AKP ភ្នំពេញ ថ្ងៃទី០៦ ខែមេសា ឆ្នាំ២០២៦ -- ការរីកចម្រើននៃបញ្ញាសិប្បនិម្មិត (AI) ទូទាំងពិភពលោក បានជំរុញសេដ្ឋកិច្ចនៅទូទាំងទ្វីបអាស៊ីដោយលើកកម្ពស់ក្រុមហ៊ុនផលិតបន្ទះឈីបកូរ៉េ ប្រតិបត្តិករមជ្ឈមណ្ឌលទិន្នន័យអាស៊ីអាគ្នេយ៍ ក្រុមហ៊ុនចាប់ផ្តើមអាជីវកម្ម AI របស់ចិន និងក្រុមហ៊ុនផលិតគ្រឿងបន្លាស់របស់ជប៉ុន។ នេះបើយោងតាមគេហទំព័រសារព័ត៌មាន ​​fortune.com។

ទស្សនាវដ្តីអាម៉េរិកបានសរសេរថា សូម្បីតែជម្លោះនៅមជ្ឈិមបូព៌ាដ៏អាក្រក់បំផុតក្នុងរយៈពេលជាច្រើនទសវត្សរ៍ក៏មិនធ្វើឱ្យអ្វីៗថយចុះដែរ ដោយបាននិយាយកាលពីពេលថ្មីៗនេះថា ក្រុមហ៊ុន Microsoft បានសន្យាថានឹងវិនិយោគទឹកប្រាក់ចំនួន ៥,៥ប៊ីលានដុល្លារអាម៉េរិកទៅលើហេដ្ឋារចនាសម្ព័ន្ធទិន្នន័យពពក និង AI នៅក្នុងប្រទេសសិង្ហបុរី និងបន្ថែម ១ប៊ីលានដុល្លារអាម៉េរិកទៅក្នុងប្រទេសថៃក្នុងរយៈពេលប៉ុន្មានឆ្នាំខាងមុខ។

នៅតំបន់អាស៊ីអាគ្នេយ៍ ការវិនិយោគបានផ្តោតសំខាន់ទៅលើការផ្គុំការផលិតដែលមានភាពជាក់លាក់ និងការផ្ទុកទិន្នន័យ ដែលផ្តល់នូវមូលដ្ឋានគ្រឹះដ៏រឹងមាំសម្រាប់ទាក់ទាញការវិនិយោគបន្ថែមទៀត ខណៈដែលក្រុមហ៊ុនបច្ចេកវិទ្យាសកលលោកកំពុងស្វែងរកទីតាំងជំនួស។

ទោះជាយ៉ាងណាក៏ដោយ ជម្លោះមជ្ឈិមបូព៌ាកំពុងដាក់សម្ពាធកាន់តែខ្លាំងឡើង។ តម្លៃថាមពល និងវត្ថុធាតុដើមខ្ពស់កំពុងជំរុញឱ្យថ្លៃដើមនៃការអភិវឌ្ឍហេដ្ឋារចនាសម្ព័ន្ធ AI កើនឡើង ចាប់ពីការផលិតបន្ទះឈីបរហូតដល់ប្រតិបត្តិការមជ្ឈមណ្ឌលទិន្នន័យ។ ក្រុមអ្នកជំនាញបានព្រមានថា ការចំណាយខ្ពស់សម្រាប់ថាមពល ការដឹកជញ្ជូន និងការធានារ៉ាប់រងអាចរំខានដល់ខ្សែសង្វាក់ផ្គត់ផ្គង់ដែលពឹងផ្អែកយ៉ាងខ្លាំងលើអាស៊ី៕

ដោយ៖ យា ចិន្ដាខន្ដី (ប្រភព៖ VNA)