AKP ភ្នំពេញ ថ្ងៃទី០២ ខែមេសា ឆ្នាំ២០២៦--ប្រធានមជ្ឈមណ្ឌលសិទ្ធិពលករបរទេសតំបន់ហ៊ុងសុងប្រទេសកូរ៉េ សន្យាបន្តកិច្ចសហការចែករំលែកព័ត៌មានទាក់ទងនឹងបញ្ហាប្រឈម និងតម្រូវការផ្សេងៗរបស់បងប្អូនខ្មែរ។

ការសន្យានេះនៅពេល ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងសហការី បានអញ្ជើញជួបសំណេះសំណាល និងពិភាក្សាការងារជាមួយលោក Yu Yoyeol ប្រធានមជ្ឈមណ្ឌលសិទ្ធិពលករបរទេសតំបន់ហ៊ុងសុង និងអាជ្ញាធរស្រុកហ៊ុងសុង នៅទីតាំងមជ្ឈមណ្ឌលក្នុងស្រុកហ៊ុងសុង ខេត្តឈុងឆុងណាំដូ ប្រទេសកូរ៉េកាលពីពេលថ្មីៗនេះ។ 

ក្នុងឱកាសនៃជំនួប ឯកឧត្តមឯកអគ្គរាជទូតបានថ្លែងអំណរគុណចំពោះលោកប្រធានមជ្ឈមណ្ឌលដែលបានយកចិត្តទុកដាក់ និងជួយផ្តល់ការគាំទ្រដល់ជនបរទេស ពិសេសបងប្អូនខ្មែរក្នុងតំបន់ដោយផ្តល់ការប្រឹក្សាយោបល់ ថ្នាក់សិក្សាភាសាកូរ៉េ និងជំនាញផ្សេងទៀតសម្រាប់ពួកគាត់ដើម្បីសម្របខ្លួនក្នុងការរស់នៅក្នុងប្រទេសកូរ៉េនេះ។ 

ឯកឧត្តមក៏បានស្នើលោកប្រធានមជ្ឈមណ្ឌលផ្តល់ការសហការលើគម្រោងសកម្មភាពចំនួន៣របស់ស្ថានទូត ទី១ គឺការផ្តល់សេវាពិនិត្យសុខភាពដោយឥតគិតថ្លៃជូនបងប្អូនប្រជាជនខ្មែរក្នុងតំបន់ហ៊ុងសុង ទី២ ផ្តល់ទីតាំង និងសហការផ្សព្វផ្សាយកម្មវិធីផ្តល់សេវាសាធារណៈ និងប្រឹក្សាការងារចល័តរបស់ស្ថានទូត និងទី៣ ចូលរួមក្នុងសកម្មភាពផ្សព្វផ្សាយវប្បធម៌ដោយបង្កើតជាកម្មវិធីបុណ្យវប្បធម៌ប្រចាំឆ្នាំកម្ពុជា-កូរ៉េ។ 

លោកប្រធានមជ្ឈមណ្ឌលបានបង្ហាញចំណាប់អារម្មណ៍ជាវិជ្ជមានចំពោះសំណើរបស់ស្ថានទូត និងសន្យាបន្តកិច្ចសហការចែករំលែកព័ត៌មានទាក់ទងនឹងបញ្ហាប្រឈម និងតម្រូវការផ្សេងៗរបស់បងប្អូនខ្មែរក្នុងតំបន់ហ៊ុងសុង៕

ដោយ៖ ប៊ុនរិទ្ធ