AKP ភ្នំពេញ ថ្ងៃទី១៨ ខែមេសា ឆ្នាំ២០២៦–ឯកឧត្តម ងី ច័ន្រ្ទផល ប្រធានគណៈកម្មការទី១ព្រឹទ្ធសភា នាថ្ងៃទី១៧ ខែមេសា ឆ្នាំ២០២៦ បានអញ្ជើញចូលរួមកិច្ចប្រជុំគណៈកម្មាធិការអចិន្ត្រៃយ៍ស្តីពីលទ្ធិប្រជាធិបតេយ្យ និងសិទ្ធិមនុស្ស នៃសហភាពអន្តរសភាពអន្តរសភា (IPU) ក្រោមប្រធានបទសំខាន់ស្តីពី «ការអភិវឌ្ឍសង្គមប្រកបដោយបរិយាបន្នសម្រាប់ទាំងអស់គ្នា៖ យុទ្ធសាស្ត្រសភាដើម្បីលើកកម្ពស់សិទ្ធិរបស់ប្រជាជនដែលកំពុងរស់នៅជាមួយពិការភាព» ដែលមានគណៈប្រតិភូសភាជាសមាជិក IPU ប្រហែល ៥០ប្រទេស រួមទាំងស្ថាប័ន និងអង្គការអន្តរសភាមួយចំនួនជាអ្នកសង្កេតការណ៍។ 

ថ្លែងក្នុងកិច្ចប្រជុំនេះ ឯកឧត្តម ងី ច័ន្ទ្រផល បានសង្កត់ធ្ងន់ថា ការអភិវឌ្ឍប្រកបដោយបរិយាបន្ន គឺជាតម្រូវការចាំបាច់ដើម្បីសម្រេចបាននូវការអភិវឌ្ឍប្រកបដោយចីរភាព ហើយសភាដើរតួនាទីយ៉ាងសំខាន់នៅក្នុងការជំរុញការសម្រេចបាននូវគោលបំណងរួមនេះ ដោយក្នុងនោះ សភាកម្ពុជាបានអនុម័តច្បាប់ដ៏សំខាន់ស្តីពីការការពារ និងលើកកម្ពស់សិទ្ធិជនពិការ។ ឯកឧត្តមបានគូសបញ្ជាក់ថា សន្តិភាព និងស្ថិរភាពគឺជាការចាំបាច់សម្រាប់កម្ពុជានៅក្នុងការជំរុញការអភិវឌ្ឍសង្គម៕

ដោយ៖ ចាន់ សុភឿន (ប្រភព៖ ព្រឹទ្ធសភា)