AKP ភ្នំពេញ ថ្ងៃទី០៨ ខែមេសា ឆ្នាំ២០២៦ -- កាលពីថ្ងៃអង្គារ ក្រុមប្រឹក្សាសន្តិសុខអង្គការសហប្រជាជាតិបានបរាជ័យក្នុងការអនុម័តសេចក្តីព្រាងសេចក្តីសម្រេចមួយ ដែល «លើកទឹកចិត្តយ៉ាងខ្លាំង» ដល់រដ្ឋដែលមានផលប្រយោជន៍ក្នុងការប្រើប្រាស់ផ្លូវសមុទ្រពាណិជ្ជកម្មនៅក្នុងច្រកសមុទ្រហ័រមុស ដើម្បីសម្របសម្រួលកិច្ចខិតខំប្រឹងប្រែងដែលមានលក្ខណៈការពារ ដើម្បីចូលរួមចំណែកក្នុងការធានាសុវត្ថិភាព និងសន្តិសុខនៃការធ្វើនាវាចរណ៍ឆ្លងកាត់ច្រកសមុទ្រហ័រមុស រួមទាំងតាមរយៈការអមដំណើរ និងនាវាពាណិជ្ជកម្មផងដែរ។

សមាជិកក្រុមប្រឹក្សាសន្តិសុខចំនួន ១១រូបបានបោះឆ្នោតគាំទ្រសេចក្តីព្រាងសេចក្តីសម្រេចនេះ ដោយប្រទេសចិន និងរុស្ស៊ីបានបោះឆ្នោតប្រឆាំងនឹងវា ខណៈដែលប្រទេសកូឡុំប៊ី និងប៉ាគីស្ថានបានបោះឆ្នោតអនុប្បវាទ។

សេចក្តីព្រាងសេចក្តីសម្រេចនេះត្រូវបានស្នើឡើងដោយប្រទេសបារ៉ែន ដោយសម្របសម្រួលជាមួយសមាជិកក្រុមប្រឹក្សាសហប្រតិបត្តិការឈូងសមុទ្រដទៃទៀត គឺប្រទេសគុយវ៉ែត អូម៉ង់ កាតា អារ៉ាប៊ីសាអូឌីត និងអារ៉ាប់រួម ក៏ដូចជាជាមួយប្រទេសហ្ស៊កដានីផងដែរ។

នៅក្នុងការពន្យល់របស់លោកអំពីការបោះឆ្នោតប្រឆាំងនោះ លោកហ្វូ កុង (Fu Cong) តំណាងអចិន្ត្រៃយ៍របស់ប្រទេសចិនប្រចាំអង្គការសហប្រជាជាតិ បាននិយាយថា សេចក្តីព្រាងសេចក្តីសម្រេចនេះបានបរាជ័យក្នុងការចាប់យកមូលហេតុឫសគល់ និងរូបភាពពេញលេញនៃជម្លោះតាមរបៀបដ៏ទូលំទូលាយ និងមានតុល្យភាព។

លោក ហ្វូ បាននិយាយថា «ក្រុមប្រឹក្សាសន្តិសុខមិនគួរប្រញាប់ប្រញាល់បោះឆ្នោតទៅលើសេចក្តីព្រាងសេចក្តីសម្រេចនោះទេ នៅពេលដែលកង្វល់ធ្ងន់ធ្ងរត្រូវបានលើកឡើងដោយសមាជិក»។

លោកបានសម្តែងក្តីសង្ឃឹមថា សន្តិភាព និងស្ថិរភាពនឹងត្រូវបានស្តារឡើងវិញ និងបានបញ្ជាក់ពីការប្តេជ្ញាចិត្តរបស់ប្រទេសចិនក្នុងការដោះស្រាយស្ថានការណ៍ឱ្យបានត្រឹមត្រូវ ដោយដោះស្រាយមូលហេតុឫសគល់របស់វា៕

ដោយ៖ យា ចិន្ដាខន្ដី (ប្រភព៖ ស៊ីនហួ)