AKP បាត់ដំបង ថ្ងៃទី០៣ ខែមេសា ឆ្នាំ២០២៦—ឯកឧត្តម សុខ លូ អភិបាលខេត្តបាត់ដំបង នៅថ្ងៃទី៣ ខែមេសា ឆ្នាំ២០២៦ បានអញ្ជើញជាអធិបតីក្នុងពិធីប្រគល់បណ្ណសម្គាល់ម្ចាស់អចលនវត្ថុចំនួន ១ ៥៤៩បណ្ណ ជូនប្រជាពលរដ្ឋចំនួន ៣៩៥គ្រួសារ ស្ថិតក្នុងភូមិរំជៃ ឃុំស្នឹង ស្រុកបាណន់។

មានប្រសាសន៍ក្នុងឱកាសនោះ ឯកឧត្តម សុខ លូ បានថ្លែងអំណរគុណដល់សម្ដេចមហាបវរធិបតី ហ៊ុន ម៉ាណែត ដែលបានជំរុញឱ្យក្រសួងរៀបចំដែនដី នគរូបនីយកម្ម និងសំណង់ ពន្លឿនការចុះបញ្ជី និងផ្ដល់បណ្ណកម្មសិទ្ធិដីធ្លីជូនប្រជាពលរដ្ឋ ដើម្បីពង្រឹងនីតិរដ្ឋ លើកកម្ពស់អភិបាលកិច្ច បង្កើនទំនុកចិត្តរបស់ប្រជាពលរដ្ឋចំពោះអាជ្ញាធរ និងរួមចំណែកជំរុញការអភិវឌ្ឍសេដ្ឋកិច្ចសង្គមប្រកបដោយចីរភាព។ ប្រជាពលរដ្ឋដែលទទួលបានបណ្ណកម្មសិទ្ធិនាពេលនេះត្រូវថែរក្សាបណ្ណឱ្យបានល្អ ខណៈដីធ្លីជាអាយុជីវិតរបស់ប្រជាពលរដ្ឋព្រោះមនុស្សចេះតែបន្តកើនឡើងតែដីធ្លីមិនកើតថ្មីនោះទេ។

អំឡុងពេលវិបត្តិប្រេងឥន្ធនៈឡើងថ្លៃជាសកលនេះ ឯកឧត្តមអភិបាលខេត្ត បានអំពាវនាវដល់ប្រជាពលរដ្ឋត្រូវជឿជាក់លើការដឹកនាំរបស់រាជរដ្ឋាភិបាល មិនត្រូវជ្រួលច្របល់ទិញប្រេងស្តុកទុកដែលអាចបង្កគ្រោះថ្នាក់ជាយថាហេតុ ព្រោះបច្ចុប្បន្ននេះកម្ពុជានៅតែបន្តនាំប្រេងចូលមិនខ្វះប្រេងសម្រាប់ផ្គត់ផ្គង់ការប្រើប្រាស់ប្រចាំថ្ងៃនោះទេ។ មន្រ្តីរាជការ និងបងប្អូនប្រជាពលរដ្ឋប្រើប្រាស់ប្រេងដោយសន្សំសំចៃទោះបីជាកម្ពុជាមិនខ្វះប្រេងក៏ដោយ។ ប្រជាពលរដ្ឋត្រូវយកចិត្តទុកដាក់ថែរក្សាសុខភាព និងប្រើប្រាស់ទឹកដោយសន្សំសំចៃ ទោះបីជាប្រភពទឹកធំៗនៅក្នុងខេត្តបាត់ដំបងមានទឹកគ្រប់គ្រាន់។
ឯកឧត្តម សុខ លូ សង្កត់ធ្ងន់ថា ការផ្ដល់ជូនបណ្ណកម្មសិទ្ធិដីធ្លីនាពេលនេះពុំមានការបង់ថ្លៃសេវាក្រៅផ្លូវការនោះទេ ដោយតម្រូវឱ្យប្រជាពលរដ្ឋបង់តែសេវាផ្លូវការរបស់រដ្ឋតែប៉ុណ្ណោះ។

ឯកឧត្តម អភិបាលខេត្ត ជំរុញប្រជាពលរដ្ឋត្រូវខិតខំអប់រំកូនចៅឱ្យចៀសឆ្ងាយពីគ្រឿងញៀន គោរពច្បាប់ចរាចរណ៍ និងចូលរួមរាយការណ៍ពីបញ្ហាគ្រឿងញៀនតាមរយៈកម្មវិធីទូរសព្ទដៃApp NoDrug ដែលជាមធ្យោបាយលឿនរហ័ស សុវត្ថិភាព និងរក្សាការសម្ងាត់១០០ភាគរយ ដើម្បីឱ្យសមត្ថកិច្ចចុះអន្តរាគមន៍នៅមូលដ្ឋាន៕

ដោយ៖ ណយ នឿន ប្រភព៖រដ្ឋបាលខេត្តបាត់ដំបង)