក្រុមការងារបច្ចេកទេស ចុះវាយតម្លៃការខូចខាតជាក់ស្តែង និងធ្វើការជួសជុលជូនបងប្អូនឱ្យបានទាន់ពេលវេលា។ជំរុញឱ្យបន្តពន្លឿនការសាងសង់ផ្ទះថ្មីដែលកំពុងដំណើរការ ដើម្បីធានាថាបងប្អូនមានជម្រកសមរម្យ និងសុវត្ថិភាពខ្ពស់ ចៀសផុតពីការគំរាមកំហែងនៃបម្រែបម្រួលអាកាសធាតុ។

ឯកឧត្តមទេសរដ្ឋមន្ត្រីបានសម្តែងនូវការកោតសរសើរយ៉ាងជ្រាលជ្រៅចំពោះបងប្អូនពលរដ្ឋភៀសសឹក ដែលមានការយោគយល់ និងផ្តល់កិច្ចសហការយ៉ាងល្អជាមួយអាជ្ញាធរមូលដ្ឋាន។ ឯកឧត្តមបានសង្កត់ធ្ងន់ថាការរាយការណ៍ព័ត៌មានបានរហ័សពីសំណាក់បងប្អូន គឺជាគន្លឹះដ៏សំខាន់ដែលអនុញ្ញាតឱ្យក្រុមការងារអន្តរាគមន៍ និងដោះស្រាយបញ្ហាបានទាន់ពេលវេលា ស្របតាមគោលការណ៍ 'មិនទុកឱ្យនរណាម្នាក់រងគ្រោះដោយមិនបានដឹង'។

ក្រៅពីបញ្ហាជម្រក ឯកឧត្តមទេសរដ្ឋមន្ត្រី ក៏បានចុះពិនិត្យដោយផ្ទាល់នូវសកម្មភាព ខួងអណ្តូងទឹកនៅក្នុងតំបន់ស្នាក់នៅរបស់បងប្អូនភៀសសឹកក្នុងឃុំស្លក្រាម ស្រុកស្វាយចេក។ ដោយយល់ឃើញថា ទឹកស្អាតគឺជាតម្រូវការចាំបាច់បំផុតសម្រាប់សុខភាព និងការរស់នៅប្រចាំថ្ងៃ ឯកឧត្តមបានជំរុញឱ្យក្រុមការងារបច្ចេកទេសបង្កើនល្បឿនការងារ ដើម្បីឱ្យបងប្អូនមានទឹកប្រើប្រាស់បានគ្រប់គ្រាន់ និងជៀសវាងការខ្វះខាត។

សកម្មភាពរបស់ឯកឧត្តមទេសរដ្ឋមន្ត្រី គន់ គីម នាពេលនេះ បានបញ្ជាក់យ៉ាងច្បាស់នូវការប្តេជ្ញាចិត្តរបស់រាជរដ្ឋាភិបាល ក្នុងការនៅជាប់ជាមួយប្រជាពលរដ្ឋគ្រប់កាលៈទេសៈ ជាពិសេសក្នុងគ្រាដែលជួបគ្រោះធម្មជាតិ ដើម្បីធានានូវសុវត្ថិភាព និងលំនឹងជីវភាពរបស់បងប្អូនពលរដ្ឋភៀសសឹកឱ្យមានភាពប្រសើរឡើង៕

ដោយ ឈុន សារ៉ាត