AKP ភ្នំពេញ ថ្ងៃទី០៣ ខែមេសា ឆ្នាំ២០២៦—អគ្គស្នងការនគរបាលជាតិបានថ្លែងថា កិច្ចប្រជុំកំពូលហ្វ្រង់កូហ្វូនីនាពេលខាងមុខ ដែលកម្ពុជាធ្វើជាម្ចាស់ផ្ទះជាលើកដំបូង គឺជាព្រឹត្តិការណ៍អន្តរជាតិដ៏មានសារៈសំខាន់ និងមានវិសាលភាពធំទូលាយ ប្រមូលផ្តុំដោយប្រទេសជាសមាជិកជាង៩០ ព្រមទាំងមានការអញ្ជើញចូលរួមពីថ្នាក់ដឹកនាំកំពូល ដូចជាប្រមុខរដ្ឋ ប្រមុខរដ្ឋាភិបាល និងឥស្សរជនជាន់ខ្ពស់ជាតិ អន្តរជាតិជាច្រើន។ ដូច្នេះ ការធានាសន្តិសុខ និងសុវត្ថិភាពជូនថ្នាក់ដឹកនាំ និងគណៈប្រតិភូទាំងអស់ គឺជាបេសកកម្មយុទ្ធសាស្ត្រដ៏មានសារៈសំខាន់ខ្ពស់បំផុតដែលមិនអាចឱ្យមានកំហុស  ឬការធ្វេសប្រហែសមួយជ្រុងណាបានឡើយ។

ក្នុងកិច្ចប្រជុំពិនិត្យលទ្ធផល និងវឌ្ឍនភាពការងាររបស់អនុគណៈកម្មការទី៤ ក្នុងដំណើរការរៀបចំកិច្ចប្រជុំកំពូលហ្រ្វង់កូហ្វូនីលើកទី២០ ឆ្នាំ២០២៦ នាព្រឹកថ្ងៃទី0៣ ខែមេសា ឆ្នាំ២០២៦ នៅទីស្ដីការក្រសួងមហាផ្ទៃ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងជាប្រធានអនុគណៈកម្មការទី៤ បានថ្លែងថា ព្រឹត្តិការណ៍នេះ មិនត្រឹមតែជាវេទិកាអន្តរជាតិសម្រាប់ការពិភាក្សា និងសហប្រតិបត្តិការប៉ុណ្ណោះទេ ប៉ុន្តែជាវេទិកាបង្ហាញអំពីកិត្យានុភាព ឧត្តមភាព និងតួនាទីទទួលខុសត្រូវខ្ពស់របស់កម្ពុជា ដែលជាប្រទេសម្ចាស់ផ្ទះនៅលើឆាកអន្តរជាតិផងដែរ។

សម្រាប់ឆ្នាំ២០២៦នេះ កម្ពុជាមានកិត្តិយស និងឱកាសជាប្រវត្តិសាស្ត្រដោយបានធ្វើជាម្ចាស់ផ្ទះរៀបចំកិច្ចប្រជុំកំពូលដ៏ធំនេះជាលើកដំបូង ដែលជាសញ្ញាបញ្ជាក់អំពីការជឿទុកចិត្តពីសហគមន៍អន្តរជាតិ និងសមត្ថភាពរបស់កម្ពុជា ក្នុងការរៀបចំព្រឹត្តិការណ៍អន្តរជាតិកម្រិតខ្ពស់បែបនេះ។ ដូច្នេះ ការធានាសន្តិសុខ និងសុវត្ថិភាពជូនថ្នាក់ដឹកនាំ និងគណៈប្រតិភូទាំងអស់ គឺជាបេសកកម្មយុទ្ធសាស្ត្រដ៏មានសារៈសំខាន់ខ្ពស់បំផុត ដែលមិនអាចឱ្យមានកំហុស ឬការធ្វេសប្រហែសមួយជ្រុងណាបានឡើយ ព្រោះសន្តិសុខនៃព្រឹត្តិការណ៍នេះមិនត្រឹមតែទាក់ទងនឹងសុវត្ថិភាពបុគ្គលនៃអ្នកចូលរួមប៉ុណ្ណោះទេ ប៉ុន្តែពាក់ព័ន្ធដោយផ្ទាល់ទៅនឹងកិត្តិយសជាតិ ភាពជឿជាក់ពីអន្តរជាតិ និងភាពជោគជ័យរួមនៃការរៀបចំព្រឹត្តិការណ៍ទាំងមូល។

ឯកឧត្តម នាយឧត្តមសេនីយ៍ អគ្គស្នងការនគរបាលជាតិបានលើកឡើងថា ក្នុងពេលកន្លងមកកម្ពុជា ក៏មានបទពិសោធច្រើន និងទទួលបានជោគជ័យជានិច្ចក្នុងការរៀបចំការពារធានាសន្តិសុខ និងសុវត្ថិភាពសម្រាប់ព្រឹត្តិការណ៍អន្តរជាតិកម្រិតខ្ពស់ជាច្រើនដូចជា កិច្ចប្រជុំ IDC កិច្ចប្រជុំអន្តរជាតិផ្សេងៗ នៅខេត្តសៀមរាប កិច្ចប្រជុំ ICAPP+IPTP នៅរាជធានីភ្នំពេញ កិច្ចប្រជុំកំពូលអាស៊ាន ព្រឹត្តិការណ៍កីឡាស៊ីហ្គេមលើកទី៣២ជាដើម ដែលបទពិសោធទាំងនេះបានបង្ហាញយ៉ាងច្បាស់ពីសមត្ថភាព វិជ្ជាជីវៈ ការសម្របសម្រួលកិច្ចសហការ និងសមត្ថភាពគ្រប់គ្រងសន្តិសុខរបស់កម្ពុជាក្នុងការធានាឱ្យព្រឹត្តិការណ៍ធំៗប្រព្រឹត្តទៅដោយសុវត្ថិភាព និងជោគជ័យ ១០០%៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)