AKP ភ្នំពេញ ថ្ងៃទី០៣ ខែមេសា ឆ្នាំ២០២៦—អង្គការទស្សនៈពិភពលោកអន្តរជាតិ ប្រចាំកម្ពុជា World Vision នៅថ្ងៃទី០៣ ខែមេសា ឆ្នាំ២០២៦ មានកិត្តិយសក្នុងការប្រគល់វិញ្ញាបនបត្រថ្លែងអំណរគុណដល់ក្រុមហ៊ុន យូនីលឹវើ កម្ពុជា ជាក្រុមហ៊ុនបុត្រសម្ព័ន្ធរបស់យូនីលឹវើ ចក្រភពអង់គ្លេស ចំពោះការផ្ដល់នូវកញ្ចប់ថែរក្សាអនាម័យដល់គ្រួសារភៀសសឹកចំនួន ១ ២០០ គ្រួសារនៅឧត្តរមានជ័យ។ អំណោយដ៏សប្បុរសនេះចូលរួមស្តារសេចក្តីថ្លៃថ្នូរ និងសុខុមាលភាពបងប្អូនភៀសសឹកក្នុងអំឡុងពេលដ៏លំបាកបំផុតរបស់ពួកគេ។

ក្នុងជំនួបរវាងលោក ជេនេស អ៊ីម៉ានូអ៊ែលហ្គីនទីញ នាយកប្រចាំប្រទេសអង្គការទស្សនៈពិភពលោកអន្តរជាតិ ប្រចាំនៅកម្ពុជា World Vision និងលោក លី សុធូ អគ្គនាយកក្រុមហ៊ុន យូនីលឹវើ ប្រចាំប្រទេស កម្ពុជា និងឡាវ បានពិភាក្សាអំពីចក្ខុវិស័យរួមសម្រាប់ប្រទេសកម្ពុជា ក្នុងការលើកកម្ពស់ការអប់រំ អនាម័យ ការផ្តល់អំណាចដល់ស្ត្រីដើម្បីអភិវឌ្ឍសហគមន៍ដ៏ធន់ប្រកបដោយនិរន្តរភាព។

សុខភាព និងអនាម័យគឺជាមូលដ្ឋានគ្រឹះនៃជីវិតដ៏រីកចម្រើន។ នៅពេលសាជីវកម្មចូលរួមវិនិយោគ លើទំនួលសុខត្រូវសង្គម បរិស្ថាន សង្គម និងអភិបាលកិច្ច  យើងបង្កើតពិភពលោកដែលមានសុវត្ថិភាព និងសុខភាពល្អសម្រាប់កុមារគ្រប់រូប ៕

ដោយ៖ ណយ នឿន (ប្រភព៖WorldVision)