AKP ភ្នំពេញ ថ្ងៃទី១៥ ខែមីនា ឆ្នាំ២០២៦--

កាលពីថ្ងៃទី១៤ ខែមីនា ឆ្នាំ២០២៦ ជាថ្ងៃដ៏អស្ចារ្យសម្រាប់សហគមន៍ក្នុងដែនជម្រកសត្វព្រៃកែវសីមាគឺជាព្រឹត្តិការណ៍ដ៏សំខាន់មួយសម្រាប់សហគមន៍ដែលស្ថិតនៅក្នុង និងជុំវិញដែនជម្រកសត្វព្រៃកែវសីមា ដែលភាគច្រើនជាសហគមន៍ជនជាតិដើមភាគតិចពូនមកពីភូមិចំនួន២០ ដែលគាំទ្រដោយគម្រោងរេដបូកកែវសីមា។

អ្នកដឹកនាំសហគមន៍មកពីភូមិទាំង២០ បានចុះហត្ថលេខាជាផ្លូវការលើកិច្ចព្រមព្រៀងបែងចែក អត្ថប្រយោជន៍ពីគម្រោងរេដបូកកែវសីមា ជាមួយអង្គការសមាគមអភិរក្សសត្វព្រៃ (WCS) កម្ពុជា និងក្រសួងបរិស្ថាន។ កិច្ចព្រមព្រៀងនេះ អនុញ្ញាតឱ្យសហគមន៍ទទួលបានថវិកាប្រមាណជា១លានដុល្លារអាមេរិក នៅក្នុងដំណាក់កាលទី៥ នៃកម្មវិធីថវិការេដបូកសម្រាប់សហគមន៍ (C4C) ដែលជាកម្មវិធីបែងចែកអត្ថប្រយោជន៍ដ៏សំខាន់មួយរបស់គម្រោងរេដបូកកែវសីមា។

ថវិកានេះនឹងបន្តគាំទ្រអាទិភាពរបស់សហគមន៍ដូចជា ការអប់រំ ផ្តល់អាហារនៅតាមសាលារៀន សម្ភារៈសិក្សា និងការបង្កើនគុណភាពសិក្សាប្រព័ន្ធទឹកស្អាត និងអនាម័យ សេវាសុខភាព គម្រោងផ្តួចផ្តើមនានាទាក់ទងនឹងការលើកកម្ពស់ជីវភាពរស់នៅ និងក្រុមសន្សំសហគមន៍ ហេដ្ឋារចនាសម្ព័ន្ធខ្នាតតូច៖ ផ្លូវថ្នល់ ស្ពាន សាលារៀន និងរោងប្រជុំសហគមន៍ ការការពារព្រៃឈើ និងថែរក្សាវប្បធម៌ជនជាតិដើមភាគតិច ។

ជាមួយនឹងទឹកប្រាក់ប្រហែល ២លានដុល្លារអាមេរិក ដែលបានវិនិយោគរួចហើយ គិតត្រឹមដំណាក់កាលទី៤ រួមជាមួយដំណាក់កាលទី៥នេះ បានផ្តល់ថវិកាដោយផ្ទាល់ដល់សហគមន៍ សរុបប្រមាណ ៣លានដុល្លារអាមេរិក។

ពិធីចុះហត្ថលេខានេះ មានអ្នកចូលរួមប្រមាណជា ១៧០នាក់ ក្រោមអធិបតីភាព ឯកឧត្តម ជួប ប៉ារីស រដ្ឋលេខាធិការ និងជាមន្ត្រីបង្គោលរេដបូកថ្នាក់ជាតិនៃក្រសួងបរិស្ថាន និង លោក ងិន សុវិមាន អភិបាលរងខេត្តមណ្ឌលគិរី អាជ្ញាធរមូលដ្ឋាន តំណាងមកពីសហគមន៍ក្នុងគម្រោងរេដបូក មន្ទីរបរិស្ថានខេត្តមណ្ឌលគិរី និងដៃគូអភិវឌ្ឍន៍និងអភិរក្ស។

យើងរួមគ្នាអបអរសាទរសមិទ្ធិផលនេះ និងបញ្ជាក់ឡើងវិញនូវការប្តេជ្ញាចិត្តរួមរបស់យើង ក្នុងការប្រើប្រាស់ដីធ្លី ការអភិរក្សជីវៈចម្រុះ និងការលើកកម្ពស់សុខុមាលភាពសហគមន៍ ដែលរស់នៅក្នុង និងជុំវិញដែនជម្រកសត្វព្រៃកែវសីមាប្រកបដោយចីរភាព។សហគមន៍កាន់តែរឹងមាំ ព្រៃឈើត្រូវបានការពារ អនាគតប្រកបដោយចីរភាពសម្រាប់កម្ពុជា ៕ 

ដោយ ណយ នឿន (ប្រភព៖គម្រោងរេដបូកកែវសីមា)
[3/15/2026 10:26 AM] Kom Heng: