AKP ភ្នំពេញ ថ្ងៃទី២ ខែមីនា ឆ្នាំ២០២៦--ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ (ក.ប.ទ.) នៅថ្ងៃទី២ ខែមេសា ឆ្នាំ២០២៦ បានអញ្ជើញជាអធិបតីក្នុងពិធីសំណេះសំណាលជាមួយនិវត្តជននៃសមាគមអតីតយុទ្ធជន និងនិវត្តជនកម្ពុជាវិស័យប្រៃសណីយ៍ និងទូរគមនាគមន៍ដោយមានការអញ្ជើញចូលរួមពីថ្នាក់ដឹកនាំ មន្ត្រីរាជការ សមាជិក សមាជិកាសមាគម និងនិវត្តជន សរុបប្រមាណជា ៣៥០ រូប។

ថ្លែងក្នុងពិធីនេះ ឯកឧត្តមរដ្ឋមន្រ្តី បាននាំនូវសេចក្តីនឹករលឹកចំពោះនិវត្តជន និងអតីតមន្រ្តីរាជការនៃ ក.ប.ទ. ពីសំណាក់សម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត ដែលជានិច្ចកាលតែងតែយកចិត្តទុកដាក់ខ្ពស់អំពីសុខទុក្ខរបស់អតីតយុទ្ធជន និងនិវត្តជនគ្រប់ៗរូប។ គតិបណ្ឌិតដ៏ឈ្លាសវៃរបស់សម្ដេចតេជោ ហ៊ុន សែន ក្នុងការពង្រីកវិសាលភាពសមាគមអតីតយុទ្ធជនកម្ពុជា ឱ្យគ្របដណ្តប់ដល់និវត្តជនទូទៅផងដែរ បានបង្ហាញពីចក្ខុវិស័យវែងឆ្ងាយ និងការយកចិត្តទុកដាក់យ៉ាងជ្រាលជ្រៅចំពោះសុខុមាលភាព និងគុណតម្លៃរបស់អ្នកដែលបានបម្រើជាតិគ្រប់ជំនាន់។ អនុវត្តតាមចក្ខុវិស័យដ៏ខ្ពង់ខ្ពស់នេះ ឯកឧត្តម បានប្តេជ្ញាចិត្តបន្តជំរុញការលើកកម្ពស់សុខុមាលភាព និងការគោរពដ៏ជ្រាលជ្រៅចំពោះនិវត្តជនទាំងអស់ ដែលបានបំពេញភារកិច្ចយ៉ាងសកម្ម និងមានសារៈសំខាន់ក្នុងការរួមចំណែកអភិវឌ្ឍន៍វិស័យប្រៃសណីយ៍ និងទូរគមនាគមន៍ ក៏ដូចជាការកសាងសមិទ្ធផលសំខាន់ៗជូនជាតិមាតុភូមិនាពេលកន្លងមក។

ឯកឧត្តម រដ្ឋមន្រ្តី ក៏បានគូសរំលេចអំពីការអភិវឌ្ឍន៍វិស័យប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍ និងព័ត៌មាន ជាពិសេសបច្ចេកវិទ្យាឌីជីថល។ ឯកឧត្តមរដ្ឋមន្រ្តីបានបន្តថាក្រសួងបានចាត់ទុកថា ការងារកែទម្រង់ គឺជាបុរេលក្ខខណ្ឌដ៏ចាំបាច់សម្រាប់ជំរុញឱ្យមានការផ្លាស់ប្តូរជាវិជ្ជមាន ដើម្បីឈានឆ្ពោះទៅរកការលើកកម្ពស់ប្រសិទ្ធភាព និងផលិតភាពកាងារដោយប្រើប្រាស់ប្រព័ន្ធបច្ចេកវិទ្យាឌីជីថល។ នាពេលកន្លងមក ក្រសួងសម្រេចបានលទ្ធផលជាច្រើនគួរទីមោទនៈលើការកែលម្អ និងពង្រឹងគុណភាពនៃការគ្រប់គ្រងកិច្ចការផ្ទៃក្នុងក្រសួងការគ្រប់គ្រងហិរញ្ញវត្ថុ និងការគ្រប់គ្រងនិងអភិវឌ្ឍសមត្ថភាពធនធានមនុស្ស ដែលបង្កើតបានជាមូលដ្ឋានសម្រាប់គាំទ្រដល់ការអភិវឌ្ឍ និងអភិបាលកិច្ចលើវិស័យក្នុងដែនសមត្ថកិច្ចរបស់ក្រសួង។

ឯកឧត្តម រដ្ឋមន្រ្តី បានថ្លែងអំណរគុណយ៉ាងជ្រាលជ្រៅចំពោះសកម្មភាពគំរូជាច្រើនដែល ឯកឧត្តម លោកជំទាវ លោក លោកស្រី ជានិវត្តជន ដែលបានកសាងមូលដ្ឋានគ្រឹះសម្រាប់សមិទ្ធផលនានា ដែលក្រសួងសម្រេចបានមកដល់បច្ចុប្បន្ន តាមរយៈការខិតខំបំពេញការងារ លះបង់កម្លាំងកាយ ចិត្ត និងប្រាជ្ញាស្មារតី ដោយមិនខ្លាចនឿយហត់ក្នុងការជំរុញនិងអភិវឌ្ឍវិស័យក្រោមសមត្ថកិច្ចរបស់ក្រសួង ដែលជាការចូលរួមចំណែកដ៏ធំធេងក្នុងការស្ថាបនាជាតិ និងបម្រើផលប្រយោជន៍របស់ប្រជាជនកម្ពុជាទាំងមូល ៕ 

ដោយ ណយ នឿន (ប្រភព៖ក្រសួងប្រៃសណីយ៍)