AKP ខេត្តព្រះសីហនុថ្ងៃទី០៣ ខែមេសា ឆ្នាំ២០២៦--ព្រឹកថ្ងៃសុក្រទី៣ ខែមេសា ឆ្នាំ២០២៦ លោកគ្រូ អ្នកគ្រូ និងថ្នាក់ដឹកនាំសាលាសាគូរ៉ា មិត្តភាពកម្ពុជា ជប៉ុន មានទីតាំងស្ថិតនៅភូមិ៣ សង្កាត់លេខ១ ក្រុងព្រះសីហនុ​ បានរៀបចំកម្មវិធីសប្បាយៗជូនដល់សិស្សានុសិស្សក្នុងឱកាសពិធីបុណ្យចូលឆ្នាំខ្មែរ ដែលនឹងប្រព្រឹត្តទៅនៅថ្ងៃអង្គារ ១២រោជ​ ខែចេត្រ​ ឆ្នាំមមី អដ្ឋស័ក ពុទ្ធសករាជ ២៥៦៩ ត្រូវនេងថ្ងៃទី១៤ ខែមេសា ឆ្នាំ២០២៦ខាងមុខ ដែលជាពិធីបុណ្យប្រពៃណីដ៏សំខាន់មួយរបស់ជាតិខ្មែរ។ សិស្សានុសិស្សនៅសាលាបឋមសិក្សាសាគូរ៉ាមិត្តភាពកម្ពុជា-ជប៉ុន បាននាំគ្នាលេងល្បែងប្រជាប្រិយប្រកបដោយភាពសប្បាយរីករាយ ស្និតស្នាលនិងកក់ក្តៅ។   
លោក​ សែម រដ្ឋា នាយកសាលាបឋមសិក្សាសាគូរ៉ា មិត្តភាព កម្ពុជាជប៉ុន បានឪ្យដឹងថា​ ការរៀបចំកម្មវិធីលេងល្បែងប្រជាប្រិយ៍នៅក្នុងបរិវេណសាលាឆ្នាំនេះ​ ដែលមានល្បែងប្រជាប្រិយ៍ជាច្រើនប្រភេទដូចជា ល្បែងបោះអង្គុញ ល្បែងលាក់កន្សែង ល្បែងទាញព្រ័ត្រ ល្បែងចាប់កូនខ្លា និងការរាំលេង កម្សាន្ត ហើយកម្មវិធីនេះបង្កភាពសប្បាយជូនដល់សិស្សានុសិស្ស​ក៏ដូចជាលោកគ្រូ អ្នកគ្រូផងដែរ ទន្ទឹមនោះសិស្សានុសិស្សបានចូលរួមលេងល្បែងប្រជាប្រិយ៍យ៉ាងរីករាយ ដោយលាយឡំទៅនឹងសំណើច និងសម្លេងអបអរសាទរយ៉ាងរីករាយពោរពេញទៅដោយមិត្តភាព និងសាមគ្គីភាពសម្រាប់សិស្សានុសិស្សទាំងអស់គ្នា។

ហើយល្បែងប្រជាប្រិយទាំងអស់នេះមិនត្រឹមតែផ្តល់ភាពកម្សាន្តរីករាយប៉ុណ្ណោះទេ ប៉ុន្តែវាថែមទាំងជួយឪ្យសិស្សានុសិស្សរបស់យើងមានការយល់ដឹងអំពីវប្បធម៌ ប្រពៃណីខ្មែរ ទំនៀមទំលាប់របស់ខ្មែរ ការបង្រៀនអំពីការសហការគ្នា ការគោរពច្បាប់ល្បែង និងការរួបរួមជាក្រុមផងដែរ ក៏ដូចជាការបណ្តុះផ្នត់គំនិតឪ្យសិស្សានុសិស្សរបស់យើងចេះស្រឡាញ់ និងចូលរួមថែរក្សាវប្បធម៌ ប្រពៃណីជាតិឪ្យនៅគង់វង្សបន្តរឹងមាំបន្ថែមទៀត។

 សកម្មភាពលេងល្បែងប្រជាប្រិយខ្មែរ ក្នុងឱកាសបុណ្យចូលឆ្នាំនេះ គឺជាសកម្មភាពមួយដ៏មានអត្ថន័យបានបង្ហាញនូវស្នាមញញឹមរបស់លោកគ្រូ អ្នកគ្រូ និងសិស្សានុសិស្សរបស់យើងប្រកបដោយសេចក្តីសុខរីករាយ និងការរួបរួមរវាងសិស្សានុសិស្ស ហើយក៏ជាផ្នែកមួយក្នុងការអភិរក្សវប្បធម៌ខ្មែរនៅតែរស់រវើកជានិច្ចនិរន្ត​ ៕

ដោយ​៖ ងូ សុមុនី