AKP ភ្នំពេញ ថ្ងៃទី០១ ខែមេសា ឆ្នាំ២០២៦-- ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានដាក់បទបញ្ជាដល់ក្រុមការងារ បន្តចុះត្រួតពិនិត្យតាមដាន និងស្វែងរកប្រភព ដែលអាចបង្កឱ្យមានករណី បណ្តាលឱ្យមានត្រីងាប់ ក្នុងស្ទឹងព្រែកត្នោតកាលពីពេលថ្មីៗ កន្លងមកនេះឱ្យបានឆាប់។ ការដាក់បទបញ្ជាក់នេះធ្វើឡើងក្រោយការត្រួតពិនិត្យរបស់ក្រុមជំនាញរហូតមកដល់ព្រឹកថ្ងៃទី០១ ខែមេសា ឆ្នាំ២០២៦ រកពុំទាន់ឃើញមូលហេតុពិតនៃការពុលស្លាប់ត្រីទាំងនោះ។

ក្រសួងបរិស្ថានបានឱ្យដឹងនៅរសៀលថ្ងៃទី០១ ខែមេសា ឆ្នាំ ២០២៦នេះថា ក្រុមមន្ត្រីជំនាញនៃអគ្គនាយកដ្ឋានគាំពារបរិស្ថាន បានបន្តស្រាវជ្រាវដើម្បីធ្វើការត្រួតពិនិត្យតាមដាន រកប្រភពបំពុល ដែលបានបង្កឱ្យត្រីងាប់នៅស្ទឹងព្រែកត្នោត នាពេលកន្លងមក ស្តិតក្នុងភូមិសាស្ត្រសង្កាត់ក្រាំងពង្រ ខណ្ឌដង្កោ រហូតដល់សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ។

ប្រភពខាងលើនេះឱ្យដឹងថា ក្រុមការងារជំនាញបានធ្វើការពិនិត្យស្ថានភាពនៅតាមដងស្ទឹងព្រែកត្នោត ដែលពាក់ព័ន្ធនឹងការបញ្ចេញសំណល់រាវពីតាមរោងចក្រ ចូលស្ទឹងព្រែកត្នោត ចំនួន ៣ ក្រុមហ៊ុន គឺ៖ក្រុមហ៊ុន GLOBAL XILIN ជាប្រភេទរោងចក្រខាលអំបោះ និងជ្រលក់ពណ៌។ ទី២គឺក្រុមហ៊ន HI BLUE ជាប្រភេទរោងចក្របោកគក់ខោខៅប៊យ។ទី៣គឺក្រុមហ៊ន TAK SUN ជាក្រុមហ៊ុន ទទួលសេវាសម្អាតសំណល់រាវ ចេញពីរោងចក្រកែច្នែរោមសត្វ របស់ក្រុមហ៊ុន Sunjoy និងក្រុមហ៊ុន Cipel។

ក្រសួងបរិស្ថានបានឱ្យដឹងថាក្រោយស្រាវជ្រាវក្រុមការងារជំនាញបានពិនិត្យឃើញថា កម្រិតប៉ារ៉ាម៉ែត្រ pH  របស់ក្រុមហ៊ុនទាំងបីនេះរកឃើញ ស្ថិតនៅក្នុងចន្លោះដែលអាចទទួលយកបានពោលគឺពី 6.5–8.5 ដែលបង្ហាញពីលក្ខខណ្ឌសមស្រប សម្រាប់ជីវិតក្នុងទឹក និងការប្រើប្រាស់ទឹកទូទៅ។ ហេតុនេះការបញ្ចេញសំណល់រាវ ពីរោងចក្រទាំង ៣ ខាងលើ ពុំមានចំណុចគួរឱ្យសង្ស័យ ដែលបានបញ្ចេញសំណល់រាវបំពុលតំបន់ទឹកសាធារណៈ នោះឡើយ។

ប្រភពដដែលនេះបានបញ្ជាក់បន្ថែមថាក្រៅពីការចុះត្រួតពិនិត្យក្នុងរោងចក្រខាងលើ  ក្រុមការងារបាន ធ្វើការចុះពិនិត្យស្ថានភាពតាមដងស្ទឹងព្រែកត្នោត និងបានយកសំណាកទឹកពាក់ព័ន្ធនឹងការបំពុល មកវិភាគ និងបានធ្វើតេស្តគុណភាពទឹកបឋមផងដែរ។

យោងតាមការធ្វើតេស្តបឋម តំបន់នេះដែរឃើញថា ស្ថានភាពទឹកស្ទឹងព្រែកត្នោត នៅផ្នែកខ្សែទឹកខាងលើ  (Upstream) នៃតំបន់ដែលសង្ស័យមានត្រីងាប់កាលពីពេលថ្មីៗកន្លងមកនេះក៏មានលក្ខណៈធម្មតា ពុំឃើញមានបញ្ហាគួរឱ្យសង្ស័យឡើយ។ យ៉ាងណាក្តីក្រុមការងារនឹងចាត់វិធានការត្រួតពិនិត្យ និងទប់ស្កាត់ការបំពុលទឹកសាធារណៈនៅតំបន់ទំនប់៧មករា (តំបន់កំពង់ទួល) ស្ថិតក្នុងសង្កាត់គងនយ និងសង្កាត់ក្រាំងពង្រ ខណ្ឌដង្កោ ជាបន្តទៀត៕

ដោយ៖ មករា