AKP ភ្នំពេញ ថ្ងៃទី២០ ខែមេសា ឆ្នាំ២០២៦--នៅអំឡុងពេលមហាសន្និបាតលើកទី១៥២ នៃសហភាពអន្តរសភា (IPU) នៅប្រទេសតួគីយេ ឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភាកម្ពុជា បានជួបពិភាក្សាការងារទ្វេភាគីជាមួយ ឯកឧត្តម Numan Kurtulmuş ប្រធានរដ្ឋសភាតួគីយេ ដោយក្នុងកិច្ចសន្ទនានេះ ឯកឧត្តម Numan Kurtulmuş បានស្វាគមន៍ការចូលរួមរបស់គណៈប្រតិភូកម្ពុជាក្នុងមហាសន្និបាត IPU និងបានគូសបញ្ជាក់អំពីសារៈសំខាន់នៃការរក្សាទំនាក់ទំនងជាប្រចាំរវាងក្រុមមិត្តភាពសភានៃប្រទេសទាំងពីរ។ 

ក្នុងជំនួបនេះ ភាគីទាំងពីរបានលើកឡើងពីការរីកចម្រើននៃទំនាក់ទំនងសេដ្ឋកិច្ច ពាណិជ្ជកម្ម និងការតភ្ជាប់រវាងប្រជាជននៃប្រទេសទាំងពីរ រួមទាំងការហោះហើរត្រង់របស់ក្រុមហ៊ុន Turkish Airlines មកកាន់រាជធានីភ្នំពេញ ការផ្តល់អាហារូបករណ៍ដល់និស្សិតកម្ពុជា សកម្មភាពរបស់មជ្ឈមណ្ឌលវប្បធម៌ Yunus Emre និងការចូលរួមរបស់ទីភ្នាក់ងារ TİKA ក្នុងគម្រោងមនុស្សធម៌នៅកម្ពុជា។ ឯកឧត្តម អ៊ុច បូររិទ្ធ បានអបអរសាទររដ្ឋសភាតួគីយេ ចំពោះការរៀបចំមហាសន្និបាត IPU លើកទី១៥២ ប្រកបដោយជោគជ័យ និងបានថ្លែងអំណរគុណចំពោះបដិសណ្ឋារកិច្ចយ៉ាងកក់ក្តៅដែលបានផ្តល់ជូនគណៈប្រតិភូកម្ពុជា។ ឯកឧត្តមបានលើកឡើងពីសក្តានុពលនៃការពង្រឹងកិច្ចសហប្រតិបត្តិការរវាងស្ថាប័ននីតិប្បញ្ញត្តិនៃប្រទេសទាំងពីរ តាមរយៈក្រុមមិត្តភាពសភា និងការផ្លាស់ប្តូរទស្សនកិច្ចកម្រិតខ្ពស់។ 

ឯកឧត្តម អ៊ុច បូររិទ្ធ បានអញ្ជើញឯកឧត្តម Numan Kurtulmuş ចូលរួមកិច្ចប្រជុំប្រធានសភាអន្តរសភាលើកទី២ ដែលកម្ពុជាគ្រោងរៀបចំនៅពេលខាងមុខផងដែរ។

ដោយឡែកក្នុងជំនួបពិភាក្សាការងារទ្វេភាគីជាមួយ លោកជំទាវ Márta MÁTRAI អនុប្រធានទី១ រដ្ឋសភាហុងគ្រី ឯកឧត្តម អ៊ុច បូររិទ្ធ បានសម្តែងនូវការដឹងគុណចំពោះជំនួយឧបត្ថម្ភដ៏មានតម្លៃរបស់រដ្ឋាភិបាល និងប្រជាជនហុងគ្រីដល់កម្ពុជាក្រោយការរំដោះប្រទេសក្នុងឆ្នាំ១៩៧៩ ជាពិសេសលើវិស័យអប់រំ អាហារូបករណ៍ និងសុខាភិបាល និងបានបញ្ជាក់ថា កម្ពុជានឹងបន្តធ្វើការយ៉ាងជិតស្និទ្ធជាមួយហុងគ្រីក្នុងក្របខ័ណ្ឌនៃការទូតសភា ដើម្បីពង្រឹងមិត្តភាព និងជំរុញការអភិវឌ្ឍជាតិ។

ជាការឆ្លើយតប លោកជំទាវ Márta MÁTRAI បានលើកឡើងពីការរីកចម្រើននៃកិច្ចសហប្រតិបត្តិការលើវិស័យអប់រំ ជាពិសេសកម្មវិធី Stipendium Hungaricum ដែលនឹងផ្តល់អាហារូបករណ៍បន្ថែមរហូតដល់ ៣០កន្លែងសម្រាប់និស្សិតកម្ពុជា និងបានស្វាគមន៍អនុស្សរណៈនៃការយោគយល់ និងកិច្ចព្រមព្រៀងសហប្រតិបត្តិការរវាងអគ្គលេខាធិការដ្ឋានសភានៃប្រទេសទាំងពីរ ដែលត្រូវបានចុះហត្ថលេខាកន្លងមក ដោយចាត់ទុកថាវាជាមូលដ្ឋានសំខាន់សម្រាប់ការពង្រឹងកិច្ចសហប្រតិបត្តិការស្ថាប័នទៅមុខទៀត។

ក្នុងឱកាសនេះ អនុប្រធានទី១ព្រឹទ្ធសភាកម្ពុជាបានលើកឡើងពីសារៈសំខាន់នៃការពង្រឹងយន្តការក្រុមមិត្តភាពសភាកម្ពុជា ហុងគ្រី និងការចូលរួមរបស់ព្រឹទ្ធសភាកម្ពុជាក្នុងក្របខ័ណ្ឌកិច្ចសហប្រតិបត្តិការនេះ ដើម្បីជាឱកាសសម្រាប់ស្ថានប័នជាមិត្តទាំងពីរអាចធ្វើការផ្លាស់ប្តូរព័ត៌មាន ទស្សនៈ និងបទពិសោធន៍ជាប្រចាំ។ ភាគីទាំងពីរ ក៏បានបង្ហាញការយកចិត្តទុកដាក់ជាពិសេសចំពោះការប្រារព្ធខួបលើកទី៧០ នៃការបង្កើតទំនាក់ទំនងការទូតរវាងកម្ពុជា និងហុងគ្រីនៅឆ្នាំនេះ និងបានឯកភាពថា គួររៀបចំសកម្មភាពសមស្របនានា ដើម្បីអបអរសាទរឱកាសដ៏មានអត្ថន័យនេះ៕

ដោយ ចាន់ សុភឿន (ប្រភព៖ ព្រឹទ្ធសភា)