AKP ឧត្តរមានជ័យ ថ្ងៃទី០២ ខែមេសា ឆ្នាំ២០២៦ -- ឯកឧត្តម អ៊ុន ចាន់ដា អភិបាលខេត្តកំពង់ចាម កាលពីព្រឹកថ្ងៃពុធ ទី០១ ខែមេសា ឆ្នាំ២០២៦ បានដឹកនាំប្រតិភូខេត្ត អញ្ជើញចុះសួរសុខទុក្ខ សំណេះសំណាល និងនាំសម្ភារៈគ្រឿងឧបភោគបរិភោគ និងថវិកា ដែលជាអំណោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ចែកជូននាយទាហាន នាយទាហានរង និងពលទាហាន អង្គភាពកងពលតូចអន្តរាគមន៍លេខ៦ ចំណុះកងពលធំអន្តរាគមន៍លេខ២ ដែលជាអង្គភាពសម្ព័ន្ធមេត្រីភាព ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងចូលមកដល់នាពេលឆាប់ៗខាងមុខនេះ ។

ឯកឧត្តម អ៊ុន ចាន់ដា បានថ្លែងថា សម្ព័ន្ធមេត្រីភាពរវាងកងពលតូចអន្តរាគមន៍លេខ៦ ជាមួយរដ្ឋបាលខេត្តកំពង់ចាម គឺយោងទៅតាមការសម្រេចរបស់រាជរដ្ឋាភិបាល ហើយរដ្ឋបាលខេត្តកំពង់ចាម តែងតែចំណាយពេលវាលាសមស្របមួយក្នុងការចូលរួម លើកទឹកចិត្ត សួរសុខទុក្ខ និងសំណេះសំណាល ជាមួយនាយទាហាន ពលទាហាន នៃកងពលតូចអន្តរាគមន៍លេខ៦ ដែលជាកងពលសម្ព័ន្ធមេត្រីភាព ដែលបញ្ជាក់ពីការគាំទ្រ នូវគុណតម្លៃខ្ពស់របស់កងកម្លាំងប្រដាប់អាវុធ ក្នុងការការពារបូរណភាពទឹកដីរបស់យើង។

ឯកឧត្តម ក៏បានថ្លែងពាំនាំនូវប្រសាសន៍ផ្តាំផ្ញើសាកសួរសុខទុក្ខពីសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ផ្ញើជូននាយទាហាន នាយទាហានរង និងពលទាហានទាំងអស់ដោយសម្តេចតែងតែនឹករលឹកកងកម្លាំងរបស់យើងគ្រប់ពេលវេលា ។ ក្នុងឱកាសឆ្នាំថ្មីនេះសម្តេចបានប្រសិទ្ធពរជ័យជូនកងកម្លាំងកងយោធពលខេមរភូមិន្តយើងទាំងអស់ សូមឱ្យមានសុខភាពល្អបរិបូណ៌ ជួបតែសេចក្តីសុខ សេចក្តីចម្រើន ជោគជ័យក្នុងបេសកកម្មការពារអធិបតេយ្យភាព បូរណភាពទឹកដីពីចោរឈ្លានពាន។

ឯកឧត្តមអភិបាលខេត្ត ក៏បានថ្លែងលើកទឹកចិត្ត និងគាំទ្រចំពោះកងកម្លាំងកងទ័ពកងពលតូចអន្តរាគមន៍លេខ៦ ដែលបានអនុវត្តន៍នៅបទបញ្ជាបានល្អ ពីសំណាក់ប្រមុខរាជរដ្ឋាភិបាល ថែរក្សាខ្សែបន្ទាត់ព្រំដែនរបស់យើង ជាព្រំដែនសន្តិភាព ព្រំដែនមិត្តភាព ព្រំដែនដែលមានកិច្ចសហប្រតិបត្តការ និងការអភិវឌ្ឍន៍។

គួរបញ្ជាក់ផងដែរថា អំណោយសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ដែលបាននាំមកប្រគល់ជូននេះរួមមាន៖ ថវិកាចំនួន ៥០លានរៀល, ស៊ីម៉ងត៍ចំនួន៥៦តោន, ភេសជ្ជៈ អេចប្រេស ចំនួន៣០០កេស, ទឹកសុទ្ធកម្ពុជា១,៥លីត្រចំនួន២០០កេស, ទឹកសុទ្ធកម្ពុជាចំនួន៣០០កេស, ទឹកសុទ្ធ V-Active ចំនួន៥០០កេស, ភេសជ្ជៈ V-Cola ចំនួន៥០០កេស, តង់ ២ម x ៣ម ចំនួន៥០០តង់, តង់ ៥ម x ៧ម ចំនួន១០០តង់, អង្ករ ចំនួន១០តោន, ត្រីខ ចំនួន៥០កេសធំ, សៀង ចំនួន១០កេស, ពងទាសាប ចំនួន៦.៤០០គ្រាប់, មីខ្លាឃ្មុំ ចំនួន១៦០កេស, មី Modem ចំនួន១២កេស, មីគុយទាយ GOOD ចំនួន១២កេស, មីកំប៉ុង POP Mieចំនួន៨៧កេស, ភេសជ្ជៈ បាកាស ចំនួន២៤កេស, ភេសជ្ជៈ Pocari sweetចំនួន២៥កេស, ទឹកត្រី ចំនួន១០០យួរ, ទឹកស៊ីអីវ ចំនួន១០០យួរ, ប្រេងឆា ចំនួន២៥០លីត្រ, ខ្ទឹមស ចំនួន២០០គីឡូក្រាម , ប៊ីចេង ចំនួន១០០គីឡូក្រាម , ស្ករស ចំនួន១០០គីឡូក្រាម, អង្រឹងចំនួន១៦០អង្រឹង, ខោអាវចម្រុះ ចំនួន២៧៥ ថង់, អាវរងារ ចំនួន១៣បេ, ក្រមា ចំនួន៧៥ក្រមា, ក្រមាការ ចំនួន៥០, ស្រោមជើងចំនួន៥៥គូរ, ម៉ាស់ ចំនួន៥០០ប្រអប់, ធូបមូស ចំនួន១៨០ប្រអប់, អំពូល ចំនួន៣ កេស , ក្រដាសជូតមាត់ ចំនួន១.១០០ដុំតូច, កូនកន្សែងដៃ ចំនួន៣០កន្សែង, នំប្រអប់ចម្រុះ ចំនួន៥៣០ គីឡូក្រាម, នំ UN ចំនួន២២ធុង, នំទាហាន VNចំនួន៣០កេស, កាហ្វ ចំនួន៦៩គីឡូក្រាម, ត្រីស្រស់ ចំនួន២តោន, សាច់ស្រស់ ចំនួន១តោន, សាច់ជ្រូក ចំនួន៥០០គីឡូក្រាម, សាច់មាន់ ចំនួន៥០០គីឡូក្រាម, ថ្នាំពេទ្យ ចំនួន១៧កេស, អាវយ័ន្ត ចំនួន១.៣០០អាវ និងកន្សែងយ័ន្ត ចំនួន១.៣០០កន្សែង ៕ 

ដោយ ទិត ស្រ៊