AKP ភ្នំពេញ ថ្ងៃទី១៨ ខែមេសា ឆ្នាំ២០២៦–ក្នុងឱកាសនៃមហាសន្និបាតលើកទី១៥២ នៃសហភាពអន្តរសភា (IPU) ទីក្រុងអ៊ីស្តង់ប៊ុល ប្រទេសតួគីយេកាលពីពេលថ្មីៗកន្លងទៅនេះ ឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភាកម្ពុជា បានជួបពិភាក្សាទ្វេភាគីជាមួយលោកជំទាវបណ្ឌិត សួនថូន សាយ៉ាចាក់ អនុប្រធានរដ្ឋសភា នៃសាធារណរដ្ឋប្រជាធិបតេយ្យប្រជាមានិតឡាវ និងជាប្រធានគណៈប្រតិភូសភាឡាវ ដោយភាគីទាំងពីរបានវាយតម្លៃខ្ពស់ចំពោះមិត្តភាពជាប្រពៃណី និងភាពជាអ្នកជិតខាងល្អរវាងកម្ពុជា និងឡាវ ហើយបានបញ្ជាក់សារជាថ្មីនូវការប្តេជ្ញាចិត្តក្នុងការបន្តពង្រឹងកិច្ចសហប្រតិបត្តិការរវាងស្ថាប័ននីតិប្បញ្ញត្តិទាំងពីរ រួមទាំងតាមរយៈការផ្លាស់ប្តូរទស្សនកិច្ច កិច្ចសន្ទនា ការចែករំលែកបទពិសោធន៍ និងកិច្ចសហការក្នុងក្របខ័ណ្ឌពហុភាគី។

ដោយឡែក ក្នុងជំនួបពិភាក្សាការងារជាមួយឯកឧត្តម Miklos Zoltan  ប្រធានគណៈប្រតិភូសភារូម៉ានី ភាគីទាំងពីរបានវាយតម្លៃខ្ពស់ចំពោះទំនាក់ទំនងយូរអង្វែង និងកិច្ចសហប្រតិបត្តិទ្វេភាគីដែលផ្តល់ផលប្រយោជន៍ឱ្យគ្នាទៅវិញទៅមក និងបានផ្លាស់ប្តូរយោបល់លើបញ្ហាក្នុងតំបន់ និងអន្តរជាតិ ដែលជាបញ្ហាប្រឈមរួម។  ភាគីទាំងពីរបានយល់ស្របគ្នាថា ប្រទេសទាំងពីរមានសក្តានុពលខ្លាំងក្នុងការលើកម្ពស់ទំនាក់ទំនងរវាងប្រទេស និងប្រជាជនទាំងពីរ តាមរយៈការជំរុញកិច្ចសហប្រតិបត្តិការនយោបាយ ពាណិជ្ជកម្ម វិនិយោគ ថាមពល ហេដ្ឋារចនាសម្ព័ន្ធ អប់រំ និងការងារ។ ភាគីទាំងពីរ ក៏បានឯកភាពពង្រឹងកិច្ចសហប្រតិបត្តិការរវាងស្ថាប័ននីតិបញ្ញត្តិនៃប្រទេសទាំងពីរ រួមមានតាមរយៈការផ្លាស់ប្តូរទស្សនកិច្ច កិច្ចសន្ទនា ការចែករំលែកបទពិសោធន៍ ការគាំទ្រគ្នាក្នុងការងារអន្តរសភា ការរៀបចំ និងចុះហត្ថលេខាលើអនុស្សរណៈនៃការយោគយល់គ្នាស្តីពីការពង្រឹងកិច្ចសហប្រតិបត្តិការសភា។

ចំពោះជំនួបពិភាក្សាការងារទ្វេភាគីជាមួយ ឯកឧត្តម Mohamed Ould Rachid ប្រធានសភាទីប្រឹក្សា នៃព្រះរាជាណាចក្រម៉ារ៉ុក ភាគីទាំងពីរបានប្តេជ្ញាបន្តពង្រឹងកិច្ចសន្ទនាសភា និងពង្រីកកិច្ចសហប្រតិបត្តិការទ្វេភាគីរវាងកម្ពុជា និងម៉ារ៉ុក និងបានបញ្ជាក់សារជាថ្មីនូវមិត្តភាពយូរអង្វែង និងការគោរពគ្នាទៅវិញទៅមករវាងព្រះរាជាណាចក្រទាំងពីរ ព្រមទាំងបានគូសបញ្ជាក់អំពីបំណងរួមក្នុងការបើកទិសដៅថ្មីៗនៃកិច្ចសហប្រតិបត្តិការ។ ភាគីទាំងពីរ ក៏បានលើកឡើងអំពីអត្ថន័យពិសេសនៃឆ្នាំ២០២៦ ដែលជាខួបលើកទី៣០ នៃការបង្កើតទំនាក់ទំនងការទូតរវាងប្រទេសទាំងពីរ ហើយបានផ្លាស់ប្តូរទស្សនៈអំពីមធ្យោបាយនានា ក្នុងការពង្រឹងការចូលរួមរវាងសភា ជំរុញការផ្លាស់ប្តូរទស្សនកិច្ច និងជំនាញ ព្រមទាំងពង្រឹងការសម្របសម្រួលនៅក្នុងវេទិកាសភាតំបន់ និងអន្តរជាតិ។ ក្នុងឱកាសនេះ ភាគីទាំងពីរបានចុះហត្ថលេខាលើអនុស្សរណៈនៃការយោគយល់ស្តីពីកិច្ចសហប្រតិបត្តិការសភារវាងព្រឹទ្ធសភាកម្ពុជា និងសភាទីប្រឹក្សានៃព្រះរាជាណាចក្រម៉ារ៉ុក ដែលជាចំណុចសំខាន់មួយក្នុងទំនាក់ទំនងទ្វេភាគី និងបើកទំព័រថ្មីនៃកិច្ចសហប្រតិបត្តិការរវាងស្ថាប័នទាំងពីរ៕

ដោយ៖ ចាន់ សុភឿន (ប្រភព៖ ព្រឹទ្ធសភា)